מעמד מרומם קנין זכות היכל הישיבה אפגעהאלטן פאר נייעם בנין ישיבה תורת משה סניף ב' ד'סאטמאר -מאנטריאל

היכל הישיבה געקרוינט מיט'ן נאמען "היכל חיים צבי" ע"ש הרה"ח ר' חיים צבי לאווי ז"ל, געווארן אפגעקויפט בהשתדלות בנו הרה"ג ר' שמעון עזריאל שליט"א ר"מ בישיבה"ק | רגש'דיגער מעמד נהדרה פארגעקומען בביתו בהשתתפות כ"ק מרן אדמו"ר מ'סאטמאר שליט"א | די ערשטע שטופ צום גרויסארטיגן דריי-מיליאן דאלאר "להאדירה קאמפיין"

מאנטריאל. – וילכו מחיל אל חיל! נאך די מוצלח'דיגע עררייכונגען מיט'ן גומר זיין לידי מקח און זיך אריינציען אינעם נייעם רחבות'דיגן אכסניא של תורה, טוט אצינד דער בארימטער מבצר התורה ישיבה תורת משה סניף ב' ד'סאטמאר לאזן אין גאנג דעם נאכפאלגנדן מגבית "להאדירה", מיט'ן דרינגענדן ציל אויפצוטרייבן וואס פריער פרישע נויטוויכטיגע 3 מיליאן דאללער, צו קענען פולקאם איבערבויען דעם גאנצן בנין לפאר ולרומם את בית ה', להגדיל תורה ולהאדירה.

דער פרישער קאמפיין פאלגט נאך די סוקסעספולע מגבית רבתי "שהחיינו" אפגעראכטן מיט א צייט צוריק, וואס האט בשעתו אויפגעפלאמט די הערצער פון די דאנקבארע הורי הישיבה, ידידי ונדיבי לב חסידי סאטמאר אין קאנאדא און איבער ניו יארק, און באזונדער די געטרייע אברכים יקרים יוצאי הישיבה, וועלכע האבן דעמאנסטרירט זייער סאלידאריטעט און קשר אמיץ מיט די הייליגע ישיבה, קויפנדיג זכותים נצחיים אנצוהאלטן אן אייביגער שותפות מיט די ישיבה.

בראש הנדבות האט שטארק אפגעקלינגען און ווערט עד היום געדענקט און געשעצט דער כתר ש"ם טוב מיט'ן אפקויף פונעם זכות שם הבנין הנקרא לשם ולתפארת "בנין משה דוד", על שמו ולזכרו הבהיר פונעם אומפארגעסליכן אדם היקר באנשים חסיד בדרכיו ותמים במעשיו הרה"ח ר' משה דוד ב"ר ברוך מיללער ע"ה, בנדבת בנו הנדיב הנעלה מחשובי הורי הישיבה, הרה"ח ר' שמואל ארי' מיללער הי"ו.

המתחיל במצוה אומרים לו גמור! אצינד איז געקומען דער צייט צו שפאנען פאראויס לגמור את הבנין, כדת וכראוי. מאמענטאל ווערט נאר פארנוצט א חלק בנין און אלעס איז נאך אויף א פראוואזארישע רויע פארנעם. ס'פארלאנגט זיך נאך מינימום פרישע 3 מיליאן דאללאר צו קענען אונטערנעמען וואס פריער מאסיווע רענאוואציע ארבעט אויף אלע טיילן פונעם בנין מבית ומחוץ, צו ברענגען א מאיעסטעטישע צורה פאר'ן בית הגדול והקדוש, פאר דעם צוועק איז איצט געווארן פראקלאמירט דער מעכטיגער "להאדירה קאמפיין", וואס צילט אויפצוטרייבן די איבריגע דריי מיליאן דאללער אין די קומענדיגע האלבע יאר, צו קענען וואס פריער אנהייבן מיט די וויכטיגע ארבעט למען השלמת הבית.

