א גאר רירנדער און היסטארישע אווענט איז פארגעקומען פארגאנגענעם ליל שישי פר' משפטים באולם החדש אין בארא פארק, ווען עס האבן זיך פארזאמלט א ריזן ציבור חסידי ותלמידי ואוהדי כ"ק מרן הגה"ק מקאסוב זצוק"ל כדי צו הערן, זען, פארשטיין און זיך באקענען מיט די פאנטאסטישע רוחניות'דיגע אוצרות וואס דער הייליגע רבי זצוק"ל האט איבערגעלאזט, און טוהן כל טצדקי שבעולם ממלא צו זיין שאיפתו ובקשתו הקדושה מפיץ צו זיין דברי תורתו וואס טוט אנווארימען און אויפפלאקערן אומצאליגע אידישע הערצער אומעטום לעבודתו יתברך שמו.

דער וואונד איז נאך זייער פריש, דער ווייטאג גליעט און ברענט נאך אין אלע ביינער, און דער ריזיגער שווארצע חלל שרייט נאך ארויס פון די טיעפענישן פון הארץ. עס קען זיך נאך נישט גלייבן דער ביטערע מציאות אז דער הייליגער קאסובער רבי זצוק"ל איז אזוי פריצייטיג נתבקש געווארן לישיבה של מעלה אין דעם ביטערן טאג כ"ג סיון תשפ"ד. טויזנטער אידן, תלמידים וחסידים ושומעי לקחו קענען נישט צוזיך קומען פון די שרעקליכע אבידה, מ'קען זיך נישט טרייסטן נאך אזא פארלוסט.

אבער אין איין זאך קען מען זיך נאך אנכאפן, דאס זענען די ריזיגע זאפאסן און אוצרות פון חידושי תורה וואס דער הייליגע רבי האט איבערגעלאזט, צענדליגע טויזנטער כתבי ידות מיט חידושים וביאורים בכל מקצועות התורה ומכמני החסידות, און טויזנטער רעקארדירונגען פון דרשות און שיעורים וואס זענען געזאגט געווארן במשך די יארן, וואס דאס אלעס קען מען ממשיך זיין מפיץ צו זיין און פארשפרייטן און מחיה זיין אומצאליגע נפשות בישראל וואס לעכצן און דארשטן צו לערנען מתורתו של רבינו זי"ע.

נאך בחייו פון דעם רבי'ן זצוק"ל איז נתייסד געווארן דער מכון "שפה ברורה" מיט'ן ציל ארויסצוגעבן דברי תורתו ומשנתו הטהורה. במשך די יארן האט שוין דער מכון ארויסגעגעבן א שיינע פאר ספרים ווי צוויי בענדער "שבת מלכא קדישא", צוויי בענדער "עבדא דמלכא" אויף עבודת התפילה, "מעיינא דמלכא" ח"א, "עבדא דמלכא" אויף ירח האיתנים ועוד, און צוגאב צו פילצאליגע גליונות און קונטרסים וואס זענען נתקבל געווארן בכל תפוצות ישראל מיט א חיבה יתירה, אצינד ווען דער רבי איז שוין ליידער נישטא מיט אונז וויל מען ממשיך זיין ביתר שאת וביתר עוז ארויסצוגעבן די אומשאצבארע אוצרות וואס דער הייליגע רבי האט איבערגעלאזט.

ביי דעם היסטארישן "ליל התגלות" פארגאנגענעם ליל שישי האט מען צום ערשטן מאל פארגעשטעלט פאר'ן ברייטן ציבור אן אפס מעט פון די ריזיגע אוצרות וואס דער רבי האט איבערגעלאזט, און עס איז באטאנט געווארן ווי שטארק עס איז געגאנגען בחייו פון דעם רבי'ן זצוק"ל אז זיינע ווערטער זאלן פארשפרייט ווערן, עס האט פאר'ן רבי'ן געברענט אז יעדער איד באשר הוא שם זאל פארשטיין און באגרייפן און אנערקענען ווי א שטארקע חשיבות זיין עבודה האט ביים אייבערשטן, און עס איז אונזער פליכט ממלא צו זיין רצון קדשו און דערמיט מקרב זיין טויזנטע הערצער לעבודתו יתברך שמו.

דורכאויס דעם מעמד האבן אויפגעטרויטן דער באקאנטע ראש המדברים בכל מקום מוה"ר ר' מאיר מרדכי בערקאוויטש הי"ו, דעם רבי'נס זוהן יבלחט"א הגה"צ רבי אהרן שליט"א, נשיא מכון "שפה ברורה", דעם ברודער פונעם רבי'ן זי''ע יבלחט"א הגה"צ אדמו"ר מ'זאלישטשיק שליט"א, דער יו"ר המכון ואיש סודו פון דעם רבי'ן הרה"ח ר' מאיר גאדינגער שליט"א, און כ"ק האדמו"ר מקאסוב שליט"א האט אויפגעטרויטן מיט דברי ברכה, צום שלוס איז אויפגעשפילט געווארן א רירענדיגע פרעזענטאציע צייגענדיג די אוצרות כתבי קודש פונעם רבי'ן זי''ע און די פלענער פון די מכון אויף די קומענדיגע תקופה .

דורכאויס דעם מעמד האבן די מאסן באטייליגטע אויסגעדרוקט זייער גרייטקייט און זיך געלאזט קאסטן ממון ודמים כדי אז דער הייליגער מכון זאל אנגיין ווייטער מיט די עבודת הקודש מזכה צו זיין כלל ישראל מיט די ריזיגע אוצרות, און דערמיט ערפילן דעם רבי'נס הייליגע רצון און האפענונג.

תורתו מגן לנו ומאירת עינינו, הוא ימליץ טוב בעדינו, אמן