הרב משה לייב רטונער שליט"א פארציילט:

נאכדעם ווי מיר האבן פארלאזט רוסלאנד, האבן די רשעים אנגעהויבן אויסטיילן פאר'ן רבי'ן צרות אויף טריט און שריט. מוצאי שמחת תורה תשכ"ט - נאך פאר מיר האבן פארלאזט רוסלאנד - האבן זיי באפאלן דעם רבי'נס הויז און פון דארט צוגעכאפט ספרי תורות, און אלע תשמישי קדושה. אויך האבן זיי גענומען ירושה זאכן וואס דער רבי האט געהאט פון הייליגער ריזשינער זי"ע און פון זיין רבי דער שטיפענעשטער רבי זי"ע. דער רבי איז געווען זייער צובראכן פון דעם. דער רבי איז שוין געווען עלטער, דאך האט ער נאך געהאט א שווארצען בארד, אבער נאך די גניבה איז ער גרוי געווארן. די KGB האבן אים גע'רודפ'ט אן א שיעור. אויך האבן אלע ערליכע אידן וואס זענען געווען נאנט מיטן רבי'ן, צוביסלעך איבערגעלאזט די פארשאלטענע רוסלאנד. דער רבי האט נישט געהאט וואס צו עסן. ער האט געגעסן נאר וואס ערליכע אידן האבן אים געברענגט. שבת האט ער נישט געהאט קיין חלות. ער האט אויך מער נישט געהאט קיין מנין. יעצט האט דער רבי באשלאסן אז עס איז די ריכטיגע צייט אז ער זאל אויך איבערלאזן די רוסישע רשעים. ער האט געמאכט זיכער איבערצולאזן א מוהל און אויך א שוחט, אז די אידן דארט זאלן קענען האבן כשר'ע פלייש.