ביים אנקומען אין האטעל איז אלעס געווען הערליך רייך צוגעשטעלט אויף א מלכות'דיגן און עלעגאנטען פארנעם, רייכע טעימה ושתיה קלה און פיינע איבערבייס איז געווען צוגעשטעלט פר אלע באטייליגטע ווי עס פאסט, אזוי ארום צו קענען לערנען בהרחבת הדעת מיט זאטע הערצער.

בעפאר די מעמד יום שכולו תורה האט זיך אנגעהויבן האט הגאון הגדול הדומ''ץ שליט''א אויפגעטרעטן מיט פאסיגע דיבורים איבער די זמן ווי מ'שטייט יעצט, ביום הזה באו מדבר סיני און דא שפילט זיך עס אפ נאכאמאל ווען די גאנצער עולם איז דא מיט א א ריינע ציל צו לערנען די הייליגע תורה און מאכן די ריכטיגע הכנה לחג מתן תרותינו, און די דיין האט מרחיב געווען בדיבור בגודל הזמן, אז מ'זאל טאקע אויסנוצן די שעות אך ורק ללימוד התורה.

תיכף דערנאך האט זיך טאקע אפגעשפילט דאס אומגלויבליכע, ווען די גאנצער היכל געווען איינגעהילט אין א אש התורה פאר עטליכע שעות נאכאנאנד, און עס האט אפגעדונערט בקול חוצב להבות אש א פייערדיגע קול התורה פון די אלע הונדערטער פארזאמעלטע, וקול התורה הולך וחזק מאוד.

אין א גאר זעלטענע ערשיינונג פון החזקת התורה ולומדיה, איז אין א פלוצים'דיגע מינוט ערשינען בהדרו כ''ק מרן רבינו שליט''א, די מנהיג העדה וואס שטייט בראש פון די גאנצע מערכת החינוך והחזקת התורה אימפעריע, און טוט זיך כסדר נאכפרעגן בהצלחת הכולל, און איז ספעציעל געקומען זיך מצרף זיין מיט די סדר הלימוד, און געלערנט מיט'ן טעגליכע חברותא הרה"צ רבי ישכר בעריש סג"ל טירנויער שליט''א ברוב עם אינאיינעם מיט'ן גאנצן ציבור בעת די היסטטארישע מעמד.

אינעם באשטומטען זמן נאכ'ן לימוד שעות רצופות האט די גאנצע ציבור אינאיינעם געדאווענט תפלת מנחה, און מיט דעם האט זיך געשלאסן די ערשטע חלק מעמד.

אין א דערהויבענע שטימונג איז דאן סערווירט געווארן א רייכע סעודת ראש חודש אויף א גאר עלעגאנטע פארנעם, ווי עס האבן זיך געזעצט צו רייך געדעקטע טישן די גרויסע פילאנטראפען תומכי הכולל, און צו דער זייט זענען געווען אויסגעזעצט די רבנון ותלמידיהון די חשוב'ע לומדי הכולל.

משך די מעמד האט אויך אויפגעטרעטן מו"ה ישראל חיים קרויס הי"ו מחברי הנהלה, וואס האט אויף קליין געלט צונומען וואס דאס באדייט פון אויפהאלטן א כולל, און די ערווארטונג פונעם ציבור תומכים זיך אנצושליסן מיט גרעסערע סכומים, אויך האט ער ארויסגעברענגט א רייע חידושים ותקונים וואס מען האט שוין אויפגעטון ביז אהער, ועוד נטויה להלאה בעז''ה.

אלס אורח הכבוד איז ספעציעל געקומען צופארן האי פה מפיק מרגליות, ונואם בחסד עליון, הרה"ג רבי מרדכי הערש שפיטצער שליט''א, ר''י תורת צבי ד'ספינקא, וואס האט מיט זיין שטורומישע געלונגענע שפראך באצויבערט אלע משתתפים מיט טרעפליכע רעיונות און געדאנקען, און ארויסגעברענגט די געוואלדיגע חיוב וואס ליגט אויף יעדע נגיד ותומך צו שטיצן די הייליגע תורה אימפעריע, וצדקתו עומדת לעד.

דאן איז די מעמד געקומען צו די קלימאקס ווען די חשוב'ע אורח הכבוד האט אויסגערופן א רייע חשוב'ע פילאנטראפן, וואס האבן באותו מעמד אונטערגעשריבן ביים רבי'ן די שטרות ווי זיי האבן זיך אונטערגענומען אסטראנאמישע סכומים להחזקת הכולל, וקנאת סופרים תרבה חכמה ווען פולע נגידים האבן זיך צוגעשטעלט צו זיין פון די מחזיקי תורה.

דאן ארום 10:00 אזייגער האט מען געבענטשט ברכת המזון און געדאווענט תפלת מעריב, און דער גאנצער עולם איז זיך אהיים למקום מושבם מיט פרייערליכע תורה'דיגע געפילן פון פיקודי השם ישרים משמחי לב.

התורה כוללת כל הטובות שבעולם!