א הערליכער ציבור עסקנים, נדבנים און ערוועלטע באאמטע, זענען זיך צוזאמגעקומען דאנערשטאג עקב ביי די הויפטקווארטירן פון חסד 24/7 דשיכון סקווירא, צו פייערן די באנייאונג פון 3 נייע מיטגלידער אין די פלאטע פון די ארגאניזאציע. די ווענס זענען אויסגעשטאט מיט "ווילטשעיר רעמפס" צו העלפן אונזערע ברידער און שוועסטער וועלכע זענען צוגעבינדן צום בענקל אנקומען ווי זיי ווילן און דארפן, פון אפוינטמענטס ביז משפחה שמחות און אלעס אינצווישן. דער "פיקאפ טראק" העלפט אויסשטאפירן די צענדליגער צימערן און דירות אין און נעבן די שפיטעלער פונעם טריי סטעיט ראיאן מיט אלעס נויטיג, ווי אויך צו טראגן "מעדיקל עקוויפמענט" צו די שטובער פון די נויט-באדערפטיגע.

צו די באשטימטע צייט האבן זיך פארזאמלט די עסקנים אין שפיץ פון הרב שלום פסח גרינבערג שליט"א, מנהל ומייסד חסד 24/7 און ווארעם אויפגענומען די שטאטישע באאמטע, בתוכם די בארימטע אידן פריינט מייק לאולער, דער לאקאלער קאנגרעסמאן אין וואשינגטאן; ביל וועבער, סטעיט סענאטאר; מייקל ספעקט, ראמאפא סופערווייזער;דניעל היימען, ראמאפא פאליציי שעף; ר' אהרן בנציון ווידער, קאונטי לעגיסלאטור ר' ישראל אייזענבאך, ווילעדזש טראסטי, און ר' ישראל משה שפיצער, ראש העיר פון שיכון סקווירא.

נאכ'ן צערעמאניאלן "ריבאן קאטינג", איז מען ארויף אין קאנפערענץ צימער, וואו ר' מרדכי טייטלבוים, מראשי עסקני חסד, האט איינגעלייטעט דעם מעמד, ארויסברענגענדיג מיט זיין רייכע שפראך וואס חסד 24/7 טוט אלץ, באדאנקט די באטייליגטע און איבערהויפט די חשוב'ע נדבנים פון די ווענס, ה"ה ר' מנחם מענדיל טאמבאר פון די בארימטע MM Tires, א לאנגיעריגער חסד וואלונטיר; ר' בנימין גלאנץ, פינאנציעלער יועץ; און ר' הערשיל הירשלער פון Apex Solutions.

דערנאך האט גענומען דאס ווארט דער לאקאלער פאליציי שעף און מיט רירנדע ווערטער דערציילט וואס ער האט איבערגעגעבן פאר כ"ק אדמו"ר מ'סקווירא שליט"א די נאכט פריער, ווען ער האט זיך באטייליגט ביי די גרויסע חתונה, און ביים באקומען ברכת הקודש איבערגעגעבן א גרוס פון חסד 24/7 ווי ער האט עס מיטגעהאלטן פערזענליך, זייענדיג מיט א נאנטן אין שפיטאל... און וויאזוי פון איבערראשונג האט ער דארטן צוגעטראגן נארהאפטיגע מאכלים פאר מאנא מאנטעל, שטאב הויפט פון ראמאפא, וואס איז אויך געווען אין שפיטאל מיט א נאנטע.

נאך עטליכע קורצע אויפטריטן, און די אנוועזנדע האבן זיך ווארעם געזעגנט, ווען די פאליטיקאנטן פארשפרעכן צו שטיין צו דער האנט פונעם כלל בכלל און חסד 24/7 בפרט צו קענען ווייטער העלפן דעם ציבור.