לא היו ימים טובים לישראל כחמשה עשר באב!

ערשטמאָליגער ״שידוכים פארזאמלונג - לאמיר ברעכן טעלער״, פאררופן דורך קהל יטב לב דסאטמאר און די ״שדכנים ועד״, אַלס קלימאַקס פון די פּעולות האדירות אין די לעצטערע יאָרן צו לינדערן דעם שידוכים-קריזיס און ברענגען אַ ישועה און אויפרעכטונג פאַר טויזנטער משפּחות פון אנשי שלומינו וועלכע קוקן אַרויס אויפגעראָכטן צו ווערן!

אַ ריי זעלטענע פייערדיגע דרשות זענען געהערט געוואָרן, אַ תורה׳דיגער בליק פון הרה״ג מורה ודאין רבי שמואל יעקב מייזעלס שליט״א, דומ״ץ בקהלתינו הק׳ אין קרית יואל, און פון הרה״ג מגיד מישרים רבי אלעזר ניסן רובין שליט״א, וועלכער האט עלעקטעריזירט די פארזאמלטע מיט אַ מייסטערהאַפטיגע דרשה!

דער הויכפּונקט איז געווען דער דראמאטישער ״שדכנים פּאַנעל״, וואו טייערע היימישע שדכנים מאנשי שלומינו, האבן זיך אויסגעשמועסט ארגינעל נאטורליך, בקרב קהל ועדה, איבער דער שטארקע פּלאָגעניש וואָס דער ציבור גייט דורך מיט שידוכים, און פאָרגעשטעלט לעבעדיגע, פּראַקטישע, ווירקזאַמע לעזונגען צו ענדיגן דעם קריזיס און מרבה זיין שמחה בקרב אנ״ש!

מחיל אל חיל! הייבט זיך אן אין די יעצטיגע טעג די יערליכע מעכטיגע ״שידוכים דרייוו״ איינצופעדימען נייע פרישע אינגע שדכנים אנצוטראגן שידוכים פארן ציבור, מיטן ריכטיגן געווער אין די האנט, דער פראכטפולער אויפלאגע פונעם ״שידוכים האנט ביכל״ וואס פארגרינגערט שטארק אנצוטראגן שידוכים.