תושבי מאנסי אונטערן התרוממות הנפש'דיגן רושם נאכן גרויסארטיגן דינער 'עלי עשור', אפצייכנדיג צען יאר פון קיום המוסדות 

פארגעקומען בהתאסף ראשי עם יחד שבטי ישראל פארגאנגענע מאנטאג שחל בו שבועות 

בראשות נשיא המוסדות כ"ק הגה"ק מסאטמר שליט"א

גאר א רייכע פראגראם פון שעות עונג וקורת רוח | זאל איז געווען אויסגעשטעלט צום מאקסימום, צו אקאמאדירן דעם ציבור ריזן | הויכפונקט פון אווענט דברות קודש פון כ"ק מרן רבינו הגה"ק שליט"א | דבר המעמד הגה"צ אב"ד ור"מ שליט"א | דער מעמד איז געווארן אנגעפירט דורך מוה"ר נחמן ליווי הי"ו | בואו חשבון - א בליק אין די קוויקבוקס פונעם מוסד ע"י מוה"ר יעקב יצחק אבערלאנדער הי"ו | 'ארבעה ראשים הם' - אינפארמאטיווע פאנעל דורך די מנהלי המוסדות, הרב בנימין זאב פוקס שליט"א, הרב שלמה זלמן גראס שליט"א, הרב ישראל מאיר פריעדמאן שליט"א, הרב אפרים העכט שליט"א | רייכע פרעזענטאציע איבער צען יאר פון קיום מוסדותינו פארגעשטעלט דורך די תלמידי המוסד | 'פרקי שירה' - מוזיקאלישע מאמענטן דורך מוה"ר שלמה זלמן האראוויץ הי"ו פאוועל פראדוקשן, אין באגלייטונג פון חברת שירה | גאר ווארעמע אפרוף פון הונדערטער עלטערן זיך אנצורופן מיט הערליכע סכומים למען החזקת המוסדות

מאנסי - נישט דא די ריכטיגע ווערטער אין מויל ארויסצוברענגען די התרגשות'דיגע געפילן ביי די שווערע הונדערטער משתתפים ביים גרויסארטיגן מעמד 'עלי עשור, וואס איז פארגעקומען בהתאסף ראשי עם יחד שבטי ישראל, אנשי שלומינו בראשות דער מנהיג העדה כ"ק מרן אדמו"ר הגה"ק שליט"א נשיא המוסדות.

דער גאנצער מעמד איז געווען א חטיבה אחת של התרוממות הנפש מבואו ועד צאתו, יעדע מינוט איז געווען אויסגערעכנט פאר די מאקסימום הנאה פון אלע משתתפים. עס האט זיך דערקענט די געוואלדיגע כוחות וואס די עסקנים האבן אריינגעלייגט אז דער מעמד זאל געקרוינט ווערן מיטן גרעסטן מאס סוקסעס.

די ריכטיגע ווערטער אויף אזא מעמד איז 'ברוך המקדש שמו ברבים', עס איז געווען א מחזה הוד צוצוקוקן ווי הונדערטער אנשי שלומינו האבן זיך צוזאמגענומען פון אלע עקן שטאט, פאר איין איינציגע מטרה, צו שטיצן די הייליגע מוסדות, אז מען זאל ווייטער קענען אנגיין מיט די עבודת הקודש, צו מחנך זיין די אריבער 2,000 תשב"ר כ"י, וואס ווערן נתחנך בין כותלי מוסדותינו הק'. ובפרטיות היי-יאר וואס מען האט געפייערט אינאיינעם דעם 'יובל עשור' - צען גאנצע יאר פון קיום מוסדותינו הק'.

ווי נאר דער מעמד האט זיך אנגעהויבן, האט מען געזען ווי אנשי שלומינו פון אלע יארגענג שטראמען צום וועלי טעררעס. דא איז טאקע דאס פלאץ ארויסצוברענגען דברי הערכה פאר אלע חשוב'ע עסקנים וואס האבן ארויסגעהאלפן דעם ציבור מיט אלעס ארום פארקינג, מיט א געוואלדיגע געטריישאפט. אזוי אויך איז געווען צוגעשטעלט ספיציעלע פארקינג פאר די פני העדה און חברי אהבת קדומים.

