ארום 10:30 פארגאנגענעם מאנטאג פרשת כי תצא אויפדערנאכט איז פארגעקומען א מסיבת לחיים בביתו פון הגה"צ אבדק"ק ור"מ סאטמאר וויליאמסבורג שליט"א לרגל דעם התמנות פון הרה"ג המפורסם ר' אברהם וואלף שנעבאלג שליט"א אלץ דומ"ץ ביהמ"ד אור ישראל אלימלך ד'סאטמאר, עס זענען געווען אנוועזנד די גבאי וראשי הביהמ"ד און עטליכע מתפללים.

דער רב האט משמיע געווען א דרשה און ארומגערעדט בשבח פונעם נייעם דומ"ץ הביהמ"ד זאגנדיג אז דאס איז גאר א גוטע אויסוואל, און עס איז דער פאסיגסטער באשלוס זייענדיג באקאנט מיט זיין כח ההוראה און כח להשפיע פאר טויזענטער שואלים ומקשיבים, וועט עס זיכער אסאך אויפטוהן פאר'ן ביהמ"ד און צוגעבן צום הערליכן בילד, און צוגעענדיגט מיט ברכות לרוב.

דערנאך האט הרה"ג ר' אברהם וואלף שליט"א אויפגעטרעטן און ארומגערעדט בשבח פונעם מתפללי ביהמ"ד און מסיים געווען מיט א תפילה להשי"ת שלא יצא מכשול מתחת ידיו.

דער רב געמאכט א לחיים און דערנאך מכבד געווען הרה"ג ר' אברהם וואלף שליט"א צו מאכן א לחיים, און דער רב האט אנגעוואונטשן ברכות לרוב שתשרה שכינה במעשי ידיו און ער זאל האבן הצלחה ארויפצוברענגען דעם כבוד הביהמ"ד.

עס האט זיך פארמירט א שיינע שמועס איבער מנהגי קידוש לבנה, דערנאך האט מען געזינגען עטליכע ניגונים לכבוד המעמד, און מען האט זיך געזעגנט לשלום.