פילע הצלה וואלונטירן און פייערלעשער זענען אין איילעניש אנגעקומען צו די סצענע פון א שרעקליכע עקסידענט וואס האט פאסירט אין מאונטינדעיל אויף די גאר געדרייטע טשערטש ראוד, וואו א קאר מיט צוויי אידישע פאסאזשירן האט זיך איבערגעדרייט און אראפגעגליטש צו די זייט פון די ראוד און אויפגעריסן אין העלישע פלאמען.

זיי האבן גלייך אנגעהויבן צו פארלעשן די פלאמען און פראבירט צו ראטעווען די רייזענדע, נאך עטליכע מינוט איז ליידער קלאר געווארן דאס ארגסטע, אז ביידע רייזענדע זענען ליידער נפטר געווארן אויפן ארט די צוויי אידן וואס זענען ל”ע נפטר געווארן אין די שוידערליכע עקסידענט די נאכט אין אפסטעיט ניו יארק, זענען האברך ר׳ ישראל שלום אשרי ע”ה (27) מחסידי בעלזא אין בארא פארק, זוהן פון הרה"ח ר’ יעקב ברוך אשרי פון מאנסי, און האברך ר׳ ישראל מענדל וויינבערגער ע”ה (28) מחסידי סאטמאר אין בארא פארק, זוהן פון הרה"ח ר’ משה וויינבערגער פון וויליאמסבורג.

די לויה פון ר' מענדל וויינבערגער ע"ה, וועט פארקומען אין קרית יואל אום 11:30 פארמיטאג ביי די ביה"ח.

די לויה פון ר' ישראל אשרי ע"ה, וועט פארקומען אום 12:45 פארמיטאג ביי ביהמ"ד בעלזא אויף די 39'סטע סטריט אין בארא פארק, דערנאך אין מאנסי ביי ביהמ"ד בעלזא אויף מעיפל טערעס, ווי ער וועט דערנאך קומען לקבורה אין די ביה"ח הר שלום אין עירמאנט.

מי שאמר לעולמו די יאמר לצרתינו די, יה”ר שלא ישמע עוד שוד ושבר בגבולנו ושנשמע ונשבשר בשורות טובות.

קרעדיט: זעמל