היי-יאר איז באזונדער אריינגעלייגט געווארן כוחות אויסצושטעלן דעם זאל צו קענען אקאמאדירן דעם ריזן ציבור, אזוי אויך האט זיך שטארק אנערקענט די כוחות וואס עס איז אריינגעלייגט געווארן ארויסצוברענגען ווי מער די שמחה עצומה פון חגיגת יובל העשור, צי איז דאס דורך די הערליכע אויג-פארכאפנדע אויבנאן אדער די פילע צוגעהערן וואס האט גאר אסאך צוגעגעבן צום רייכקייט פון דער מעמד.

ניהול המעמד 

אלס יושב ראש פונעם דינער האט געדינט דער נואם בחסד עליון מו"ה נחמן ליווי הי"ו, וועלכער האט אנגעפירט דעם גאנצן סדר המעמד מיט זיין געבענטשטע לשון לימודים, און אייגנארטיגע געשמאק, וואס האט געהאלטן דעם גאנצן ציבור געשפאנט במשך דעם גאנצן נאכט.

דער יושב ראש האט ארויסגעברענגט 'מפרסמין עושי מצוה' די אלע נדבני הכיתות בבניני מוסדותינו הק'. אזוי אויך אלע 'פרנסי החודש' וואס האבן זיך אנגערופן תורם צו זיין געוויסע חודש'ליכע הוצאות, ישלם ה' פעלם כפלי כפלים.

ארבעה ראשים הם

א שטילקייט האט געהערשט אין זאל הערנדיג די רייכע אינפארמאטיווע פאנעל 'סודות פון חדר' דורך די מנהלי המוסדות, הרב בנימין זאב פוקס שליט"א, הרב שלמה זלמן גראס שליט"א, הרב ישראל מאיר פריעדמאן שליט"א, הרב אפרים העכט שליט"א, וואס עס איז געווען באגלייט מיט פילע אויפדעקונגען פון הינטער די קוליסן מיט אינטערעסאנטע ידיעות פאר די חינוך הבנים.

עס איז געווען א מחזה הוד ווי אנשי שלומינו האבן זיך צוגעהערט ווען אויפן פאדיום שטייען די פיר מנהלי המוסדות, ווי יעדער איינער האט געענטפערט די תשובות לויט זיין אייגנארטיגע מהלך, איבערגעבנדיג די קלארע הוראות פון חינוך הבנים וואס עס איז נוגע פאר די עלטערן.

לויט ווי דער ציבור געבט איבער, איז דער פאנעל געווען א זאך וואס מען וועט געדענקען פאר לאנגע יארן, ובפרטיות איז קלאר געווארן גאר אסאך עניני חינוך בזמנינו אלה.

בסייעתא דשמיא האבן די עלטערן אויך געקוואלן צו זען אז מיר האבן ב"ה די ריכטיגע שליחים וואס זענען אויסדערוועלט געווארן צו זיין עומדים על משמרת הקודש, ווי זיי האבן ב"ה די ריכטיגע סייעתא דשמיא אין יעדן טריט און שריט.

בואו חשבון

גאר רירנדע רייד איז געהערט געווארן דורך אחד מחשובי אנשי שלומינו, מוה"ר יעקב יצחק אבערלאנדער הי"ו, וואס האט געגעבן א בליק אין די קוויקבוקס פון די מוסדות. דינענדיג אלס דער אקאונטענט פון די מוסדות, האט ער געגעבן א גרוס מאחורי הפרגוד איבער די הוצאות והכנסות פון מוסדותינו הק', ובפרטיות וויפיל כוחות די הנהלה לייגט אריין אז עס זאלן נישט זיין קיין איבריגע הוצאות.

ווער רעדט נאך אין די לעצטע תקופה וואס דער מצב פון אינפלאציע איז גאר שטארק געשטיגן אויף א פארנעם ווי קיינמאל בעפאר. ער האט ארויסגעברענגט אז זייט דאס התייסדות המוסדות האט מען נאך קיינמאל נישט געהאט אזא גרויסע לאך וואס מען דארף דעקן יעדן איינציגן חודש.

עשרה ניסים נעשו לאבותינו

פון די הערליכע מאמענטן ביים 'מעמד עלי עשור' איז געווען די הארציגע פרעזענטאציע, פארגעשטעלט דורך די ילדי חן תלמידי מוסדותינו הק'.

די פרעזענטאציע וואס איז ספעציעל פארפאסט געווארן לכבוד דער מעמד, האט גענומען דעם גאנצן ציבור אויף א שפאציר אין צען יאר פון התייסדות מוסדותינו. באגלייט מיט אינטערעסאנטע קרישקעלעך מהנעשה והנשמע מבין כותלי מוסדותינו הקדושה.

