בס"ד

ווען דער פוסק הדור הגאון האדיר רבי משה שטערנבוך שליט"א מרא דארעא קדישא האט אויסגעבראכן אין א געוויין:

“אויך איך בין געווען א יתום... ווער נאך ווי מיר קען ענק פארשטיין!”

העפטיגע הכנות צום גרויסארטיגן שמחת ה'בר מצוה' פאר 56 יתומים, אין ראם פונעם וועלט בארימטן ארגעניזאציע 'זה לזה' | די בר-מצוה חתנים לאדענען גדולי הדור צום פראכטיגן מעמד, דאנערשטאג פרשת במדבר תשפ"ה | קיין טרוקן אויג ביי די רירנדע מעמדים אלס ‘הכנה לדבר בר-מצוה’

וכולם מקבלים מזה לזה

דער הייליגער ארגעניזאציע 'זה לזה' איז שוין ברייט-באקאנט איבער'ן וועלט, דינענדיג אלס ווארעמער ווינקל און לעכטיגער היים פאר אומצאליגע אלמנות און יתומים, זיי באגלייטנדיג אין די שווערע מאמענטן און שטיצנדיג מיט געוואלדיגע אויפטואונגען ברוחניות ובגשמיות.

אין ראם פונעם הייליגן ארגעניזאציע, שטראלט ארויס די צווייגל 'בני מלכים', וואו חשוב'ע מחנכים באגלייטן פערזענליך יעדן יתום, דערהייבן זיי, שמועסן און הערן אויס זייער צובראכן הארץ, מיט א הימלישן מסירות-נפש צו אנפולן זייער ווייטאגליכן חלל מיט הויפענעס פון ליכט און פרייד, חיזוק און שמחה.

איינע פון די גרויסע הויכפונקטן גייט פאסירן קומענדיגן דאנערשטאג ב' סיון, ווען עס גייט פארקומען א פראכטפולער גרויסארטיגן 'שמחת הבר מצוה' פאר 56 טייערע בחורים'לעך, אינעם ריזיגן און הערליכן זאל 'בניני האומה' אין ירושלים עיה"ק, מיט'ן באטיילוגונג פון זייערע נאנטע משפחה-מיטגלידער, די פערזענליכע בני-מלכים באגלייטער, אין שפיץ פון פילע אדמורי"ם און גדולי ומנהיגי יהדות החרדית בארה"ק.

אין די פארלאפענע תקופה איז פארגעקומען מערערע הכנה-מאמענטן צום ריזיגן בר-מצוה, אנגעהויבן פון גאר א רירנדער 'יום הכנה' צו זייער גרויסן טאג, ווען די לעכטיגע יתומים'לעך זענען געקומען זיך באטייליגן, יעדער מיט זיין פערזענליכן מחנך וועלכער שפאנט מיט אים האנט ביי האנט דורכאויס יארן.

דער טאג האט זיך געעפנט מיט א באזוך אין הויז פון כ"ק הגה"צ רבי נפתלי הערש ראטנבערג שליט"א אב"ד קאסאן בית שמש, וועלכער איז דער נשיא פונעם הייליגן ארגעניזאציע און באגלייט טריט און שריט די אלע פעולות הקודש. דער רב שליט"א האט דערהויבן די בחורים'לעך מיט פייערדיגע דברי-חיזוק, זיי פארטיילט א ספעציעלע קונטרס פון 'הלכות תפילין' און אנגעווארעמט יעדנס הארץ מיט פילע חיזוק-דימאנטן צום גרויסן טאג.

נאכדעם זענען די בר-מצוה חתנים געפארן קיין ירושלים עיה"ק, וואו זיי האבן באזוכט א תפילין-פאבריק, מיטהאלטנדיג פונדערנאנט יעדן שטאפל פונעם פראדוציע, מיט דעטאלירטע ערקלערונגען און אינטערעסאנטע שילדערונגען וואס האט גאר שטארק איבערגענומען די יונגע הערצער.

די טרערן פונעם פוסק הדור

אין יענע טעג זענען די קינדערלעך ארויף באזוכן למעון הקודש פון פילע אדמורי"ם וצדיקים, גדולי הדור און מנהיגי יהדות החרדית בארה"ק, וועלכע האבן באגאסן די קינדער מיט לעילא-ולעילא'דיגע חיזוק-רייד און התרגשות'דיגע הכנה-שמועסן צו זייער ליכטיגן טאג, אז זיי זאלן מקבל זיין אויף זיך דעם עול התורה והמצוות מיט'ן פולסטן שמחה וטוב לבב.

