גרויס התרגשות און התרשמות ביי כלל חסידי בעלזא אין בארא פארק נאכן פראווענען דעם שבת אינאיינעם מיט הרה"ג ר' שלום רוקח שליט"א - עלטסטן אייניקל פון כ"ק האדמו"ר מבעלזא שליט"א וואס איז צו גאסט אין אמעריקא לטובת די קרן הבנינים פאר די ישיבות גדולות אין ארץ ישראל - פאר די הונדערטע נייע בחורים וואס פארן ארויף לערנען, און מען איז געצווינגען צו קויפן און בויען נייע בנינים יעדעס יאר.

תפילת שחרית שבת קודש אינדערפרי האט די אורח הכבוד שליט"א געדאוונט אינאיינעם מיט די קרוב צו 400 תלמידי הישיבות קטנות דחסידי בעלזא בארא פארק און די ראשי ישיבות ומגידי שיעור אינעם פראכטפולן חדר אוכל פונעם נייע תלמוד תורה, ווען נאכן דאווענען איז געפראוועט געווארן א קידושא רבא, ווי די בחורים האבן געהערט דברי חיזוק והדרכה באגלייט מיט ניגוני שבת קודש.

צו מנחה ושל"ס זענען זיך צאמגעקומען אינעם ריזן זאל דעם אולם הגדול בתוך בנין התלמוד תורה קרוב צו צוויי און א האלב טויזנט כלל חסידי בעלזא פון שטאט, רבנים ודיינים ומורי צדק, זקני החסידים ואברכים, הונדערטע בחורים און קינדער, ווי אלע איינאיינעם זענען זיך צאמגעקומען זיך צו דערהייבן און דערווארעמען, שעפן חיזוק און כח אויף ווייטער.

די תורה ביי של"ס איז געהערט געווארן אויף א מייק נאכן בענטשן צו ערלויבן די טויזנטע באטייליגטע צו קענען גוט הערן דעם דבר ה' מירושלים.

עס איז צו אנמערקן, אז אזא של"ס צאמקום איז שוין לאנג נישט געווען ווען אלע אינאיינעם קומען זיך צוזאם תחת קורת גג אחד צו זינגען צוזאמען און הערן דברי התחזקות והתעלות.

יהא בואו לברכה ולחיזוק