ירושלים-מיט געהויבענע געמיטער האבן בני י-ם בכלל און חסידי ואוהדי בית פשעווארסק בפרט געהאט די געלעגנהייט מיטצוהאלטן דעם פארגאנגענעם שבת פר' וירא א שיינע 'שבת של שמחה' ווען ס'איז אפגעראכטן געווארן די שמחת הברית פאר א נין ונכד הצדיקים לבית פשעווארסק זי"ע א זון ביי הרב דוד יצחק רייך שליט"א בן הרה"צ ר' נפתלי אלימלך שליט"א מו"ל 'כתבי קודש' פשעווארסק נכד כ"ק אב"ד בית משה אהרן פשעווארסק שליט"א, איידעם ביי הרה"צ ר' מנחם בנציון זעגעלבוים מוויען י-ם חתן הגה"צ ר' יושע ראזענבערגער שליט"א גאב"ד קרית רמ"א וחבר ביד"צ העדה"ח. לכבוד די שמחה האט זיך מטריח געווען דער גרויסער עלטער זיידע בטילטולא דאורחא כ"ק אב"ד במ"א פשעווארסק שליט"א און געקומען צו פארן באשיינען די שמחה טראץ חולשת גופו, ווי עס האבן אים מקבל פנים געווען ידידיו ומעריציו בארה"ק, די אכסניא איז געווען בבית הרה"ג ר' מנחם מענדל ווייס שליט"א ר"י אושפיצין וואס געפונט זיך הארט נעבן ביהמ"ד וישיבה אושפיצין בעיה"ק ת"ו, וואס דארט איז פארגעקומען די תפילות אין טישן דעם גאנצן שבת ווי אויך די שמחת הברית. באלד ביים ערשטן טאג פונעם אנקום פון דעם חשובן גאסט האט זיך אנגעזעהן א פארקער פון חסידים ואנשי מעשה וואס זענען געקומען נהנה זיין מאורו הגדול וועלכער איז שטענדיג דולה ומשקה מתורת אבותיו ורבותיו און בפרט האבן זיך מסתופף געווען בצלו בחורי חמד יוצאי חו"ל הלומדים בארה"ק, דאנערשטאג נאך שחרית איז דער רב שליט"א מכובד געווארן מיט סנדקאות ביי א אייניקל פין הגאונים הצדיקים גאב"ד ראדומישלא זצ"ל און ר"י טשעבין זצ"ל, אויפדערנאכט איז פארגעקומען א קבל"פ אין היכל צאנז שע"י ישיבת אושפיצין. השבת נועם הנשמות. א הערליכער שבת איז אפגעראכטן געווארן דורכן רב שליט"א בקרתא דשופרייא, פרייטיג צו נאכטס האבן זיך באטייליגט א ריזן ציבור מבני ציון היקרים וועלכע זענען זיך געקומען משתתף זיין ביי די תפילות און שמחת השלום זכר – וה'וואך נאכט, דער רב שליט"א האט געפראוועט סעודת שבת מיט די בחורים בבית האכסניא און ארום צען אזייגער אריין געקומען אין היכל צום באטע ווי מען האט פארברענגט מיט זמירות ותשבחות בנוסח פשעווארסק און מען האט געהערט פונעם רב שליט"א דברי תורה וסיפורי צדיקים, שבת אינדערפרי נאך שחרית איז פארגעקומען די שמחת הברית ווי דער היכל איז געווען מלא על גדותיו מן הקצה אל הקצה, מיט סנדקאות איז מכובד געווארן דער עלטער זיידע די רב שליט"א, מיט ברכות דער זיידע הרה"צ ר' נפתלי אלימלך שליט"א, און מיט סנדק מעומד דער זיידע הרה"צ מוויען י-ם שליט"א, ויקרא שמו בישראל 'זיידא שמואל שמעלקא' ע"ש דעם עלטער זיידן פונעם רך הנימול כ"ק אדמו"ר מביטשקוב זצ"ל, ביים סעודת עתיקא קדישא וסעודת הברית האט מען געהערט שיינע דברי תורה וברכה לכבוד די שמחה פון הרה"צ מוויען י-ם און פון הרה"ג ר"י אושפיצין, און צום לעצט