געהויבענער מעמד הנחת אבן הפינה פארן נייעם בנין המפואר ישיבה גדולה תורת משולם פייש ד’טאהש - ניו יארק 

פארגעקומען דעם פארלאפענעם ערשב"ק בהעלותך בראשות כ"ק אדמו"ר מטאהש שליט"א

אן אומבאשרייבליכע אטמאספערע פון קדושה, שמחה און עקסטאז האט ארומגענומען די ווענט פון ישיבה גדולה תורת משולם פייש ד’טאהש - ניו יארק, ווען עס איז געפייערט געווארן דער היסטארישער "מעמד הנחת אבן הפינה" פארן נייעם, בנין האדיר והמפואר, וועלכע וועט בעזרת ה' דינען אלס אכסניא של תורה פאר די הונדערטער בחורים מצויינים

 דער מעמד איז פארגעקומען אלס אן ערשטקלאסיגער אריינפיר צום דערהויבענעם שבת קודש, וועלכע איז געפראוועט געווארן בצל הקודש פון כ”ק אדמו”ר מטאהש שליט"א, וועלכער איז ספעציעל געקומען צו פארן פראווענען דעם שבת מיט די טייערע תלמידים 

די זייגערס האבן געוויזן אויף 5:30 ערב שבת נאכמיטאג, ווען דער לופט אינעם היכל הישיבה איז געווען געדעכט מיט שבת'דיגן חן, ווען המלך ביופיו, כ”ק אדמו”ר מטאהש שליט”א, איז ערשינען בהיכל הישיבה, מלובש מיט די בגדי שבת קודש, וועלכע מ’האט עפאנגען בשירה ובזמרה

דער מעמד איז געעפנט געווארן מיט פאסיגע און פלאמיגע ווערטער דורך הרה"ג רבי שלמה יונגער שליט”א דומ"ץ טאהש ק"י ור"מ בישיבה גדולה, וועלכער האט ארומגערעדט בשבחה פון דעם מקום קדוש וואו תורה ויראת שמים מארקירן דעם סדר היום, און איבער דעם גרויסן זכות פון מרחיב זיין די גבולי הקדושה מיט דעם נייעם בנין

נאך די ווארימע ווערטער פונעם דיין שליט”א האט זיך דער היכל הישיבה צוגאסן מיט ווארימע ניגוני התעוררות און כיסופין, גרייטנדיג די הערצער צום הויכפונקט ווען מ’וועט אוועקשטעלן דעם יסוד פארן נייעם בנין וועלכע וועט ארויסגיין תורה ויראת שמים פאר די קומענדיגע דורות 

דאן האט מען געהערט הערליכע חרוזים דורך מו"ה אלי' דוד טירנויער הי"ו, וועלכער האט מיט זיין אייגנארטיגן טאלאנט אויסגעגראמט הערליכע, הארציגע חרוזים. די גראמען האבן ארויסגעברענגט די נאנטקייט און קשר צווישן דעם רבי'ן און די תלמידים, און דעם שטאלץ פון די ישיבה 

גלייך דערנאך האבן די בחורים געהאט די זכי’ צו הערן דברות קודש פון כ”ק אדמו”ר מטאהש שליט"א  אנגעפילט מיט הדרכה, חיזוק און ברכות לרוב פאר די בחורי חמד און פאר די הנהלת הישיבה וועלכע געבן אפ זייער לעבן פאר דעם וואוילזיין פון די תלמידים

אצינד האט מען צוגעטראטן צום הויכפונקט פונעם מעמד, ווען דער רבי שליט"א האט מיט גרויס התעוררות פארגעזאגט מזמורי תהלים קאפי' כ"ד – כ"ט, און דערנאך געזאגט אינאיינעם קאפיטל ל' – צ"א, און אריינגעלייגט מטבעות קודש, און געגאסן די צעמענט אינעם ספעצילן שיסל וועלכע מען האט שפעטער ארויפגעגאסן אויפ'ן פאדעמענט וואו מען בויעט ארויף דעם בנין האדיר והמפאור.

דערנאך האט דער רבי מכבד געווען צו גיסן בניו הגה"צ שליט"א, הרה"ג רמ"י ומנהלי הישיבה שליט"א 

נאכן זיך אויפשטעלן טאנצן שמחם בבנין שלם און יה זכות אבות בשמחה ובדביקות פאר לענגערע מינוטן, האט דער רבי שליט”א מכבד געווען אלע בחורים אריבערצוגיין איינס נאכן אנדערן, יעדער בחור האט געהאט די זעלטענע געלעגנהייט אריינצולייגן מטבעות, און גיסן צעמענט זייענדיג א שותף אינעם גיסן דעם צעמענט פאר דעם עתיד פון זייער אייגענער ישיבה

שמחם בבנין שלום