שפאנונג אין אגודת ישראל: כ"ק אדמו"ר מגור שליט"א אנטזאגט זיך פון אונטערשרייבן דעם 'קול קורא' פון די מועצת גדולי התורה לקראת די וואלן
גאלערי
א פרישע שפאנונג האט אויסגעבראכן אין די רייען פון 'אגודת ישראל' אין ארץ ישראל לקראת די קומענדיגע כנסת עלעקשאנס, נאכדעם וואס עס איז באריכטעט געווארן אז כ"ק אדמו"ר מגור שליט"א האט זיך אנטזאגט פון ארויפשטעלן זיין פערזענליכע חתימה אויפן טראדיציאנעלן 'קול קורא' וואס ווערט ארויסגעגעבן דורך די מועצת גדולי התורה.
לויט באריכטן וואס זענען פארעפנטליכט געווארן דאנערשטאג אוונט (אקטאבער 22), האט דער גערער רבי נישט מסכים געווען צו אונטערשרייבן דעם צעטל וואס רופט דעם חרדי'שן ציבור צו שטימען פאר 'יהדות התורה', טראץ די אנגייענדע פרואוון צו פארזיכערן די חתימות פון אלע אדמורי"ם חברי המועצת. די נייעס איז ערשט באריכטעט געווארן דורך דעם זשורנאליסט ארי קלמן פון i24NEWS און איז שפעטער איבערגעגעבן געווארן דורך עטליכע חרדי'שע נייעס קוועלער.
דער קול קורא, וואס ווערט געווענליך געדרוקט אין די חרדי'שע צייטונגען דעם פרייטאג פאר די וואלן, טראגט געווענליך די נעמען און חתימות פון די אדמורי"ם חברי מועצת גדולי התורה פון אגודת ישראל.
אין א פרואוו צו לייזן דעם קריזיס, האבן עסקנים פון גור פארגעשלאגן אז מען זאל דרוקן דעם קול קורא בלויז אונטערן אלגעמיינעם נאמען "מועצת גדולי התורה", אן ארויסשרייבן די פריוואטע נעמען און חתימות פון די אדמורי"ם. אזא שריט וואלט ערמעגליכט אז דער צעטל זאל ארויסגיין בשם די מועצת אלס אן אפיציעלע קערפערשאפט, אן דעם וואס דער גערער רבי זאל דארפן פערזענליך אונטערשרייבן.
די פראבלעם איז אבער געבליבן אומגעלייזט, אפילו נאכדעם וואס דער פארזיצער פון יהדות התורה, ח"כ יעקב אשר, האט אפגעשטאט א באזוך מיטוואך אוונט במעון הקודש פונעם גערער רבי'ן. לויט די באריכטן האט די זיצונג זיך געענדיגט אן קיין הסכמה איבער די חתימה.
די יעצטיגע אומאייניגקייט קומט אין ליכט פון אנגייענדע שפאנונגען אינערהאלב אגודת ישראל איבער אינערליכע פאליטישע אנגעלעגנהייטן, ווי אויך די ברייטערע מערכה ארום דעם חוק הגיוס און די סטאטוס פון בני ישיבות.
פארהאנדלונגען זענען נאך אנגעגאנגען דאנערשטאג ביינאכט, ווען האלב-נאכט איז באשטימט געווארן אלס דער דעדליין צו פאסן א ענדגילטיגע באשלוס בעפאר די פרייטאג צייטונגען גייען צום דרוק. לויט די לעצט-פארעפנטליכטע באריכטן איז נאך אלס אומקלאר צי מען וועט אנקומען צו אן הסכם, אדער צי די חתימה פון כ"ק אדמו"ר מגור שליט"א וועט טאקע פעלן פון דעם צעטל צווישן די אנדערע חברי המועצת.