ותבנהו מהרה ותגדל כבודו:

גראַנדיעזע מסיבת ותבנהו מהרה טרייבט מאַכטפול אויף אַריבער אַ מיליאָן דאָלאַר פאַר'ן בליץ-שנעלע אויפבוי פון ביהמ"ד יטב לב דסאַטמאַר שכונת 306 אין מאָנסי

מעמד נהדר באַשיינט דורך הוד כ"ק מרן אדמו"ר עט"ר שליט"א און כ"ק גאב"ד סאַטמאַר-מאָנסי שליט"א

מחזה הוד ותפארה: קרוב צו 100 אברכים מתפּללי ביהמ"ד שלענגלן זיך אין לאַנגע רייעס איבערצוגעבן די שטר קבלה פון $18,000 און העכער פאַר'ן קרן הבנין צו חתמ'נען בגושפנקא דמלכא דורכ'ן רבי'ן שליט"א און דורכ'ן רב שליט"א

מאָנסי ניו יאָרק – היתה לראש פינה! מיט אַ סאַטמאַרער התלהבות דקדושה איז דעם פאַרגאַנגענעם ליל שישי ראה, ערב די הילולא קדישא פונעם צדיק הדורות דער רשכבה"ג מרן רבינו הקדוש והטהור זי"ע, געגאָסן געוואָרן די פינאַנציעלע אבן הפּינה פאַר'ן בליץ-שנעלע אויפבוי פונעם פרישן סאַטמאַרער צענטער אין מאָנסי, די ביהמ"ד האדיר והחדש יטב לב דסאַטמאַר אין שכונת 306.

די רייכע גראַנדיעזע מסיבה "ותבנהו מהרה" אין די פּרעכטיגע קראָון פּלאַזאַ האָטעל האָט אויפגעהייטערט די געפילן און אויפגעפלאַמט די געמיטער פון די חשובע יונגעלייט מתפּללי ביהמ"ד ותושבי השכונה, אַראָפּצושטעלן אַ מאַכטפולע פינאַנציעלע יסוד פאר די פּרעכטיגע בנין וועלכע איז שוין די פעסטע עבודת הבנוי'.

ותבנהו מהרה; אָסטראָנאָמישע סכומים, פאר אַ בליץ-שנעלע אויפבוי!

די גראַנדיעזע פראַכט-נאַכט "ותבנהו מהרה" האָט אָפּגעשפּיגלט די מיסיע וועלכע שטייט יעצט אויפ'ן אויבנאָן ביי אַלע מתפּללי ביהמ"ד, בליץ-שנעל צו קענען אויפבויען די נייע בנין ביהמ"ד אַז געלט זאָל נישט זיין קיין אָפּהאַלט, שטייענדיג נאָך אַזויפיל מוטשענישן און וואַרטענישן צו קענען זיך נעמען צו די מלאכת הבנוי', ועכשיו שזכינו ווען מ'איז שוין זוכה אַז די ביהמ"ד בויעט זיך על תילה בנוי' זאל דאָס קענען פּאַסירן מיט די שנעלסטע זייגער וואָס נאָר מעגליך.

קראָון פּלאַזאַ האָטעל מאַיעסטעטיש אַהערגעשטעלט צום רייכן פראַכט-נאַכט ותבנהו מהרה!

אין בעפאָרגרייטונג צום רייכן עלעגאַנטע מעמד, איז געוואָרן אַהערגעשטעלט די הערליכע קראָון פּלאַזאַ האָטעל אין מאָנסי, דורך די באַרימטע וויי. עף. פּראָדוקציע אין שפּיץ פון ר' יוחי פליישמאַן דער באַרימטער סאַטמאַרער מעמדים מייסטער, וועלכע איז אַהערגעשטעלט געוואָרן מיט'ן פולן פראַכט, ווי עס פּאַסט פאר אַזאַ גייסטרייכע מעמד.

