כלל ישראל'ס חסד אימפעריע פארברייטערט אירע טויערן:

ערהאבענע מעמד 'קביעת מזוזות' פארגעקומען אינעם שפאגל נייעם 'כפים הויז' אין וויליאמסבורג אהערגעשטעלט מיט אלע צוגעהערן למען משפחות חולי ישראל, בראשות גדולי רבני העיר שליט''א

גדולי הרבנים דרוקן אויס גרויס התפעלות פון די געוואלדיגע פעולות פון 'כפים' וואס טוט בעז''ה ראטעווען די שטובער פון חולי ישראל פון צופאלן ווערן ח''ו

דעם דאנערשטאג שלח איז אין שטאט וויליאמסבורג פארגעקומען א הערליכע מסיבה שגדולי ישראל מסובין בה, א מעמד קביעת מזוזות בראשות גדולי ומאורי עירינו שליט''א, ווי מען איז אין א מזל'דיגע שעה אנגעקומען צום גרויסן מאמענט פונעם ערעפענונג פונעם נייעם און פראכטפולע 'כפים הויז' באקאנט אלץ 'כפים קעבּין', וואס וועט בעז''ה אנהייבן א נייע גאלדענע קאפיטל אינעם מאסיווע חסד אפאראציע וואס ווערט אפערירט דורכ'ן בארימטן און הייליגן 'כפים' ארגאניזאציע.

'כפים', א ארגאניזאציע וואס פאדערט נישט קיין הסברים, 'כפים' האט גענצליך געטוישט די מציאות און איבערגעשריבן די איבערלעבענישן פון די פילצאליגע חולי ישראל, קליינע קינדערלעך און עלטערן פון קינדער, וואס מוטשענען זיך ליידער מיט זייערע ביטערע פעקלעך, סיי מיט כסדר באזוכן, מחזק זיין און דערפרייען די פאציענטן, בפרט האט כפים זיך ארויסגעשטעלט ארויסצוהעלפן די מצב מיט די קינדער אין שטוב וואס אין אזא פאל ווען איינע פון די עלטערן זענען נישט אין שטוב, צו מיט א נישט געזונט קינד, אדער ווען איינע פון די עלטערן זענען ל''ע קראנק, אפעקטירט דאס גאר שטארק די גאנצע ארדענונג אין שטוב, און די גאנצע שטוב קען ח''ו צוזאמפאלן

כפים האט אין די לעצטע צענדליגער יארן באוויזן מיט גרויס סייעתא דשמיא אויפצוטון גדולות ונצורות, זיכער צו מאכן אז די שטובער צופאלן נישט, מיט א געטרייע מיליטער פון הונדערטער וואלונטירן וואס שטייען גרייט ארויסצוהעלפן מיט וואס עס פעלט נאר אויס, סיי צו באזוכן די חולים זיי צו דערפרייען און ערמעגליכן די עלטערן צו זיין אינדערהיים מיט די קינדער, סיי מיט רוימען און באקן אין די הייזער זיכער צו מאכן אז די שטוב פארט ווייטער כשורה, און אז די שווערע לאגע זאל ווי ווייניגער אויסווירקן אויף די צובראכענע משפחות

די גולת הכותרת פון די פעולות חובקות איז אומצוויידייטיג די ספעציעלע 'כפים הייזער' באקאנט אלץ ' כפים קעבּין', ווען מיט גרויס סייעתא דשמיא איז געעפנט געווארן אין אלע היימישע געגענטער ספעציעלע רחבות'דיגע פלעצער, וואס איז ממש ווי א 'צווייטע היים' פאר די אומשולדיגע קינדערלעך פון די משפחות, וואס האבן דארט א אפן טויער אריינצוקומען ווען אימער צו שפילן און פארברענגען, מאכן די היימארבעט מיט זייער וואלונטיר, און אביסל פארגעסן פון די שווערע מצב וואס קומט פאר אין שטוב, עס איז צוגעשטעלט מכל טוב וטוב, עסן און שפילצייג מיט אלע צוגעהערן מיט א ברייטקייט, בס''ד איז שוין געעפנט געווארן 4 לאקאציע'ס, אין וויליאמסבורג, בארא פארק, מאנסי, און לעיקוואד, וואס די גרויסע שינו לטובה וואס דאס האט געברענגט איז העכער אלע ערווארטונגען, און די הייזער זענען יעדע נאכט איבערגעפילט מיט פילצאליגע קינדערלעך וואס פארברענגען אויף א געשמאקע פארנעם

נאך די געוואלדיגע הצלחה, ווען די וויליאמסבורג'ע לאקאציע האט שוין נישט געקענט פארנעמען די פלייץ פון אזויפיל קינדער, האב'ן זיך די העלדישע חברי הנהלה פון כפים, וואס זענען פארנומען יומם ולילה צו פארגרינגערן די לאגע פון די חולי ישראל, אריינגעשפרינגען אינעם פראיעקט זיך צו פארברייטערן מיט א פרישע ברייטערע לאקאל אין וויליאמסבורג, וואס איז אהערגעשטעלט און אויסשטאפירט געווארן אויף א הערליכע פארנעם, צו קענען אנגיין מיט די אויסטערלישע פעולות ביתר שאת ועוז

אין בעפארגרייטונג צום מעמד 'קביעת מזוזות' זענען די חשוב'ע חברי הנהלת כפים ארומגעגאנגען על פתחי האדמורי''ם והרבנים שליט''א אין שטאט, איינצולאדענען צום מעמד, די רבנים האבן זיך פאראינטערעסירט איבער די הייליגע פעולות און אויסגעדרוקט גרויס התפעלות אויף די געוואלדיגע פעולות הצדקה והחסד און געווינטשן מ'זאל קענען אנגיין מיט די עבודת הקודש

