אומגעווענליכע סצענע אין רוסלאנד: א ראבאט שלאגט זיך צוריק מיט א קאסטומער אין א געשעפט נאכן ווערן געשטיפט

א ראבאט אין פארעם פון א מענטש מיטן נאמען "סיאמא" (Syoma) איז געווארן אן אינטערנעט סענסאציע, נאכדעם וואס סעקיוריטי קעמרעס האבן אים אויפגעכאפט רעאגירן אגרעסיוו צו א קאסטומער וואס האט אים א שטיפ געטאן אין א רוסישע עלעקטראניקס געשעפט.

דער אינצידענט האט פאסירט אינעם "וואלגא סטאר 64" געשעפט אין סאראטאוו, רוסלאנד, וואו דער ראבאט איז געווען סטאנציאנירט אויפצונעמען קאסטומערס און געבן טעכנישע הילף. אינעם ווידעא קליפ וואס פארט ארום, זעט מען ווי א מאן אנגעטון אין שווארצע קליידער גייט צו צום ראבאט און פרובירט אים צו געבן די האנט. ווען דער ראבאט האט נישט רעאגירט, האט דער מאן אים א שטיפ געטאן. וואס האט פאסירט תיכף דערויף האט פארוואנדלט א געווענליכע סצענע אין א וויירעל סענסאציע וואס איז שוין געזען געווארן מיליאנען מאל.

אנשטאט צו בלייבן שטיל, האט דער ראבאט זיך אריבערגערוקט צו א פארטיידיגונגס-פאזיציע, און האט אנגעהויבן גיין אין ריכטונג פונעם קאסטומער מיט אויפגעהויבענע הענט ווי גרייט זיך צו שלאגן. אויפן ווידעא זעט מען ווי דער מאשין רוקט זיך אויפן קאסטומער, און פרובירט אים צוריקצושטיפן אדער געבן א בריק, איבערלאזנדיג יעדן ארום אין שאק. צוויי ארבעטער אינעם געשעפט זענען שנעל אריינגעשפרינגען אין די בילד, אנגעכאפט דעם ראבאט און אים אראפגעווארפן אויפן פלאר צו פרובירן אים צו בארואיגן. די גאנצע קאנפראנטאציע, וואס איז רעקארדירט געווארן אויף די געשעפט'ס סעקיוריטי קעמרעס, האט זיך אפגעשפילט אין ארום 32 סעקונדעס, ביז די ארבעטער האבן באוויזן אים אינגאנצן אויסצולעשן.

די קליפ האט אויפגעריסן אויף סאשעל מידיע, אריינברענגענדיג מיליאנען וויאס און א כוואליע פון וויצן און דעבאטעס איבער די וואקסנדע מעגליכקייטן פון די סארט ראבאטן. אסאך האבן געמאכט קאמישע צוגלייכונגען צו סייענס-פיקשאן פילמען, בעת אנדערע האבן זיך אנגענומען פאר "סיאמא", טענה'נדיג אז דער ראבאט האט זיך פשוט פארטיידיגט נאכן ווערן פראוואצירט.

עקספערטן האבן אבער אנגעוויזן א וויכטיגע פונקט: עס איז דערווייל אומקלאר צי די רעאקציע פונעם ראבאט איז געווען אן אטאמאטישע זעלבסטשטענדיגע שריט, א פאראויס-פראגראמירטע פארטיידיגונגס סיסטעם, אדער גאר א רעזולטאט פון א מענטש וואס האט אים קאנטראלירט פון דערווייטנס (רימאוט קאנטראל). ראבאטן ווי סיאמא קענען אפערירן מיט א געמיש פון אטאמאטישע סאפטווער און מענטשליכע קאנטראל, וואס מאכט עס שווער צו וויסן מיט זיכערקייט וואס פונקטליך האט געפירט צו זיין אויפפירונג אין יענעם מאמענט.

אפגעזען פון די סיבה, האט דער אינצידענט פריש אויפגעוועקט א ברייטערע שמועס איבער ווי אזוי ראבאטן דארפן זיין פראגראמירט צו רעאגירן ווען זיי ווערן פיזיש פראוואצירט דורך מענטשן. לויט באריכטן, האט דער ראבאט ווייטער געמאכט ווילדע באוועגונגען אפילו נאך די קאנפראנטאציע, און מען האט אים געמוזט אינגאנצן אפשפארן ווייל עס איז געווארן שווער אים צו קאנטראלירן.

דאס איז נישט דאס ערשטע מאל וואס א רוסישער ראבאט מאכט העדליינס פאר אומגעראכטענע אויפפירונגען; אן אנדערער ראבאט מיטן נאמען "עי-איי-דאל" (AIdol) איז צוזאמגעפאלן אינמיטן אן אויפטריט אין מאסקווע, וואס האט אויפגעברענגט פראגעס איבער זייער פארלעסליכקייט. וויבאלד ראבאטן ווערן אלס מער אן אפטער ערשיינונג אין געשעפטן און פובליק פלעצער, וועלן אינצידענטן ווי דאס מיט סיאמא ווארשיינליך ווייטער אנהאלטן די נייגעריגקייט - און אומבאקוועמליכקייט - פונעם פובליק איבער ווי אזוי מאשינען וועלן רעאגירן ווען מענטשן פירן זיך נישט אויף שיין צו זיי.