אין אן אויפוואכונג בשדה הסת"ם איז אפגעהאלטן געווארן אן אסיפת רבנים אין ליכט פון די לעצטיגע פראבלעמען בנוגע דאס כשרות פון אסאך ספרי תורות וואס ווערן באנוצט אין פילע היימישע בתי מדרשים, צוליב פארשידענע פאקטארן וועלכע לייגן אונטער פראגע צייכן דאס כשרות דערפון.

ביים אסיפה וואס איז פארגעקומען אין מאנסי, האבן זיך אנגעזען די רבנים ודיינים פון פילע קהילות און גרעסערע שולן, צווישן זיי הרבנים הגאונים פון באבוב, באבוב-45, בעלזא, וויזניץ, סקווירא, פאפא, קהילות סאטמאר, צאנז, צאנז-קלויזנבורג, ראחמיסטריווקא און נאך פיל חשוב'ע רבנים ומורי צדק היושבים על מדין.

די החלטות האסיפה זענען אדרעסירט געווארן דורך הרה"ג רבי אברהם הערש וואזנער שליט"א אב"ד סאטמאר מאנסי און דער רב פון וועד משמרת סת"ם בארה"ב, הרה"ג רבי משה קעסלער שליט"א מדייני וויזניץ מאנסי ומרבני הוועד און הרה"ג רבי יצחק שפיטצער שליט"א מדייני שיכון סקווירא ומרבני הוועד.

עס גייט לתיקון הענין ווערן אוועקגעשטעלט א פאראייניגטע "פיקוח ספרי תורה דקהילות הקודש" וואס וועט זיין אונטערן אויפזיכט פונעם וועד משמרת סת"ם וואס הגר"ש וואזנער זצ"ל בעל שבט הלוי האט אוועקגעשטעלט אין ארץ ישראל און אין אמעריקע.

די רבנים ודיינים האפן אז מיט'ן כח הרבים וועט מען זיך בעז"ה קענען אן עצה געבן מיט דעם וואקסנדן ספרי תורות פראבלעם, וואס איז היינט צוטאגס א ריזיגע מסחר און האנדל מארקעט אין ארץ ישראל און אין אויסלאנד, אבער עס פעלט איבערזיכט.