דעם דאנערשטאג שלח איז מיט גרויס דערהויבנקייט געפראוועט געווארן די מעמד קביעת מזוזות אויף די טויערן פון די פרעכטיגע היים, עס האבן זיך משתתף געווען פילע וואלונטירן, די געשעצטע נדיבי בעם, די חשוב'ע חברי הנהלה, הרה''ח ר' אביגדור שפיטצער הי''ו, הרה''ח ר' יצחק שווייד הי''ו, הרה''ח ר' סענדר גרינהויט הי''ו און הרה''ח ר' נפתלי צבי ציג הי''ו, הרה''ח ר' יעקב הערש בערנאטה הי''ו, און הרה''ח ר משה הערש גרובער הי''ו

מען האט געהאט די זכי' צו הערן ווארעמע דברות קודש פון כ''ק מרן אדמו''ר מ'תולדות צבי ספינקא שליט''א, וואס האט ארויסגעברעגט די געוואלדיגע זכי' נשגבה וואס די אלע חשוב'ע וואלונטירן ובפרט די חשוב'ע חברי הנהלה האבן, צו קענען אזויפיל דערלייכטערן די הונדערטער משפחות, מיט אזעלכע פעולות גדולות ונצורות, און ארויסגעהויבן די הונדערטער אידן וואס געבן אוועק פון זייער צייט שלא ע''מ לקבל פרס פאר א צווייטע איד און ווארעם אנגעווינטשן ברכות לרוב פאר אלע עוסקים ומסיייעים

ביותרת הכבוד האט מען מקבל פנים געווען כ''ק מרן אדמו''ר מ'סאטמאר שליט''א וואס האט זיך ספעציעל מטריח געווען זיך צו משתתף זיין צו ארויסווייזן שטיצע פאר'ן הייליג'ן מוסד, מען האט געזינגען 'בורא עולם בקנין השלם זה הבנין', דערנאך האט די רבי אויפגעטרעטן מיט גאר ווארעמע ווערטער, ארויסברענגנדיג אז פונקט ווי ביי יציאת מצרים שטייט אז די אויבערשטער האט געפירט 'ואשא אתכם על כנפי נשרים' אז די אויבערשטער האט געטון מיט אידן אזויווי די נשר פאר איר קינד נישט צו האבן קיין שום זייטיגע דאגה, די זעלבע איז די הייליגע מוסד וואס 'על כפים ישאונך' זיי נעמען די גאנצע שטוב אויף די כנפי נשרים און נעמען אראפ די גאנצע עול וואס ליגט אויף די פלייצעס, די רבי האט מעיד געווען וואס ער הערט צוריק פון אידן וואס זענען נהנה פון די הייליגע מוסד, ווי מען קומט ממש אקעגן די וואס דארפן צוקומען דערצו נאך איידער מ'בעט, א בחינה פון 'טרם יקראו ואני אענה', מיט אזא ווארעם הארץ, און דערנאך אנגעווינטשן ברכת הקודש שחפץ ה' בידם פון די חשוב'ע עסקנים ישכיל ויצליח

עס האבן זיך אויך משתתף געווען הגה''צ ר' יעקב כ''ץ שליט''א אבד''ק נמיזשא, ראש חבורה פון 'גרויסע ברודער – מענער וואלונטירן', וואס באגלייט די חבורה פונדערנאנט על כל צעד ושעל, כ''ק מרן אדמו''ר מ'סקולען וויליאמסבורג שליט''א, הגה''צ אבד''ק באלחוב שליט''א, הגה''צ אבד''ק דזשיקוב שליט''א, הרה''צ ר' מאיר גרינוואלד שליט''א בן האדמו''ר מ'פאפא שליט''א, הגה''צ ר' חיים קלמן גוטמאן שליט''א דומ''ץ קיט''ל אהל פיגא, און נאך, וואס כולם פה אחד האבן ארויסגעברענגט זייער שעצונג פאר אזא הייליגע מוסד וואס ראטעוועט די מצב פשוטו כמשמעו פון אזויפיל אידישע שטובער

מען האט מכבד געווען די רבנים, נדבנים, און חברי הנהלה צו קלאפן מזוזות אויף די שטובער, פון ווי עס וועט ארויסקומען אזויפיל חסד פאר די פילע משפחות משך די קומענדיגע יאר'ן

משך די וואך האבן זיך אויך משתתף געווען כ''ק מרן אדמו''ר מ'וויזניץ וויליאמסבורג שליט''א, און הגה''צ אבד''ק ור''מ סאטמאר וויליאמסבורג שליט''א, וואס האבן געקלאפט א מזוזה, און געווינטשן מיטב ברכותיהם פאר אלע עושים ומעשים אנצוגיין מיט די הייליגע פעולות חובקות זרועות עולם ביתר שאת ועוז

אין די יעצטיגע טעג ווערט שוין די נייע 'כפים הויז 'טעגליך באנוצט דורך הונדערעטער קינדערלעך, וואס טרעפן דא א ווארעם פלאץ און אפענע אויערן, וואס פארזיכערט בס''ד זייער געזונטע ערציאונג טראץ אלעס וואס זיי גייען אריבער, עס איז נאך פארבליבן געציילטע זכותים פאר נדיבים בעם מיט א ווארעם הארץ וואס ווילן נעמען א חלק אין די געוואלדיגע זכי' נשגבה, מ'קען זיך פארבינדן מיט הרב מרדכי יעקב שווייד 347-988-0265, אדער רופט אין אפיס 718-412-8560

funds@kapayim.org

בורא עולם בקנין השלם זה הבנין!