די חשובע עסקנים ראשי הנהלת קרן הבנין, וועלכע טראָגן אויף זייערע פּלייצעס די שווערע לאַסט פון די מולטי-מיליאָן דאָלאַר'דיגע בוי-קאָסטן פונעם נייעם ביהמ"ד, וועלכע האָבן אַריינגעלייגט די פולע ענערגיע פאר די הצלחה פונעם גרויסן פראַכט-נאַכט, האָבן וואַרעם אַנטפאַנגן דעם שטראמענדע ציבור, וועלכע איז געקומען בויען די אייגענע לעכטיגע צוקונפט, און אין די זעלבע צייט אָפּצוגעבן אַ מאָמענט פון הכרת הטוב פאר די חשובע עסקנים וועלכע שטייען בראש פונעם גיגאַנטישן פּראָיעקט.

הערצער קוועלן פאר פרייד מיט פּרעכטיגע סקיצעס פארעפענטליך ביים מעמד הוד והדר!

כזה ראה וקדש! די מאַיעסטעטישע זאל איז געווען אויסגעלייגט מיט הערליכע אויג-פאַרכאַפּנדע פּלענער, סקיצעס, און דעזיינס, פון די הערליכע בנין ביהמ"ד ההולך ונבנית, וואָס דער ציבור האָט באַטראַכט מיט שמחה און פרייד, זיך נישט קענענדיג גענוג אָפּוואונדערן פון די הערליכע פראַכט פונעם נייעם ביהמ"ד, וואָס די וואַרימע היינט-נאַכטיגע נדבות וועלן בעז"ה ברענגען צו אַ פאַקטישע רעאַליטעט אין די גאָר נאָנטע צוקונפט.

ראשי ופּני ק"ק סאַטמאַר-מאָנסי צייגן אַרויס סאָלידאַריטעט בראש המעמד!

דער ציבור האָט זיך געוואַשן צו אַ רייכע סעודה לקראת די הילולא קדישא פון הייליגן רבי'ן זי"ע, און ביי רייך-געדעקטע טישן האָט מען פאַרברענגט בשבת אחים גם יחד.

באַזונדער האָבן זיך אָנגעזעהן ביים מעמד די ראשי ופּני הקהלה, די יושבים ראשונה במלכות אין ק"ק סאַטמאַר-מאָנסי, די לעגענדאַרער בונים ומקימים וועלכע האָבן נאָך געהאַט די זכי' בימי רביה"ק זי"ע צו זיין פון די ענערגישע עסקנים און אייפער'דיגע נדבנים צו העלפן דעם הייליגן רבי'ן בויען די קהלה און מוסדות דאָ אין מאָנסי לשם ולתפארת, און זענען אַצינד געקומען אַרויסצייגן האַרציגע סאָלידאַריטעט מיט די פרישע דור סאַטמאַרער יונגעלייט וועלכע זענען ממשיך צו בויען דעם פרישן ביהמ"ד צו מגביר זיין די כח הקדושה אין שכונת 306.

גבאי נאמן הרה"ח ר' אברהם חיים ליפּשיץ הי"ו אַדרעסירט פראַכט-נאַכט!

מיט פּאַסיגע ווערטער האָט געעפענט די רייכע פראַכט-נאַכט, דער אַלעמען באַליבטער גבאי נאמן פון ביהמ"ד, הרה"ח ר' אברהם חיים ליפּשיץ הי"ו, וועלכע האָט במיטב לשונו אַדרעסירט די פאַרזאַמלטע ציבור ווען כולם נקבצו באו חך מיט אַ פאַראייניגטע מיסיע און וויזיע אויפצובויען אונזער פּרעכטיגע רוחניות'דיגע היים. און האָט מכבד געווען דעם יושב ראש המעמד מוה"ר מאיר מרדכי בערקאָוויטש הי"ו אַרויפצוקומען אָנצופירן מיט רייכן פראַכט-נאַכט.

זאַפטיגע מגידות פון הרה"ח ר' מאיר מרדכי בערקאָוויטש הי"ו האַלט געשפּאַנט דורכאויס די רייכע פראַכט-נאַכט!

