גייסטרייכער שבת התאחדות וועט אפגעראכטן ווערן דעם שבת קודש פרשת בא בהיכל ישיבה גדולה ומתיבתא אין קרית יואל בראשות כבוד הגה"צ אבדק"ק ור"מ סאטמאר וויליאמסבורג שליט"א בשליחות הקודש פון אביו הגדול כ"ק אדמו"ר הגה''ק מ'סאטמאר שליט"א

מיט א הכנה דרבה ורגש דקדושה גרייטן זיך די תלמידי המתיבתא אין קרית יואל מיטצוהאלטן דעם תוכנ'פולע שבת התאחדות ווען אלע תלמידי המתיבתא וועלן צוזאמקומען בשבת אחים גם יחד תחת קורת גג אחד זינגען שירות ותשבחות פאר'ן אויבערשטן און הערן דברי תורה דברי אלוקים חיים מפי ממלל רברבן פה מפיק מרגליות דער רב שליט"א וועלכע וועט אפרעכטן דעם גאנצן שבת אויף א דערהויבענעם פארנעם.

די שבתים מיט'ן רב שליט"א זענען א יחיד במינה די הערליכע סעודות און די ווארעמע תפילות,

די בחורים קוקן שוין ארויס אויף דעם שבת התאחדות א גאנץ יאר נאך האבנדיג דעם גוטן טעם אין די ביינער וואס איז איינגעקריצט געווארן אין די פארגאנגענע יארן פון די געהויבענע שבתים.

אלע תפילות שבת קודש וועלן אפגעראכטן ווערן בראשות דער רב שליט"א בהיכל הישיבה סניף דברי יואל, און די סעודתא דחקל תפוחין וועט געפראוועט ווערן ברוב פאר והדר בהיכל הישיבה סניף ויואל משה, און אזוי אויך סעודת רעוא דרעוין וועלכע וועט געפראוועט ווערן גאר דערהויבן אזויווי אין די פארגאנגענע יארן בהיכל הישיבה סניף ויואל משה,

די היכלי הישיבות ווערן אויסגעשטעלט מיט א מאסיוון אויסשטעל מיט א ריזן צאל זיץ פלעצער, די הנהלות הישיבה ארבעט איבערמידליך צו אריינשטופן די מאקסימום פלעצער ביי אלע סעודות, ובפרט ביי שלש סעודות, נאך וואס די פארגאנגענע יארן איז אלץ געווען פול עד אפס מקום.

----------------

די געלעגנהייט ווערט ספעציעל אויסגעניצט דורך חסידים ואנשי מעשה תושבי קרית יואל וועלכע דערווארעמען זיך יעדע וואך בצל הקודש פון כ"ק מרן רבינו הגה"ק שליט"א, און האלטן מיט די ווארעמע תפילות, די עריכת שלחן הטהור ליל שבת קודש, ובפרט די דערהויבענע שלש סעודות װאס ווערט געפראוועט מיט טויזנטער אידן בצוותא חדא, און בעת ווען דער רבי איז נישט דא, זוכט מען מיט דורשט וואו צו גיין,

איז יעצט אז מען האט די זכי' אז דער רב שליט"א וועלכע איז באקאנט מיט די דערהויבענע שבתים, די התעוררות'דיגע שלש סעודות, ובפרט בימי השובבי"ם, וועט וויילן דא אויף שבת און פראווענען אינאיינעם מיט די תלמידי הישיבה,

כאפן זיך הונדערטער אנשי שלומינו צו צום געלעגנהייט צו שטילן אביסל דעם צמאון לדבר השם, און וועלן קומען מיטהאלטן די דערהויבענע מינוטן בעת רעוא דרעוין בראשות דער רב שליט"א וואו מ'וועט כאיש אחד בלב אחד זינגען צוזאמען זמירות שירות ותשבחות פאר'ן אויבערשטן, און דאן די הויכפונקט צו הערן די דברי כיבושין בדברי מוסר והתעוררות, הדרכה אויף למעשה, ועוד,

די היכל המתיבתא ווערט טאקע ספעציעל אויסגערישט פאר שלש סעודות מיט טויזנטער זיץ פלעצער, און באזונדערע שטיי פלעצער, כדי צו קענען אקאמאדירן דעם ריזן ציבור לאלפים וואס קומען יעדעס יאר צום דערהויבענעם של''ס, אזוי אויך ווערט צוגעשטעלט א פלאטע פון באסעס נאך שלש סעודות פאר אלע הונדערטער אנ''ש און פאר אלע תלמידי המתיבתא תושבי קרית יואל.

לקראת שבת לכו ונלכה.