עס האט זיך געשפירט ווי פארצייטנס, ממש ווי אין גאליציע אין די תר"פ יארן, ווען עס האבן זיך צוזאמגענומען די צענדליגער גבאי קודש פון רבי מאיר בעל הנס כולל חיבת ירושלים, אלס הכנה דרבה צום יערליכן דינער הבעל"ט.

יא, פארצייטנס. ממש אזא געפיל.

כולם כאחד זענען געקומען מיט בלויז איין ריינע און הייליגע ציל, אויפצוהייבן דעם קרן פונעם מסורה'דיגע פושקע, העכער און העכער, שטערקער און בעסער.

די גבאי קודש זענען געווען כאיש אחד בלב אחד מיט א פלאם פייער פאר דעם הייליגן פושקע, און כסדר מטכס עצה געווען וויאזוי צו ברענגען נאך א דאלער לטובת עניי ירושלים עיר הקודש, און נאך א פרוטה צו לייגן אויף אן ארץ ישראל'דיגע קינדער-געבענטשטע טיש, אט-דאס האט זיך אנגעזען פארגאנגענעם דינסטאג בחקותי אינעם ספינקא זאל אין בארא פארק.

בראש וראשון האט מען געהאט די זכיה צו הערן דברי פי חכם חן פונעם מנהל הכולל הרה"ג רבי בעריש רובין שליט"א מדאמבראווא, וועלכער האט באדאנקט דעם גרויסן ציבור גבאים המשתתפים, ארויסברענגנדיג דעם הייליגן ציל פונעם נאכט, און איבערגעבנדיג ערשט-האנטיגע געשיכטעס איבער די גרויסקייט און אויפטוען פון דעם הייליגן פושקע, וואס ווערט טאקע געפירט דאהי אין ניו יארק, אבער אירע השפעות פילן זיך אין די ירושלימ'ער לויטערע הייזקעלעך.

הרה"ג רבי יעקב ישראל ישורון רובין שליט"א מגלאגוב האט אויפגעפלאמט דעם ציבור מיט התחזקות, ארויסברענגנדיג די חשיבות פון א גבאי צדקה, און ספעציעל א גבאי קודש פאר חיבת ירושלים, וואס אונזערע רבי'ס למעלה בקודש האבן אזוי אריינגעפלאמט דערין. ער האט ארויסגעברענגט אז דייקא די שווערע ארבעט מיינט אז מען טוט א הייליגע זאך, און ווען די הייליגע פליכט גייט נישט אזוי געשמאק זאל מען וויסן ווי גרויס עס איז די עבודה אין הימל, און דערפאר לייגט דער יצה"ר אונטער שטיקלעך דאס צו שטערן.

דערנאך האט הרב בנימין וואלף ענגלענדער שליט"א ראש הגבאים בעיר וויליאמסבורג, אויפגעטראטן מיט גאר קלארע און וויכטיגע יסודות צו וויסן און מיטנעמען פאר די עסקנות לטובת די דינער, ארויסברענגנדיג קריסטאל-קלאר גאר שטארקע נקודות, ווען, און וויאזוי צו רופן איינלאדענען, און אלע אנדערע עסקנות איידערן און בשעת'ן דינער.

דער גרויסער ציבור פון צענדליגער גבאי קודש, פון פילצאליגע קהילות קדושות, האבן פארלאזט דעם זאל, מיט א הערליכע מתנה אויפן וועג ארויס, אנגעשלאסן מרבה צו זיין בדבר חסד וצדקה פארן הייליגן מסורה'דיגן פושקע, אצינד פארן דינער און אלעמאל למען יעמדו ימים רבים.

גאנץ בארא פארק איז ארומגענומען מיט א פייער פון התרגשות צום בעפארשטייענדען דיננער דעם דאנערשטאג אור לר"ח סיון אין די זאלן פון עטרת גאלדא, ווי מ'וועט זיך צוזאמנעמען בהתאסף ראשי עם יחד שבטי ישראל, ווייטער צו טראגן אונזער הייליגער מסורה 'מדור לדור' און שטיצן מיט א ווארעם הארץ דעם הייליגען צדקה בגוף ובממון, און איינוועגס זוכה זיין צו די אלע אויסטערלישע הייליגע ברכות והשפעות וואס קומען מיט דעם.

אהבת ציון אל תשכח לנצח.