אקטיווע פארשריט אויף צענדליגער פראנטן ביים בניית ביהמ"ד הגדול דק"ק קרית יואל אויף גארפיעלד ראוד, ארבעטער אויף אלע שטאקן סיי אין נייעם און אויך אין 'אלטן' בנין. אנגעהויבן 'אוטסייד' פרעימינג ביים העכסטן טייל פון געביידע צו ענדיגן תבנית הבנין בתפארה. ארבעט 'אינעם' דאך צווישן די 'טראסעס' צו ציען פלאמבינג, עלעקטריק, און עיר קאנדישאן. רוב רובו פון בנין האדיר איבערגעדעקט מיט אייזערנע סטודס פאר די דרויסענדיגע ווענט פון גרויסן ביהמ"ד צו שטיין גרייט אויף 2 טעג ארום בס"ד ביומא דהילולא פון מרן רביה"ק זי"ע דעם דאנערשטאג ראה.

אויף אונטערשטע שטאק האט מען אין בלויז איין טאג אראפגעהאקט די אלטע שטיבלעך, טראקטארן געגראבן ליניעס א גאנצע נאכט פון 9 ביז 5... פאר אונדערגראונד פלאמבינג, פארטאגס האט מען אינסטאלירט פלאמבינג און עלעקטריק, און א טאג דערויף האט מען געגאסן די נייע קאנקריעט פאדלאגע. אצינד איז שוין אויפגעשטעלט אלע ווענט אינעם 9,000 ס"פ חדרי תפלה שטאקן. און מען לייגט יעצט די 'טיילס' און עס ווערט אינסטאלירט די נטילת ידים סינקס.

אויפן דאך איז היינט אנגעקומען א ריזן שיפמענט פון מאסיווע 'עיר קאנדישאן' יוניטס וואס ווערט געצויגן מיט דוקס צו אלע ווינקלען אינעם ריזן היכל הענקי פון 11,000 ס"פ מיטן פלאן עס זאל בעז"ה שוין זיין אין באנוץ אין 2 טאג פון היינט בסייעתא דשמיא.

צווישן די פיס ארבעט א באזונדערע קראו פון 'פייער פראווינג' צו באשפריצן אלע ביעמס מיט ספעציעלע מאטריאל קעגן פייער.

אין 'אלטן' בנין האט מען אויפגעריסן א נייע גרויסע פרוזדור דער הויפט לאבי צום היכל אלטר יחזקאל. וואו עס איז ביז היינט געווען די קאווע צימער מיט די אוצר הספרים, וואס מען האט דאס אלעס אויסגעריסן און געעפענט א ברייטע קארידאר תבואנה אל היכל המלך. אויך ווערט געעפענט באזונדערע סטעיר קעיסעס הארט נעבן די אלטע צו קענען פארנעמען א גרעסערע טרעפיק אריין און ארויס פונעם היכל. די נייע סטעיר קעיס ווערט געעפענט נעבן די 'אלטע' חדר בית הוראה 'בית משה ארי'' וואס וועט רי-פלאצירט ווערן מיט אן הרחבת הדעת אין די ערשטע 'גראונד-לעוול' שטאק מיט א באזונדערע טיר גלייך פון די גאס לכל דורש ומבקש.

א שטאק ארויף אין אלטן בנין אויף 'קומה ג'' איז העפטיג אונטער קאנסטרוקציע ביים ווינקל פון מערבית צפונית וואו א באזונדערע טיעם ברעכט ווענט און ציעט פרישע פלאמבינג פאר א צאל נייע ביה"כ און נטילת ידים פאר די נייע עזרת נשים וואס וועט געעפענט ווערן אויף יענעם שטאק צום היכל אלטר יחזקאל הענקי.

אויפן דאך זיצט א באזונדערע גרויסע ארבעטס קראפט פון 'רופינג' צו סיעלן דעם דאך. און א באזונדערע פון 'עיר קאנדישאן' שטאב צו אינסטאלירן די גיגאנטישע נייע מאשינען אויפן דאך פון גרויסן ביהמ"ד.

וכל העם רואים את הקולות