לְהִפָּקֵד בִּדְבַר יְשׁוּעָה וְרַחֲמִים:

פילע אידן וועלן פּוקד זיין ציון הקדוש פון הייליגן ליסקא רב זי"ע ביומדה"ל דינסטאָג עקב ביים אָפּצייכענען היסטאָרישע "פּנים חדשות" אויפ'ן רחבת שטח הציון

נאָך לאַנגע-יאָרן שטערונגען ביים ציון:

ענדליך צושטאַנד געקומען צו קענען צוקומען צום ציון מיט ישוב הדעת!

הגה"ח רבי יוסף גרינוואַלד שליט"א וועט אָנפירן מיט רירנדער "מעמד בקשת רחמים בוקע רקיעים" נאָכגעפאָלגט מיט גרויסאַרטיגער "סעודת הילולא והתחדשות המקום"

פילע נסיעות לאָזן זיך אַרויס צו וויילן באתרא קדישא ליסקא דעם י"ד אב – "נסיעה טרעוול" שטעלט אַהער קורצע באַקוועמע נסיעות

"אהל הקודש" פּרעכטיג איבערגעמאַכט • הערליכע בנין "הכנסת אורחים" געבויט • "ציגאַנער אויפ'ן שטח" גענצליך עלימינירט • פּראַקטישע "פּאַרקינג לאַט" אַהערגעשטעלט

ליסקא, אונגאַרן. – מיט גרויס התרגשות נמט אויף כלל ישראל די היסטאָרישע "פּנים חדשות" וואָס איז געוואָרן אַהערגעשטעלט ביי דעם הייליג מקום, סמוך ונראה צום מקום קודש הקדשים פון הייליגן ליסקא רב זי"ע אין שטאָט ליסקא, אונגאַרן, וואָס האָט דערהויבן מקום מנוחת כבוד הצדיק, און צושטאַנד געברענגט כבוד הציבור צו קענען שופח שיח זיין מיט אַ רואיגקייט להפּקד בדבר ישועה ורחמים, נאָך די שווערע אומאַנגענעמליכקייטן אין לויף פון די יאָרן.

ווער עס באזוכט היינט די הייליגע שטאָט ליסקא קען באלד באמערקן אז דאס גאנצע ארום האט באקומען א פּנים חדשות. די גאנצע רחבת שטח הציון איז איבערגעפרישט געווארן מיט א ריי איינריכטונגען, אזוי אז יעדער איד זאל קענען צוקומען צום ציון הקדוש מיט הרחבת הדעת און אין א סביבה וואס פּאַסט פאר די קדושת המקום. אַנדערש ווי ביז היינט וואָס איז געווען גאָר שווער צוצוקומען צום ציום מיט אַ רואיגקייט, צוליב די ציגאנרע ביים שטח, און מ'האָט נישט געקענט געהעריג פּאַרקירן נאָנט צום ציון.

איינס פון די הויכפּונקטן איז דער התחדשות פונעם אוהל הק', מקום קודש הקדשים פון הייליגן ליסקא רב זי"ע בעל אך פרי תבואה, וואָס איז דורכגעגאַנגען א הערליכן אויפפרישונג, ווען יעדער פרט איז אויסגעארבעט געווארן מיט כבוד און רעספּעקט צום הייליג מקום.

ב"ה אַז צו דער זעלבער צייט האָט מען שוין פאַרענדיגט דאָס אויפבוי אַ הערליכע ברייטע בנין הכנסת אורחים, צו פארזיכערן דעם "אשל" פאר די פילע רייזנדע רונדע דעם יאָר צו מתפּלל זיין ביים ציון הק' אין ליסקא.

דער בנין איז געווארן צוגעשטעלט מיט א ברייטקייט צו קענען אויפנעמען די הונדערטער געסט מיט גרויס באַקוועמקייט, וואו יעדער קען זיך דערקוויקן די נשמה נאָך די לאַנגע וועגן, צוקענען מתפּלל זיין ביים ציון מיט ישוב הדעת.

א באזונדערע דערגרייכונג איז די פולשטענדיגע אויפרייניגונג און אויסברייטערונג פון די גאנצע שטח רחבת הציון. זאכן וואס האבן יארן לאנג געשטערט דעם סדר ארום דעם ציון זענען אוועקגענומען געווארן, און אין זייער ארט געפינט זיך היינט א ריינע, ברייטע און מסודר'דיגע סביבה.

מיט גרויס שתדלנות און פאַרהאַנדלונגען איז געלונגען אינגאנצן אויסצוקלינען און באפרייען דעם גאנצן ארומיגן שטח פון די אומגעוואונטשענע "ציגאַנער", די פּויערן וואָס פלעגן אָפּוואַרטן אַלע וואָס זענען געקומען מתפּלל זיין ביים ציון. דער שטח איז יעצט אינגאנצן ליידיג און זיכער פאר יעדן יחיד אין קיין שום צייט פון טאג אדער נאַכט.

אויך איז אַהערגעשטעלט געווארן א ברייטער "פּאַרקינג-שטח", וואס טוט באדייטנד פארגרינגערן דעם אנקום פאר די פילע אידן וואָס קומען זיך אויסגיסן דאָס האַרץ ביים הייליגן ליסקא רב. באַזונדער איז דאָס אַ געוואַלדיגער הילף פאר די וואָס קומען מיט באָסעס און ספרינטערס, אַז מ'קען האָבן באַקוועם וואו צו פּאַרקירן נאָנט צום ציון הק'.

