פאקס ניוז קארעספאנדענט טרעי אינגסט האט די וואך געגעבן א זעלטענעם, נאענטן בליק אויף די פראנט ליניעס פונעם אנגייענדן קאנפליקט מיט איראן, ווען ער האט באריכטעט דירעקט פונעם דעק פונעם "יו-עס-עס דזשארדזש וואשינגטאן" עירקרעפט קעריער. די דראמאטישע בילדער האבן געוויזן ווי קאמפס-עראפלאנען הייבן זיך אויף אין די טיפע נאכט שעה'ן איבערן אראבישן ים, וואס גיט א קלארן בילד ווי אינטענסיוו און אומאויפהערליך די מיליטערישע אפעראציעס זענען.

דער "דזשארדזש וואשינגטאן" איז א נוקלעאר-געטריבענע קעריער וואס קען אקאמאדירן איבער 6,000 סאלדאטן. געווענליך איז איר באזע אין יאפאן און זי אפערירט אין די פאציפישע וואסערן, אבער איר יעצטיגע אנוועזנהייט אזוי ווייט פון איר נארמאלע ארט, צייגט ווי ערנסט וואשינגטאן נעמט די יעצטיגע אנגעצויגנקייט מיט טעהראן.

דער מאסיווער שיף איז אנגעקומען אין די ראיאן ענדע אוגוסט, ספעציעל צו איבערנעמען דעם "יו-עס-עס אברהם לינקאלן" קעריער, וועלכע האט נארוואס פארענדיגט א גאר שווערע און רעקארד-ברעכנדע מיסיע פון קרוב צו ניין חדשים. דער לינקאלן איז געווען אויפן וואסער פאר מער ווי 250 טעג נאכאנאנד אן זיך אפשטעלן אין קיין איין פארט זיך אפצורוען. דאס איז א זאך וואס אמעריקאנער פארטיידיגונגס באאמטע האבן אנגערופן אלס אומגעהערט אין די מאדערנע היסטאריע.

עס האבן זיך לעצטנס געהאט פארשפרייט באריכטן איבער א מאנגל אין עסן און היגיענע ארטיקלען, ווי אויך א געפאלענע מאראל ביי די מאטראזן אויפן שיף. פרעזידענט טראמפ האט אוועקגעמאכט די זארגן, זאגנדיג אז די לענג פונעם מיסיע איז א נארמאלע צייט-אפשניט און אז אין די פארגאנגענהייט זענען קעריערס געבליבן אויפן וואסער נאך לענגער. פארטיידיגונגס סעקרעטאר פיט העגסעט האט אויך געזאגט אז די באריכטן זענען פאלש און איבערגעטריבן. אבער ווי עס זאל נאר נישט זיין, האט די אנקום פונעם דזשארדזש וואשינגטאן ענדליך געגעבן די מעגליכקייט פאר די אויסגעמוטשעטע מאנשאפט פונעם לינקאלן אנצוהייבן זייער וועג אהיים.

מיט'ן דזשארדזש וואשינגטאן אויפן ארט, אפערירט זי יעצט אינאיינעם מיט'ן "יו-עס-עס דזשארדזש עיטש. דאבליו. בוש", וואס מיינט אז די אמעריקאנער נעיווי האט יעצט צוויי ריזיגע קעריערס סטאנציאנירט אין מיטל מזרח. דאס איז א טייל פון א ברייטערע אפעראציע דורכצופירן א בלאקאדע אויף איראנער פארטן דורכן הארמוז אדורכגאס.

די בלאקאדע, אן איניציאטיוו פון די טראמפ אדמיניסטראציע, איז געצילט אפצוהאקן איראן'ס מעגליכקייט צו עקספארטירן אויל, בעת אמעריקאנער קרעפטן באגלייטן קאמערציאלע שיפן זיכערערהייט דורך די אנגעצויגענע וואסערן. דעסטרויער שיפן וואס פארן מיט די קעריערס שפילן א קריטישע ראלע אין די מיסיע, באשיצנדיג די פלאטע פון איראנער באליסטישע מיסיל סטראשונגען און העלפן פארהיטן פרישע אטאקעס אויף אויל אינפראסטרוקטור אינעם ראיאן. העגסעט האט קלארגעשטעלט אז אמעריקע פלאנט אנצוהאלטן די בלאקאדע אויף אומבאשטימטע צייט, אפילו אויב די דירעקטע שפאנונגען צווישן וואשינגטאן און טעהראן האבן זיך אביסל בארואיגט אין די לעצטע וואכן.

האלטן צוויי קעריערס אין מיטל מזרח קומט אבער מיט א פרייז. עס לאזט אנדערע ראיאנען מיט א שוואכערע אמעריקאנער נעיווי פראזענץ, אין א צייט וואס די וועלט'ס אויגן זענען געוואנדן צו אנדערע פראנטן. למעשה האט די אריבערפירן פונעם דזשארדזש וואשינגטאן איבערגעלאזט דעם פאציפישן אקעאן אינגאנצן אן קיין איין קעריער אויף דערווייל, א זאך וואס האט געברענגט זארג ביי אנאליסטן וואס האלטן מיט די מאכט-באלאנס אין יענעם ראיאן.

טייל באריכטן געבן אן אז די אנוועזנהייט פונעם דזשארדזש וואשינגטאן אין מיטל מזרח קען זיין בלויז צייטווייליג, ביז דער "יו-עס-עס טעאדאר רוזעוועלט" קעריער, וואס געפינט זיך יעצט אין סאן דיעגא, וועט קענען ארויספארן צום ראיאן. אבער דערווייל זענען די בילדער פונעם דזשארדזש וואשינגטאן א קלארע מעסעדזש אז אמעריקע איז אנטשלאסן צו האלטן איר מיליטערישע קראפט פולשטענדיג אקטיוו קעגן איראן, ווי לאנג די סיטואציע וועט עס פאדערן.