דער פּערל'דיגע ראש המדברים בכל מקום מוה"ר מאיר מרדכי בערקאָוויטש הי"ו איז אַרויפגעקומען אויפ'ן פּאָדיום, און אַלס סאַטמאַרער איד דאָ אין מאָנסי, אַרויסגעברענגט פון זיין פּערספּעקטיוו די וויכטיגקייט אַז אַ סאַטמאַרער יונגערמאַן זאָל זיין אויסשטאַפירט מיט אַ פולע סאַטמאַרער ביהמ"ד אין די געגענט, אַז מ'זאָל לעבן און אָטעמען אַ היימישע ריינע לופט, באַגלייט מיט זיינע בליציגע רעיונות און געדאַנקן וועלכע האָט געהויבן די גייסט ביים פאַרזאַמלטע ציבור.

ברייטע רעפעראַט פון אונטער די קוליסן דורכ'ן עסקן הדגול מוה"ר משה פאָלקאָוויטש הי"ו ערשטוינט דעם ציבור!

מיט ברייטע אינטערעסע האָט זיך דער פאַרזאַמלטע ציבור צוגעהערט צו די פולע רעפעראַט, דורכן מייסטער-עסקן מוה"ר משה פאָלקאָוויטש הי"ו דער ראש וראשון לכל דבר שבקדושה, וועלכע באַגלייט מיט אַ אויסטערלישע מומחיות די פאַרצווייגטע בוי-פּראָיעקט פון אַלע אַספּעקטן, זייענדיג דער ריכטיגער איש חיל ורב פּעלים וועלכע רוהט נישט קיין טעג און קיין נעכט, און פאַרזיכערט אַז אַלעס זאל בעז"ה פארן אויפ'ן ריכטיגן טרעק.

פון אונטער די קוליסן האָט מוה"ר משה אַראָפּגעגעבן אַ ברייטע רעפעראַט את כל התלאה אשר מצאתנו בדרך, די פריידיגע מציאות כהיום יום ווי אַזוי מ'האָט ב"ה באַוויזן איבערצוקומען אַלע שטיינער אין וועג און מ'רוקט זיך טעגליך פאָראויס מיט די מלאכת הבנוי', און די שטאַרקע מעגליכקייט אַז אויב געלט וועט נישט זיין קיין אָפּהאַלט ווען אויף דעם קומענדיגן ראש השנה הבעל"ט שוין שטיין בתפארתו די ריזן סטראָקטור פונעם היכל הגדול און מ'וועט שוין קענען פּראַווענען די ירח האיתנים פון חודש תשרי אונטער'ן אייגענעם דאך.

אין די זעלבע צייט האָט מוה"ר משה אויסגעשמועסט די ריזיגע קאָסטן וואָס די פּראָיעקט קאָסט אָפּ יעדן איינציגסטן טאָג, און ווי שטאַרק מ'איז אָנגעוויזן אויף יעדנס געלט צו קענען פאָראויסגיין און גאַלאָפּירן מיט'ן שנעלסטן טעמפּאָ אויפצובויען די בנין ביהמ"ד החדש כליל בהדרו.

ביאת צדיק למקום; השתתפות פון כ"ק גאב"ד סאַטמאַר-מאָנסי שליט"א!

בשמחה רבה האָט מען אַנטפאַנגן כ"ק מרן הגאב"ד שליט"א וועלכע איז געקומען באַשיינען דעם פריידיגן מעמד הרחבת גבולי הקדושה בתוככי הקהלה, וועלכע וואַקסט און בליהט אויף אַלע זייטן בלי הרף.

דרשה נלהבה פונעם דומ"ץ ביהמ"ד הרה"ג רבי יצחק אברהם הלוי יונגרייז שליט"א!