ראשון למקראי קודש! – אלס מתחיל במצוה צו געבן די ערשטע שטופ פאר די הנהלה איז אנטקעגנקומען דער בארימטער מרביץ תורה ומשפיע, מחשובי רמ"י הישיבה, הרה"ג ר' שמעוןן עזריאל לאווי שליט"א, וואס זייענדיג אזוי מקושר בלב ובנפש צו די ישיבה ולתלמידיו הקרויים בנים, און מיטהאלטנדיג דעם געוואלדיגן צורך 'להגדיל תורה ולהאדירה', האט ער גענומען אויף זיך בחפץ לבו הטוב צו שאפן ריזיגע סכומים און דערמיט מקדיש זיין דעם זכות 'היכל הישיבה' מיט'ן שם עולם "היכל חיים צבי", ע"ש ולזכר נשמת אביו החשוב הבלתי נשכח איש חסיד וכביר המעש הרה"ח ר' חיים צבי לאווי ז"ל, מנכבדי ק"ק סאטמאר און לאנגיעריגער גבאי צדקה פאר די סאטמארער ת"ת אין מאנטריאל.

לרגל די חתימת קנין השטר איז בס"ד פארגעקומען דעם פארגאנגענעם מיטוואך פ' עקב העעל"ט א הערליכע עלעגאנטע מסיבה אין די זומער-דירה פון הרה"ג ר' שמעון עזריאל שליט"א אין די קעטסקילס ראיאן, מיט די פערזענליכע השתתפות פון כ"ק מרן אדמו"ר מ'סאטמאר שליט"א און הגה"צ אבד"ק סאטמאר ירושלים – קרית יואל שליט"א.

ביי די מסיבה האט מען געהערט הערליכע דרשות פונעם בעל אכסניא הרה"ג ר' שמעון עזריאל שליט"א, פונעם ראש הישיבה הגה"צ ר' אלטר וואגשאהל שליט"א, פונעם געטרייען אדמיניסטראטאר הרה"ח ר' שרגא ברוין הי"ו, און פון הרה"ג ר' יואל לאווי שליט"א מרשמי רשוותא חידושי תורה פון רבי'ן שליט"א, א ברודער פון הרה"ג ר' שמעון עזריאל שליט"א.

דערנאך האט מען ארויפגעברענגט אויפ'ן טיש א כתב שותפות יששכר וזבולן, געשריבן עלי גליון אויף קלף באותיות מוזהבות, אויף וועלכן עס האבן זיך גע'חתמ'ט הרה"ג ר' שמעון עזריאל שליט"א מיט'ן ראש הישיבה שליט"א, און דאן ערהאלטן גושפנקא דמלכא ונחתם בחתימת יד קדשו פונעם רבי'ן שליט"א, לכבוד ולמשמרת, נאכפאלגט מיט ווארימע דברות קודש. ותחי רוח צדיק, ווען הרה"ג ר' שמעון עזריאל שליט"א האט אויפ'ן פלאץ אראפגעלייגט האלב פונעם סכום, שענקענדיג א געוואלדיגער חיזוק פאר די עבודה"ק.

אונטער'ן רושם פונעם ערפאלגרייכן מסיבה ווערט געלאזט אין גאנג מיט'ן פולסטן קראפט דער מאסיווער "להאדירה קאמפיין", צילנדיג אויפצוטרייבן די געפאדערטע 3 מיליאן דאללאר אין די נעקסטע פאר חדשים צו קענען וואס פריער אנהייבן מיט די איבערבוי-ארבעט גומר זיין דעם בנין הישיבה כליל בהדרו ובתפארתו.

ס'איז אוודאי צו ערווארטן אז די חשוב'ע עלטערן וידידי הישיבה אנ"ש פון נאנט און ווייט, וואס האבן אלא אזא נאנטן געפיל און הכרת הטוב וועלן קעגנקומען דעם חשוב'ן ראש הישיבה ואתו עמו די מסירת נפש'דיגע חברי הנהלה - מיט'ן העלדישן אדמיניסטראטאר ר' שרגא ברוין הי"ו וואס טראגט אויף זיך דעם שווערן עול - און זיך איינהאנדלן זכותים אדירים פון הרבצת תורה והעמדת יסודות איתנים לבתים נאמנים בישראל, וואס וועלן פארבלייבן אויף אייביג לעד ולנצח, שם עולם אשר לא יכרת!