דראמאטישע פייער ברעכט אויס ביי א הויפט אויל ריפיינערי אין אינדיע

דראמאטישע ווידעא קליפס פון אינמיטן די נאכט פארשפרייטן זיך שנעל, וואו מען זעט ריזיגע פלאמען און שווארצע רויך וואס הייבט זיך פון די 'עיטש-פי-סי-על' (HPCL) וויסאק ריפיינערי אין וויסאקאפאטנאם, אינדיע. דאס פייער האט אויסגעבראכן ארום 10 אזייגער ביינאכט, דעם 2'טן נאוועמבער, אין א סטארעדזש טאנק ביים מאלקאפוראם סייט פון די ריפיינערי.

די קאמפאני זאגט אז זייער פייער און סעיפטי טיעם האט תיכף אקטיוויזירט עמערדזשענסי שריט, און די ארטיגע 'אנדרא פראדעש' פייער דעפארטמענט האט שפעטער געהאלפן אינגאנצן פארלעשן דאס פייער. לויט די קאמפאני זענען די פלאמען געבליבן קאנטראלירט בלויז צום טאנק ראיאן, קיינער איז נישט אומגעקומען אדער פארוואונדעט געווארן, און אלע אפטיילונגען פון די ריפיינערי ארבעטן ווייטער געהעריג און זיכער.

טראץ דעם וואס מען האט עס שנעל באוויזן צו קאנטראלירן, האט די שרעקעדיגע סצענע פון א ברענענדיגע ריפיינערי איבערגעלאזט אסאך פראגעס איבער ווי אזוי עס האט זיך אנגעהויבן. א לאקאלע באאמטער האט געזאגט אז א קליינע אויפרייס איז געהערט געווארן בעפאר דאס פייער האט אויסגעבראכן, אבער קיין אפיציעלע אורזאך איז נאכנישט געמאלדן געווארן. אויף די אינטערנעט זענען דא וואס שפעקולירן איבער פארדעכטיגטע אורזאכן, אבער עס איז דערווייל נישט דא קיין שום באשטעטיגטע באווייזן אונטער די קלאנגען.

די ריפיינערי פראצעסירט ארום 15 מיליאן טאן פון קרוד אויל א יאר, און איז א גאר וויכטיגע טייל פון אינדיע'ס ענערגיע נעצווערק אויפ'ן מזרח בארטן, דעריבער וועט די אויספארשונג ווערן נאכגעפאלגט מיט גרויס אינטערעסע. דערווייל זענען די הויפט פראגעס וואס האט געפירט צו דעם אויפרייס, צי מען קען פארמיידן אזעלכע טאנק פייערן אין די צוקונפט, און וואס די אפיציעלע אויספארשונג וועט אנטדעקן.