ועל פליטת בית סופריהם: פארגאנגענע וואך איז פארגעקומען בקודש פנימה - ביים פאר הדור כקש"ת רבי יעקב מאיר שעכטער שליט"א אין שטוב, א געהויבענע ביקור און אסיפת הוד דורך עורכי נגידי ותומכי מכון "דורשי יחודך", וואס גיבן זיך אפ די לעצטערע יארן צו דריקן און פארשפרייטן לקח אמרותיו פון האי גאון וצדיק משירי כנסת הגדולה - אויפן דירעקטן רוף פונעם פאר הדור צו תומך און מחזק זיין די עוסקים במלאכת הקודש במסירות נפלאה.

צום באשטימטן צייט זענען זיך צוזאמגעקומען די שרייבערס און די נגידים ותומכים וואס האבן פארגעלייגט פארן רב שליט"א אלע שאלות וואס מאכט זיך בשעת'ן שרייבן די הייליגע שיעורים און מאמרים, אויף וואס דער רב שליט"א האט געענטפערט מיט א קלארקייט לדעת את המעשה אשר יעשון.

שיין איז געווען צו זען ווי די עורכים האבן פארגעלייגט די שאלות פארן רב אין הסטאריע, וואס כידוע איז דער רב א מעין המתגבר וואס האט זיך אפגעטון ביי די פריערדיגע גדולי ירושלים, און אסאך מאל דארף מען וויסן מער פרטים בשעתן שרייבן, און די רב שליט"א לא נס ליחו מיט די גאנצע כח הזכרון פארציילט די עבודות וסיפורים אזויווי עס וואלט ווען פארגעקומען היינט, מיט א ענוות חן און פשטות און ארגענעלקייט.

אזוי אויכט איז געווארן פארגעלייגט די ווייטערע פלענער אויף וואס מען פלאנט בעזר ה' צו דריקן און די קומענדיגע טעג, אויף וואס דער פאר הדור האט אויסגעדריקט א שטארקע קורת רוח, און אנגעוויזן הוראות הקודש ווי זיך צו באגיין להגדיל תורה ולהאדירה.

נאך איבער א שעה פון קורת רוח און פארברענגן האט דער רב שטארק און ווארעם אנגעווינטשן די נגידי ותומכי המכון, און זיך אויסגעדריקט 'איר זענט מיר אמת'דיג מחיה', דער אויבערשטער זאל ענק געבן די השפעות כהנה וכהנה צו קענען באצאלן צו דריקן נאך אסאך ספרים בעתיד בס"ד.