"באחד באדר משמיעין על השקלים" - א פראכטפולער דינער לטובת מוסדותיו הקדושים פון המקובל הרה"צ המשפיע רבי יצחק משה ערלאנגער שליט"א - "בית ועד לחכמים" אין שטאט אשדוד.
דער פראכטפולער דינער פאר דער אויפהאלטונג פון דעם בית המדרש צו פארשפרייטן פנימיות תורה על דרך החסידות, איז דורכגעפירט געווארן מיט גרויס פראכט אין דעם היכל פון בית המדרש אויף רבא גאס אין שטאט אשדוד יצ"ו. באטייליגט האבן זיך רבנים און מורי הוראה פון שטאט, בני הקהילה, און באטייליגטע פון די פילע שיעורים, תלמידים פון הרב הצדיק המשפיע שליט"א.
די פילע באטייליגטע האבן אויפגעהויבן זייער הארצנס נדבה אין ערב ראש חודש אדר ווען מען פלעגט משמיע זיין על השקלים, דאס נאכדעם וואס אין די לעצטע יארן איז דער היכל פון בית המדרש פארברייטערט געווארן לשם ולתפארת, און דער ארט איז פול מיט שיעורי תורה ותפילה אין די וואכן טעג און שבתים, און באזונדערס אום זונטאג יעדע וואך ווען דער משפיע הרה"צ שליט"א קומט אין שטאט געבן שיעורים, אין צוגאב צו די הייליגע שבתים און ימים-טובים וואס ער דערהויבט אין דער שטאט.
די פארזאמלונג איז געפירט געווארן מיט גרויס טאלאנט דורך הרב עזריאל בורזקובסקי שליט"א. ראש ישיבת פיטסבורג, דער משפיע הרה"צ רבי יעקב לייפער שליט"א, האט באגייסטערט דעם עולם מיט זיינע אנגענעמע ווערטער וועגן דער גרויסקייט פון אויפהאלטן אזא הייליג ארט וואס לייכט אויף דער גאנצער שטאט פאר אלע קרייזן און עדות, און זיין מעכטיגע השפעה אויף די אברכים דורך פארבינדונג מיט מרן דעם הייליגן בעש"ט הק' און זיינע הייליגע תלמידים אין אלע דורות.
דער הויכפונקט פון דעם דינער איז געווען די הייליגע רעדע פון הרה"צ המקובל המשפיע שליט"א, וואס האט געהאלטן א פלאם-פייערדיגע רעדע וועגן דער מעלה פון זיך פארנעמען מיט פנימיות התורה אויפן וועג פון חסידות, וואס זיין ציל איז צו דערהויבן דעם מענטש אין עבודת השם דורך חברים געזעלשאפט.
די חשובע נדבנים האבן זוכה געווען דורכצוגיין פאר א ברכת הקודש און באקומען א פלאש וויין פערזענלעך פון הרה"צ המשפיע שליט"א.
די פארזאמלונג האט פארענדיגט דער גרויסער גאון רבי אהרן שפירא שליט"א, רב פון "פרדס כץ" געגענט אין בני ברק, מיט ווארעמע ברכה ווערטער צום הייליגן עולם אין שפיץ פון ידידו וריעו הרה"צ המשפיע שליט"א.
גאלערי