דער הויכפונקט האבן די חתנים מיטגעהאלטן בקודש פנימה פון מרן פוסק הדור הגאון האדיר רבי משה שטערנבוך שליט"א מרא דארעא קדישא, ווען די בחורים'לעך האבן געלאדנט דעם פוסק הדור צום גרויסארטיגן מעמד הבר מצוה. דער גאון וצדיק האט זיך גענומען שמועסן מיט יעדן פערזענליך, זיי אויסגעפרעגט איבער די לימודים און איבער זייערע געפילן לקראת דעם גרויסן בר-מצוה טאג.

און דא האט פאסירט עפעס וואס האט קיינעם נישט איבערגעלאזט מיט א טרוקן אויג: דער פוסק הדור האט זיך גענומען רעדן מנהמת לבו הטהור ווען הייסע טרערן דערשטיקן דעם גאון'ס רייד: "טייערע קינדער. אויך איך בין געווען א יתום!... ווער נאך ווי מיר קען ענק פארשטיין!...". און דער גאון אדיר שליט"א האט פארגעזעצט מיט דברי חיזוק, ווי וויכטיג צו אנקומען צום טאג מתוך שמחה, די אחריות וואס ליגט אויף יעדנס פלייצע, און ווי הייליג און טייער איז ווען מ'איז זיך מתגבר אויף אלע שווערקייטן, און דווקא פון אט דעם ווייטאג קען מען פיל מער שטייגן!, דער פוסק הדור האט אונטערגעשטראכן: "כאטש די ביטערן פארלוסט, פארמאגט יעדער איינער א ספעציעלע סייעתא דשמיא!", און ער האט אויסגעפירט: "איך זאג ענק צו אז דער באשעפער שטייט נעבן ענק און באגלייט ענק אויף טריט און שריט!".

דאן האט דער פוסק הדור אנגעוואונטשן יעדן מיט הויפענעס ברכות פון הארצן טיפן, צום גרויסן טאג און אויף די צוקונפטיגע ישיבה-יארן. אין ציגאב האט דער גאון קאכעדיג אנגעוואונטשן די הייליגע ארגעניזאציע 'זה לזה' מיט אירע חשוב'ע עסקנים, און די דערהויבענע מחנכים וועלכע זענען די רוקן-ביין פאר די קינדערלעך זייט דעם גרויסן פארלוסט רח"ל. דער גאון האט דאן אנגעהויבן זינגען דעם 'אני מאמין... בביאת המשיח', און אנגעוואונטשן די זילבערנע בעכערס וואס די חתנים גייען באקומען ביים גרויסן בר-מצוה.

הכנה לבר מצוה

די פילע גדולי הדור פון אלע שיכטן און קרייזן האבן צוגעלייגט נאך און נאך ברכות און חיזוק-שמועסן אלס דרשה-געשאנק פאר די בר-מצוה חתנים, צווישן זיי כ"ק האדמורי"ם מראחמסטריווקא, נדבורנא, פינסק קארלין, אלכסנדר, ביאלא, דאראג, לויצק שליט"א; און מרנן ורבנן גדולי הדור הגאונים האדירים רבי דוב לנדוי, רבי ברוך-דוב פאווארסקי, רבי משה הלל הירש, רבי מנחם צבי בערגמאן, שליט"א, און נאך פילע אדמורי"ם ורבנים פון אלע שיכטן און קרייזן.

אין די לעצטיגע חדשים הארווען די בחורים, יעדער מיט זיין פערזענליכער מחנך, צו מסיים זיין א גאנצע מסכתא אויפ'ן גרויסן בר-מצוה. אויך לערנען זיי 'הלכות תפילין' און גרייטן זיך דעם 'פשעטל' מיט פול עקסטאז און התרגשות, ווען איינע פון די הויכפונקט פונעם גרויסארטיגן מעמד וועט זיין נאך די אלע סיומים, ווען די צענדליגע קינדער וועלכע זיך אינאיינעם אויפשטעלן זאגן דעם 'קדיש יתום', ווען די שכינה הק' און די גאנצע פמליא של מעלה, וועלן זיך מיטפרייען פון אויבן צוזאמען מיט זייערע חשוב'ע' עלטערן אין גן עדן.

עליונים ששו ותחתונים עלזו בקבלת יום זה 56 חתנים עול תורה ומצוות!