מיט אַ יראת הכבוד האָט מען זיך צוגעהערט צו די וואַרימע דרשה דורכ'ן באַליבטער דומ"ץ הביהמ"ד הרה"ג רבי יצחק אברהם הלוי יונגרייז שליט"א, וועלכע האָט מיט הערליכע דיבורים אַרויסגעברענגט די שיינקייט און געשמאַקקייט פונעם ביהמ"ד, ובפרט ווען מ'זעהט דעם ציבור המתפּללים לעבן אינאיינעם אין אַזאַ ברודער'ליכע גייסט, ווען יונגעלייט גייען אַרויס פון זייער וועג גאָר ווייט צו העלפן אַ צווייטן מתפּלל פון ביהמ"ד, און ספּעציעלע שיינט דאָס אַרויס ביים יעצטיגן פּראָיעקט ווען מיט אַ פאַראייניגטע כח שאַפט מען אינאיינעם די נוטיגע פאָנדן לבנות את בית אלקינו.

דערביי האָט דער דיין שליט"א אַרומגעשמועסט שיינע ענינים במשנתו של רבינו הקדוש זי"ע, מיט אַ רייע סיפּורים פונעם הייליגן רבי'ן זי"ע, און אַרויסגעברענגט די געוואַלדיגע זכי' וואָס יעדער יונגערמאַן האָט היינט נאַכט, צו מאַכן די פּאַסיגע הכנה דרבה לקראת ההילולא קדישא, דורכ'ן ווייטער ממשיך זיין רצון קדשו פון הייליגן רבי'ן מייסד קהלתינו הק', צו מרחיב זיין די גבולי הקדושה בעוז ותעצומות פון זיין הייליגע אימפּעריע דאָ אין מאָנסי.

מייסטער-קאָפּ פון פּראָדזעשקטער גרופּ מוה"ר אהרן ערענטאל הי"ו ברענגט אַרויס רגשי הלב פון אַלע מתפּללים!

דאַן האָט אויפגעטרעטן דער דינאַמישער עסקן נמרץ, דער איש חיל ורב פּעלים הר"ר אהרן ערענטאל הי"ו, פון די חשובע מתפּללי ביהמ"ד, וועלכע איז ברייט באַרימט אַלס דער מייסטער-קאָפּ וועלכע שטייט אין שפּיץ פון די פּראָדזשעקטער גרופ, וועלכע איז די אונטערשריפט אונטער הונדערטער מולטי מיליאָן דאָלאַר'דיגע פּראָיעקטן ביים יהדות החרדית.

פון אַ מתפּלל'ס פּערספּעקטיוו האָט ער אַרויסגעברענגט די וואַרימע רגשי הלב ווען מ'שטייט ביי דעם היסטאָרישן מאָמענט פון בויען אונזער אייגענע פעסטונג, און האַרציג אַפּעלירט פון זיין ברייטע ערפאַרונג ווי וויכטיג עס איז יעדע טויזנטער פון די קליין געלט, ווייל דאָס העלפט שאַפן די גרויס געלט פון נדיבי קודש, און דאָס איז אין צוגאָב צו דעם אַז די געלט וואָס מ'לאָזט זיך יעצט קאָסטן איז פּשוט די פּאַסיגע אינוועסטמענט אַז ברבות השנים זאָל מען בעז"ה קענען ריכטיג הנאה האָבן פונעם ביהמ"ד, ווייל די כלל איז אַז ווי מער געלט אַ מענטש לייגט אַריין אין זיין ביהמ"ד אַלס מער איז ער צופרידן מיט הנאה דערפון לאורך ימים ושנים טובים ארוכים.

צדיק כתמר יפרח; קבלת פּני רבם כ"ק מרן אדמו"ר עט"ר שליט"א!

מיט אַ רגש דקדושה האָבן די פאַרזאַמלטע ציבור תלמידים וחסידים זוכה געווען לקבל פּני הקודש פון הוד כ"ק מרן אדמו"ר עט"ר שליט"א, וואָס דער רבי שליט"א האָט זיך ספּעציעל מטריח געווען צו קומען צו פאָרן ממעון קדשו אין מחנה דברי יואל צו קומען באַשיינען מהודו ומזיוו ביים גראַנדיעזע מעמד נכבד, ווען עינו ולבו כל הימים פאר די בליה און וואוקס און די הצלחה פונעם ביהמ"ד, ווען דער רבי שליט"א טוט כסדר דורש זיין בשלום והצלחת בית המדרש מיט אַ ספּעציעלע אהבה און הערצה.