פונעם גרויסן עלטער זיידע דער רב שליט"א וועלכער האט מיט געשטיקטע טרערן ארויס געברענגט די אויסטערלישע הרגשים אז ער האט זוכה געווען מיטצוהאלטן דאס ערשטע מאל א שמחת ברית ביי א דור רביעי בן אחר בן, ובפרט געגעבן א שבח והודאה פאר הקב"ה נאך די שווערע תקופה וואס ער איז אריבער פאריאר נישט מער געדאכט, אויספירענדיג מיטן פסוק עד הנה וכו'. ביי של"ש האבן זיך אויך באטייליגט א שיינע ציבור, הגה"צ ר' יצחק פינטער אב"ד ביקאווסק ב"ב האט אויפגעטראטן מיט דברי תורה וברכה לכבוד די שמחה און באגריסט דעם חשובן גאסט ארויסברענגענדיג די ליבשאפט און נאנטקייט וואס ער האט גענאסן ביים גרויסן שווער און ביים זיידן הצדיקים לבית פשעווארסק זי"ע. מוצש"ק איז דער רב שליט"א אריבער געגאנגן באשיינען ביי דעם באקאנטן 'קערעסטירער מלוה מלכה' ווי ארום טויזנט בחורי חמד מעיה"ק ומחו"ל באטייליגן זיך, דער רב שליט"א וועלכער איז באקאנט מיט זיין הכנסת אורחים און מעשי צדקה וחסד אויפן קערעסטירער שטייגער האט באלד אנגענומען די בקשה פון די אנפירער פין די מלו"מ טראץ די שווערע טרחה, דער רב האט פארציילט עינינים פון הייליגן ר' ישעי'לע זי"ע און געווינטשן ברכתו פאר אלע באטייליגטע, דערנאך פארטיילט קנאבל לסגולה פאר די הונדערטער בחורים, פון דארט איז דער רב אריבער געגאנגן צום ביהמ"ד פשעווארסק בעיר ה' שמה אויף די פערזענדליכע איינלאנדנונג פון הנהלת הביהמ"ד ווי ער האט באשיינט די מלוה מלכה וואס ווערט געפראוועט וועכנטליך בנוסח פשעווארסק ווי דער רב האט פארטיילט קנאבל און פארציילט ספורי צדיקים, דערנאך האט ער אפגעראכטן א געהויבענע מלוה מלכה אין היכל צאנז שע"י אושפיצין מיט די באטייליגונג פון א גרויסע ציבור חסידים ואנשי מעשה וואס האבן געשלונגען מיט דארשט די דברים ערבים וואס מען האט געהאט די זכי' מקבל צו זיין פונעם גרויסן גאסט כמים קרים על נפש עיפה, בפרט זכרונות פון די לעכטיגע פארגאנגנהייט בצל חותנו וזקינו הק', וואס האט זיך פארצויגן ביז אחר חצות הלילה. זינטאג האט זיך דער רב שליט"א ארויסגעלאזט צום שטאט קרית גת מנחם אבל זיין ביי זיינע מחותנים לבית קרעטשניף, אויפן וועג צוריק זיך האט מען זיך אפגעשטעלט פוקד זיין ציון הק' פין הרה"ק מבעלזא זי"ע אויפן הר המנוחות, ב'משכ'ן טאג האט דער רב שליט"א אויפגענומען דעם ציבור וואס זענען געקומען לברך ולהתברך, ווי אויך זענען אריבער געקומען באזוכן כ"ק אדמו"ר מלעלוב ניקלשבורג און הגרי"מ מארגענשטערן שליט"א, ווי עס איז פארפירט געווארן שיינע שמועסן בד"ת וסיפורי צדיקים, שפעטער אויפדערנאכט איז פארגעקומען די סעודת שלישי למילה ומסיבת פרידה ווי מען האט זיך געזעגנט מיטן רב שליט"א, מאנטיג פארטאגס איז דער רב צוריק געפארן לביתו נאוה קיין אנטוורפען איבערלאזענדיג השפעות און ברכות פונעם געהויבענעם באזוך. כשם שנכנס לברית כן יכנס לתורה לחופה ולמעש"ט.