האדמו"ר מראחמיסטריווקא קורא שם געווען פאר די נייע יונגל קעמפ "מחנה אהל יצחק", ביים מעמד יסוד איתן נעכטן מיטוואך:

הונדערטער אידן חסידי וידידי בית ראחמיסטריווקא האבן זיך נעכטן אויפדערנאכט פארזאמלט ברוב עם הדרת מלך אין די נייע פראכטפולע הייטנער זאל אין בארא פארק, ביים גרויסארטיגן מעמד יסוד איתן פאררופן דורך כ"ק אדמו"ר מראחמיסטריווקא שליט"א, אוועקצושטעלן א יסוד און א פעסטע שטאנד פאר די נייע יונגל קעמפ וואס ווערט געבויעט לשם ולתפארת אין גרינפיעלד פארק ניו יארק.

ביים מעמד האט כ"ק אדמו"ר מראחמיסטריווקא שליט"א אויפגעטרעטן מיט דברות קודש, און דערביי קורא שם געווען פאר די נייע קעמפ "מחנה אהל יצחק ראחמיסטריווקא", לשמו ולזכרו פון זיין גרויסן פאטער דער אומפארגעסליכער רבי'ן כ"ק אדמו"ר הרה"ק מראחמיסטריווקא זי"ע, וועלכער האט נאך פערזענליך געוואונטשן ווארעמע ברכות צום גרינדונג פון די נייע יונגל קעמפ.

אויך האבן אויפגעטרעטן דער יושב ראש המעמד הרב מאיר מרדכי בערקאוויטש שליט"א, און דער מנהל המוסדות הרב משה יהושע קרעמער שליט"א. אויפן אויבן אן האבן זיך אנגעזעהן די ברידער כ"ק האדמורי"ם מראחמיסטריווקא וויליאמסבורג און לינדען שליט"א.

צום שלוס פונעם מעמד זענען אלע חסידים אריבער ביים רבי'ן איבערגעבן די התחייבות און שטרי קבלה, וואו עס איז אריינגעקומען די פאנטאסטישע סומע פון צוויי מיליאן דאללער צו קענען פאראויסגיין מיט די מלאכת הבניה אויף א שנעלע פארנעם.