דבר הנהלת הקהלה דורך הרבני הנגיד ר' אברהם שלום מענדלאָוויטש שליט"א מראה"ק!

מיט פּאַסיגע ווערטער האָט אויפגעטרעטן הרבני הנגיד המרומם הרה"ח ר' אברהם שלום מענדלאָוויטש הי"ו מראה"ק, וועלכע האָט בכבוד ועוז מקבל פּנים געווען פּני קדשו פונעם רבי'ן שליט"א, אַרויסהייבנדיג די אויסטערלישע זכי' אַז דער רבי שליט"א איז זיך מטריח בטירחא דגברא רבה צו קומען אַרויסווייזן חיזוק פאר די חשובע יונגעלייט תושבי השכונה צו קענען אַהערשטעלן דעם נייעם ביהמ"ד.

דערביי האָט הרבני הנגיד ר' אברהם שלום הי"ו אַרויסגעברענגט מיט התרגשות זיינע רגשי הלב, שטייענדיג ערב די זיבן-און-פערציגסטע הילולא קדישא פון הייליגן רבי'ן זי"ע, ווי אַזוי עס האָט אויסגעקוקט מאָנסי אין די פריער'דיגע יאָרן, אַלע שוועריגקייטן וואָס מ'איז אַריבער אויף טריט און שריט צו קענען מרחיב זיין די גבולי הקדושה, און ב"ה היינט צוטאָגס איז אויסגעשטיגן לשם ולתפארת אַ פרישע דור פון סאַטמאַרער יונגעלייט, תלמידים וחסידים וועלכע זענען נתגדל געוואָרן על ברכי כ"ק מרן רבינו שליט"א און זייענדיג שותה בצמא את דבריו ווי דער רבי לייגט אַריין תמיד אַזאַ וואַרעמע פלאַקער אין די הערצער פון די תלמידים צו זיין אדוק ומקושר צום אילנא דחיי און ממשיך זיין אין די הייליגע וועגן פון רביה"ק זי"ע, און אָט דאָס זענען די זיסע פּירות וואָס מ'זעהט ביים מסיבה, אַז יונגעלייט פשוטע פאַרדינער זענען גרייט זיך אָפּצורייסן זייער וועכנטליכע געהאַלט און אַוועקצוגעבן זייערע ביסן פון מויל אבי צו קענען האָבן אַ ערליכע היימישע סאַטמאַרער ביהמ"ד אַזוי ווי דער רבי ז"ל האָט געמאָנט און געפאָדערט.

לחיים וברכת הקודש פון כ"ק מרן רבינו שליט"א במאור פנים!

דער רבי שליט"א האָט געטרונקן לחיים און אָנגעוואונטשן וואַרימע ברכת הקודש לכבוד העם הנאספים, וועלכע לאָזן זיך קאָסטן ריזיגע סכומים אַהערצושטעלן דעם בית גדול וקדוש ע"ד פון מרן רביה"ק זי"ע, און בפנים מאירות האָט דער רבי שליט"א געוואונטשן רב ברכות.

דברות קודש פון כ"ק מרן הגאב"ד שליט"א, זה היום עשה ה' נגילה ונשמחה בו!

דערנאָך האָט מען געהאַט די כבוד צו הערן די דברות קודש וואָס כ"ק מרן דער רב שליט"א האָט משמיע געווען, ווי דער רב שליט"א האָט אַרויסגעברענגט בשבח פונעם יעצטיגן ביהמ"ד בשכונת 306 וואָספאַראַ הערליכע מגדל אור דאָס איז אויפצוהייבן די יונגעלייט בדרך רביה"ק זי"ע, ובפרט אונטער די וואַרימע השפּעה פונעם חשובער דומ"ץ הביהמ"ד שליט"א וועלכע איז פקיע שמיה אין די גאַנצע שטאָט מיט זיין כח השפּעה בתורה והוראה.

