א 32 יעריגער פאלעסטינער פון יהודה ושומרון איז מאנטאג אינדערפרי ארעסטירט געווארן, נאכדעם וואס זיכערהייט וועכטער האבן באמערקט ווי ער פילמט אין דער אונטערערדישער אהרונוביץ׳ סטאנציע פון דער לייכטער באן אין בני ברק. די וועכטער האבן גערופן די פאליציי, וועלכע האבן אים אפגעשטעלט און אויסגעפרעגט.

לויט די פאליציי, האט דער מאן זיך צום ערשט אידענטיפיצירט אלס א איינוואוינער פון דער אראבישע שטאט טייבע, אבער א נאכפאלגנדע אונטערזוכונג האט אנטפלעקט אז ער געפינט זיך אומלעגאל אין מדינת ישראל און האט לכאורה איבערגעגעבן פאלשע אידענטיפיקאציע פרטים. די פאליציי האט אויך געמאלדן אז דער פארדעכטיגטער איז שוין פריער געווען פארמישט אין זיכערהייט פארבינדענע פארברעכנס.

אין שפעטערדיגע באריכטן אין די מדינת ישראל׳דיגע מידיא איז דער מאן אידענטיפיצירט געווארן אלס עבד א סלאם זבאדה, 32 יאר אלט. לויט די באריכטן האט ער געזאגט פאר די אויספארשער אז ער האט געפילמט די סטאנציע און די באנען כדי צו ווייזן די בילדער פאר זיין ווייב. עס איז אויך באריכטעט געווארן אז קלאגעס זענען אריינגעגעבן געווארן קעגן אים, און די פאליציי האט געבעטן אז ער זאל פארבלייבן אין ארעסט ביז דער פראצעס ווערט פארענדיקט.

דער אינצידענט האט אויפגעוועקט זיכערהייט זארגן צוליב דעם וואס די סטאנציע געפינט זיך אין בני ברק, אבער די אויטאריטעטן האבן דערווייל נישט באשטעטיגט אז דער פארדעכטיגטער האט געפלאנט אן אטאקע, אדער אז ער האט ספעציעל געצילט אידישע פאסאזשירן.