- א מקום קדוש לתפילות ישראל לישועות ורפואות במשך א גאנץ יאר, באזונדערס אין טאג פון ג' תמוז –

קווינס ניו יארק. - ביים מאנטעפיארי בית החיים, וואו עס געפינט זיך דער אוהל פון כ"ק אדמו"ר מליובאוויטש זי"ע - בעל ההילולא פון ג' תמוז קומענדיגן דינסטאג חקת - ווירבעלט מיט פילע צוגרייטונגען און ספעציעלע איינריכטונגען. דאס איז א ריזיגער אונטענעמונג אויף צו קענען צושטעלן דעם פולן נויטיגן ארדענונג פאר די רבבות אידן וועלכע קומען בהאי יומא זיך משתטח זיין על ציון האי צדיק ומנהיג ישראל. 

באזונדערס איז עס ג' תמוז אן אלוועלטליכן צוזאמפאר פון צענדליגער טויזענטער אידן פון אלע שיכטן און קרייזן וועלכע קומען אהין אויסבעטן אלעס גוטס.

עס איז מערקווירדיג דא צו ציטירן פון א פלייער נאר-וואס ערשינען אינאיינעם מיט א מודעה פון טרענספערטעישן צום ציון אין טאג פון יארצייט. דארט ווערט געברענגט וואס דער צדיק גאון וחסיד רבי משה וואלפסאן זצ"ל וועלכער איז די טעג נסתלק געווארן, האט געזאגט פאר א איד - זייענדיג אין א"י - ווען יענער איז געקומען אהין צו מתפלל זיין פאר א ישועה. 

רבי משה האט אים דאן געזאגט: 'היינט צו טאג איז דער ציון פון ליובאוויטשער רבי'ן דער מקום תפילה אויסצו'פועל'ן ישועות'. ווי אין אנדערע ווערטער באטאנט: אז ער וואלט ווען אויך אין אמעריקע געקענט גיין מתפלל זיין און אויסבעטן זיין ישועה.

אין יענעם פלייער, ווערט אראפגעברענגט אייניגע - פון צווישן טויזענטע אזעלכע - סיפורים פון ישועות וואס אידן זעען כסדר ביים אוהל פון ליובאוויטשער רבי'ן זצ"ל. מיר ברענגען עס אראפ ככתבם וכלשונם:

פארוואס זענט איר געקומען?

ב. וואקסבערגער (פון מלכות וקסבורגר) ארבעטנדיג דאן ביי ר' שלו' מרדכי רובאשקין הי"ו אין פוסטוויל, האט ל"ע יארן נישט געהאט קיין קינדער. נאך א קייט פון פילע מעדיצינישע פראצעדורן האט ער געהאט באקומען אן אפוינטמענט ביי א מומחה גדול מעבר לים, אבער ר' שלום מרדכי זאגט אים: פארוואס נישט גיין צום "מומחה הגדול מכולם" - פארט צום ציון פון רבי'ן!

הוא וב"ב זענען געפארן און דארט מתפלל געווען; אבער דאך נישט מוותר געווען אויך דערנאך צו פליען צום גרויסן פראפעסער. אנקומענדיג אהין זאגט זיי דער דר. - נאך א געוויסן טעסט - פארוואס זענט איר דא געקומען ווען איר זענט שוין געהאלפן?...

*

ער רופט שפעט ערב ראש השנה

הרב לייבוש לאנגער שליט"א איז אין אן ערב ר"ה געווען ביים ציון פון ליובאוויטשער רבי'ן זצ"ל. ער האט געשריבן א קוויטל בעטענדיג פאר א שידוך לאחד מילדיו, און דערביי דערמאנט זיין אויפטרעטן ביי די תהלוכות ל"ג בעומר; כהוראת רבו הגדול רבי משה וואלפסאן זצ"ל.

"א שעה שפעטער" האט א חבר, אחד מן חבורת אמונת ישראל, אים גערופן אנטראגן א שידוך. פרעגענדיג יענעם, פארוואס ער האט נישט געקענט ווארטן ביז'ן זיך טרעפן ביינאכט אין ביהמ"ד? האט יענער געענטפערט: ווי נאר ס'מיר געקומען במחשבה האט עס מיר געמוטשעט "שוין אנצוטראגן" - וכתפילתו ביים אוהל איז דער שידוך געווארן אין א גוטע שעה.

*

ר' ישראל! ר' ישראל! אומגלויבלעך!

הרב ישראל שם טוב שליט"א פון קראון הייטס טרעפט א איד אין טענט נעבן אוהל הציון גאר פאר'צרה'ט. נאכ'ן אים פרעגן, אפשר קען ער אים מיט עפעס העלפן? האט יענער פארציילט זיין שווערן פעקל וועגן א 7 יאר תפיסה וואס ווארט אים, שוין נאך מיליאנער דאלער פאר לויערס.

ר' ישראל זאגט אים: גיי אין אוהל, אבער בלייב דארט בתפילה ובתחנונים, ביז דו וועסט שפירן "א באגנאדיגטער".

נאך א שעה צייט טרעפט אים ר' ישראל מיט רויט באוויינטע אויגן און יענער רעדט נישט ארויס א ווארט. נאך א וויילע גיט ער א שריי: ר' ישראל! ר' ישראל! יעצט באקומען פון לויער א מעסעדזש: תפיסה איז בטל! נאר אן אייזערנעם רינג אויפ'ן פיס פאר א געוויסע צייט.

*

אויפ'ן זעלבן פלאץ ווי די רצועות

ביי צען חדשים האט דער דר. געוואויגן מיין קינד און געמאסטן זיין קאפ - דערציילט א יונגערמאן פון ב. פ. - און אונז געזאגט מיט זארג: דער ארום אויבן פון קאפ איז פיל קלענער ווי ס'קומט צו זיין. מ'וועט מעגליך מוזן מאכן אן ערענסטן טעסט אויפ'ן קאפ.

ר"ח תמוז תשפ"ב האט ער שטארק מתפלל געווען אין אוהל. ארויסקומענדיג, עפענט ער א ספר צו טרעפן א קבלה טובה פאר א ישועה. ס'געווען א ספר אגרות הק' פון רבי'ן, וואו דער רבי איז מפציר א איד צו לייגן תפילין דר"ת. "דער יונגערמאן אליין" האט ליידער געהאט אויפגעהערט צו לייגן ר"ת און ער האט זיך דאן מקבל געווען צו לייגן. מ'איז צוריק צום דר. ער האט געמאסטן דעם קאפ - "דארט וואו מ'לייגט די רצועות" - און צום וואונדער פון גאנצן אפיס איז עס געווען צוריק ווי יעדער געזונטער קאפ.