אויף די 'מערכת ויזניץ טעלעפאן ליניע האט מען געהערט א הארצרייסנדע און געוויין געמישטע רוף פונעם רבי'נס זון, הרה"צ ר' יעקב מרדכי, וועלכער האט געבעטן יעדן איינעם מתפלל צו זיין פארן טאטן.

ער האט איבערגעגעבן אז דער מצב פונעם רבי'ן איז "זייער ווייט פון גוט", ער גייט אריבער גאר שווערע יסורים'דיגע באהאנדלונגען שוין באלד צוויי יאר, און די דאקטוירים זעען ליידער נישט דעם סוף.

דער וויזשניצער בית דין האט פארארדנט פאר אלע חסידים צו זאגן דעם פערטן ספר תהילים פרייטאג צונאכטס.

שבת אינדערפרי נאכ'ן עולה זיין לתורה, האט דער בעלזער רבי שליט"א פארארדנט צו מאכן א ספעציעלן 'מי שבירך' פאר זיין שוואגער'ס רפואה שלימה רבי ישראל בן לאה אסתר.

דער וויזשניצער רבי האט געשיקט זיין זון הרה"צ ר' חיים מאיר און זיין גבאי ר' בן ציון שטיינגער צו וויילן אויף שבת אין מירון בצל זיין קוזין, האדמו"ר מוויזשניץ מאנסי.

ביים שלש סעודות האט דער וויזשניץ מאנסי רבי מעורר געווען דעם ציבור צו מתפלל זיין פאר זיין פעטער'ס רפואה ווייל "דער דור ברויך אים האבן".

שפעטער נאכ'ן שבת איז דער רבי אריין צום ציון הרשב"י, הדלקה איז באשטימט געווארן צוזאמען מיט המשפיע ר' אלימלך בידרמאן שליט"א.