גרויסער ציבור ערוואַרטעט היי-יאָר ביים יאָרצייט אין ליסקא

יעדעס יאר קומען אָן אידן פון אלע עקן וועלט, צו פועל'ן ישועות אין בני, חיי ומזוני רויחי, און זיך משתטח זיין אויפן הייליגן ציון פונעם בעל אך פרי תבואה זי"ע. דאָס יאָר לרגל די יאָרצייט י"ד אב הבעל"ט וועט זיך אָנזען אַ גרעסערע פאַרקער, לקראת דאָס התחדשות פון די אַלע פרישע איינריכטונגען, און עס גייט בעז"ה פאָרגעקומען דערהויבענע מעמדים אדירים בראשות הגה"ח המפו' רבי יוסף חיים גרינוואַלד שליט"א.

די עסקנים גרייטן שוין צו דעם מקום קדוש צו אויפנעמען די פילע פוקדי הציון, מיט אַלע נויטיגע איינריכטונגען צו אַקאָמאַדירן דעם ציבור אין לויף פון די ימי הילולא קדישא, י"ד אב, דינסטאָג פּר' עקב הבעל"ט.

דער הויכפּונקט פונעם יומא דהילולא קדישא היי-יאָר תשפ"ו וועט הויפּטזעכליך זיין דער רירנדער מעמד "בקשת רחמים בוקע רקיעים", וואָס וועט פאָרקומען בעז"ה ברוב עם ביים ציון הקדוש, ווי הונדערטער וועלן זיך פאראייניגן מיט תפלות און בקשות, לקרוע את גזר הדין, צו איינרייסן ישועות און רפואות פאַר'ן כלל און פּרט ביי אָט דעם אויסגעווייקטן אָרט ביים פועל ישועות בקרב הארץ הרה"ק דער ליסקא רב זי"ע.

דאָס וועט פאָרקומען אין שפּיץ פונעם גרויסן גאַסט, מלהיב לבבות ישראל במיטב לשונו, הגה"ח רבי יוסף חיים שליט"א, וואָס וועט אויפטרעטן מיט דברי התעוררות שטייענדיג אין אַזאַ גרויסן זמן ווען מ'איז מעורר זכותו הגדו והקדוש פונעם גרויסן בעל הילולא דער הייליגער אך פרי תבואה.

וואָס ווי באַקאַנט האָט רביה"ק מסאַטמאַר זי"ע שטענדיג בעפאָר תקיעת שופר דייקא דערמאַנט איבער "דער הייליגער ליסקא רב זי"ע", וואָס הייבט עטוואָס אַרויס דעם אומבאַגרייפליכן זכותו הגדול וואָס איז מעורר רחמים וחסדים פאַר'ן כלל און פּרט.

נאָכדעם וועט געפּראַוועט אַ גרויסאַרטיגע מעמד אדיר "סעודת הילולא והתחדשות המקום" לכבוד דעם הייליגן זמן, און לכבוד דער התחדשות פונעם מקום הקדוש און אַלע איינריכטונגען וואָס מ'האָט זוכה געווען צו פאַרענדיגן.

עס ווערט ערווארטעט אז די מעמדים וועלן צוציען א גרויסן ציבור, וואס וועלן קומען מיט איין ציל – זיך מחזק זיין אין אמונת צדיקים, זיך אויסגיסן דאס הארץ פאר'ן באשעפער בזכות דעם הייליגן צדיק, און מיטנעמען פון ליסקא אַלע השפּעות טובות פאר זיך און די גאַנצע אַרום.

צוגלייך וועלן פילע אידן האבן די געלעגנהייט צו פוקד זיין אויך די נאענטע מקומות הקדושים אין דער געגנט, צווישן זיי די ציונים פון רבו מובהק הרה"ק בעל ישמח משה זי"ע און זיין משמש בקודש החביב הרה"ק רבי ישעי'לע קערעסטירער זי"ע.

די פולשטענדיגע התחדשות אויפ'ן שטח הציון וואָס איז צושטאַנד געקומען אַדאַנק "קרן בית ליסקא" וואָס האָבן אינוועסטירט טויזנטער דאָלאַרן אין די לעצטערע יאָרן, טוט צוברענגען אַז רונדע דעם יאָר וועט זיין צוגעשטעלט מיט נויטיגע איינריכטונגען לטובת די טויזנטער מתפּללים, אַז מ'זאָל זיך קענען אָפּרוען פון די לאַנגע וועגן און זיך אויסגיסן דאָס האַרץ ביים הייליגן ליסקא רב זי"ע מיט ישוב הדעת.

אין ליסקא שפּירט זיך שוין די הייליגע אויר לקראת די יומא דהילולא. די צוגרייטונגען זענען אין פולן שוואונג, די טירן שטייען אפן פאר יעדן איד, און דער ציבור קוקט ארויס מיט גרויס בענקשאפט צו די הייליגע טעג, ווען די תפילות וועלן ארויפגיין פון דעם הייליגן מקום, און דער זכות פונעם בעל אך פרי תבואה זי"ע וועט, בעזרת השם, ממשיך זיין ישועות און ברכות פאר כלל ישראל.

מ'קען קויפן טיקעטס פאר קורצע נסיעות צוגעשטעלט דורך "נסיעה טרעוול": 845-444-8785

זכותו הגדול והקדוש פון דעם אך פרי תבואה זי"ע יגן עלינו ועל כל ישראל אמן!