היסטארישע באזוך אינעם ווייסן הויז: כ"ק אדמו"ר מסאטמאר שליט"א האפט צו שתדל'ן ביי פרעזידענט טראמפ איבער גזירת הגיוס

בעת וואס פירנדע אדמו"רים און רבנים גרייטן זיך צו אן ערווארטעטע באגעגעניש מיט פרעזידענט דאנאלד טראמפ אינעם ווייסן הויז, האט כ"ק אדמו"ר מסאטמאר שליט"א (מהר"א) אויסגעדרוקט האפענונג אז מען וועט קענען אויסנוצן די זעלטענע געלעגנהייט צו בעטן הילף פאר די ישיבה בחורים וואס פלאגן זיך מיט די ביטערע גזירת הגיוס אין ארץ ישראל.

ביים רעדן צו תלמידים אין קרית יואל נאכ'ן באקומען די אפיציעלע איינלאדונג פונעם ווייסן הויז, האט דער רבי דערציילט אז לכתחילה האט ער געקלערט אפצוזאגן די מיטינג צוליב די עבודה פון חודש אלול און די גרויסע הכנות צו די ימים נוראים. אבער למעשה האט דער רבי באשלאסן יא צו גיין, אנצייגנדיג אז אזא באגעגעניש קען דינען אלס א געלעגנהייט צו העלפן אידן וואס געפינען זיך אין אן עת צרה.

ווי עס ווערט באריכטעט, האט דער רבי ספעציפיש ארויסגעברענגט דעם שווערן מצב פון די בני הישיבות אין ארץ ישראל, און אויסגעדרוקט האפענונג אז מען וועט קענען אריינגעבן א בקשה צום פרעזידענט צו פרובירן ארויסהעלפן אין דעם ענין. די ווערטער פונעם רבי'ן זענען א קלארע אנדייטונג אז ער האפט אויסצונוצן די עקסטרא-ארדינערי געלעגנהייט אינעם ווייסן הויז צו שתדל'ן לטובת די בחורים וואס שטייען אויס צו ווערן געצווינגען צום מיליטער.

די באגעגעניש קומט פאר בלויז עטליכע טעג בעפאר ראש השנה, וואו עס ווערן ערווארטעט פארטרעטער פון די גרעסטע חסידישע קהילות אין אמעריקע, אריינגערעכנט סאטמאר. א באאמטער אינעם ווייסן הויז האט באשטעטיגט די פלאנירטע פארזאמלונג, זאגנדיג אז פרעזידענט טראמפ קוקט ארויס אויפצונעמען די רבנים וואס רעפרעזענטירן די גרויסע היימישע קהילות אין די פאראייניגטע שטאטן.

כאטש די פונקטליכע אגענדע פון די מיטינג איז נאכנישט אפיציעל געמאלדן געווארן, און עס זענען דא פארשידענע באריכטן איבער וועלכע נושאים מען וועט למעשה ארומרעדן, געבן אנדערע קוועלעס איבער אז מען וועט מעגליך אויך אויפברענגען די זארגן ארום די זעלבסטשטענדיגקייט פון די היימישע מוסדות התורה אין ניו יארק און די רעכטן פון רעליגיעזע פרייהייט.

די היסטארישע מיטינג האט געצויגן גרויס אינטערעסע איבער די גאנצע חסידישע וועלט, בעת די לעצטע הכנות צו די נסיעה קיין וואשינגטאן גייען אן אין פולן שוואונג.