די פרעזענטאציע איז געזינגען געווארן ספעציעל פאכמאניש, עס האט אריינגענומען דעם ציבור אין אן אנדערע וועלט, מיטצולעבן די טאג-טעגליכע לעבן פון צען יאר קיום מוסדותינו. עס איז בסייעתא דשמיא געווען געשמאקע נגינה מאמענטן, צו די הנאה פון אלע משתתפים. ובפרטיות פאר אנשי שלומינו וואס האבן מיטגעהאלטן דאס השתלשלות פון התייסדות מוסדותינו הק' במשך די לעצטע צען יאר.

דבר המעמד

א שיינער טייל פון דער מעמד מרומם איז געווען די ווארעמע אויפטריט פון הגה"צ אב"ד ור"מ שליט"א, וואס האט איבערגעגעבן דעם דבר המעמד, באגלייט מיט שיינע דברי תורה און טרעפליכע געדאנקען בענינא דיומא. דער רב שליט"א האט גלייכצייטיג איבערגעגעבן זיינע פערזענליכע הרגשים כלפי די הויכע ניווא פון די מוסדות הק', נאכדעם וואס דער רב שליט"א טוט אפט פארהערן די תלמידי הת"ת, און שטייט כסדר אין נאנטע פארבינדונגען מיט די הנהלה רוחנית, צו פארזיכערן דאס בעסטע פאר די חינוך הטהור פון די לעכטיגע צאן קדשים, ווי אויך זיך באדאנקט פאר די הנהלה ובפרט פארן מנהל המוסדות וואס טראגט דעם שווערן עול

דברות קודש

ווי פארשטענדליך איז דער הויכפונקט פון דער נאכט געוויס געווען די פלאם-פייערדיגע דברות קודש פון כ"ק מרן רבינו הגה"ק שליט"א, וואס האט משמיע געווען דברי ברכה והדרכה פאר אנשי שלומינו תושבי מאנסי.

דער עצם זאך אז דער רבי שליט"א האט זיך אנגעשטרענגט בטלטולא דאורחא וטלטולא דגברא רבה, ארויסצוקומען ספעציעל קיין מאנסי, צו באשיינען דעם דינער, ברענגט שוין ארויס די שטארקע ווארעמקייט למען החזקת מוסדותינו.

די דברות קודש פונעם רבי'ן איז געשלינגען געווארן מיט דארשט דורך אלפי אנשי שלומינו, וואס קוקן שוין ארויס אויף דעם לדעת את המעשה אשר יעשון ואת הדרך נלכה בה.

צווישן די ווערטער האט דער רבי שליט"א שטארק ארויסגעברענגט איבער די שבח המוסדות וואס מען רירט זיך נישט קיין זיז כל שהוא פון די דרך המקובל לנו מרבותינו הקדושים. דער רבי האט בתוך לשונו געזאגט אז יעדעס מאל וואס ער קומט קיין מאנסי זעט ער כסדר'דיגע חידושים ווי מען גייט פאראויס אויף א שטארקע פארנעם בכמות ובאיכות.

דער רבי שליט"א האט ארומגערעדט איבער די שבח און חובת השעה פון שטיצן די מוסדות הקדושים, וואס דאס ברענגט אריין געוואלדיגע השפעות טובות פאר אלע תומכים ומסייעים. דער רבי שליט"א האט מסיים געווען זיינע ווערטער מיט ברכות לרוב פאר אלע תומכים ומסייעים.

הרימו את תרומת ה'

לויט ווי הנהלת המוסדות געבט איבער, האט זיך דערקענט א שטארקע ווארעמקייט ביים ציבור ווי מען האט זיך אנגעשטרענגט מיט הערליכע סכומים למעלה מן היכולת העכער אלע ערווארטונגען. מען האט געשפירט אין די לופט אז מען פארשטייט די חובת השעה און די שטארקע וויכטיגקייט צו שטיין לימין מוסדותינו, וואס דאס איז די מוסדות פון אונזערע אייגענע קינדער.

עס איז זיכער אז אלע תומכים ומסייעים וועלן זוכה זיין צו שפע ברכה והצלחה, און זען הויפענעס נחת פון בנים ובני בנים עוסקים בתורה ובמצוות, בריות גופא ונהורא מעליא עד ביאת גואל צדק בב"א.

מה נהדר היה המראה

צו הערן די ריקארדירונג פונעם מעמד דרוקט דא 

https://www.dropbox.com/sh/v9w92nnpm1uohxx/AACBRfV8RnrFFfrZLw2LTZr8a?dl=0