באַזונדער האָט דער רב שליט"א אַרויסגעברענגט די אויסטערלישע שמחה ווען מ'גרייט זיך מרחיב צו זיין די גבולי הקדושה אויפצובויען אַ אייגענע בנין בנוי לתלפיות לשם ולתפארת, און האָט געוואונטשן וואַרימע ברכות אַז מ'זאָל זוכה זיין צו קענען אויספירן די פּראָיעקט לפאר ולרומם קרן הקדושה להרחיב גבולי הקדושה.

קול ה' בהדר, דברות קודש ומשא המעמד דורך כ"ק מרן רבינו עט"ר שליט"א!

ביראה עילאה ובחרדת קודש האָט דער ציבור דאַן געהאַט די זכי' צו הערן די דברי אלקים חיים וואָס דער רבי שליט"א האָט משמיע געווען מיט אַ ספּעציעלע חביבות פאר עדת צאן מרעיתו תלמידיו וחסידיו הנאמנים מתפּללי ביהמ"ד, דער רבי שליט"א האָט זיך געשטעלט אויף די פּסוקי הפרשה און הערליך פארטיישט מאין המאורע ראה אנכי נותן לפניכם היום ברכה, אַז ווען עס איז דאָ די כח הרבים פון לפניכם קען מען זוכה זיין צו די ברכה, און מרחיב זיין די גבולי הקדושה.

דער רבי שליט"א האָט אויפגעפאָדערט די פליכט וואָס ליגט אויף יעדן מתפּלל זיך אָנצושליסן מיט גרויסע סכומים צו קענען אויפבויען דעם בית הגדול והקדוש, און באַזונדער איבער די וויכטיגקייט אַז אַ סאַטמאַרער יונגערמאַן זאל דאַווענען דייקא אין אַ סאַטמאַרער ביהמ"ד, ובפרט אין מאָנסי וועלכע איז אַ עיר רבתי עם בדעות, און אין דעם ליגט גאָר אַ שטאַרקע יסוד צו בלייבן נאמן לה' ולתורתו אויפ'ן ריינעם דרך וואָס רביה"ק זי"ע האָט אונז געלערנט.

בקהל עם נשירה עוזו; בריח התיכון פונעם ביהמ"ד מוה"ר מיכאל דוב יואל לוגער הי"ו ראש הבונים באַערט מיט נזר הוקרה!

אין אַ שריט פון ריכטיגע הכרת הטוב, האָט דער יושב ראש המעמד אויסגערופן דעם באַגאַבטער איש חיל ורב פּעלים, העסקן הגדול והאדיר לכל קדשי בית המדרש און ספּעציעל האָט ער אַריינגעלייגט אין לויף פון די לעצטערע יאָרן זיין גאַנצע ענערגיע צו קענען אָנגיין מיט די עבודת הקודש פונעם ערשטן טאָג ביז'ן גליקליכן מאָמענט ווי מ'שטייט יעצט, ה"ה הרבני הנכבד מפליא פּלאות ומפריח בחצרות בית חיינו מוה"ר מיכאל דוב יואל לוגער הי"ו בריח התיכון ועמוד התווך דבית מדרשינו ועומד בראש קרן הבנין בנין בית מדרשינו האדיר והחדש, וועלכע איז באַערט געוואָרן מיט אַ ספּעציעלע נזר הוקרה, לאות הוקרה פאר זיינע מסירת נפש'דיגע פּעולות לטובת די ביהמ"ד, דערביי האָט ער אָפּגענומען די וואַרימע ברכת הקודש פון כ"ק מרן אדמו"ר שליט"א און פון כ"ק מרן הגאב"ד שליט"א.

פייער-קלימאַקס פונעם נאַכט, יונגעלייט רייסן זיך אַראָפּ מסירת נפש'דיגע סכומים פאַר'ן ביהמ"ד; העכער אַ מיליאָן אויפגעטריבן אויפ'ן פּלאַץ!

אין די לופטן האָט זיך געשפּירט אַ האַרציגע גרייטקייט, עפּעס וואָס איז נישט שייך אַראָפּצוגעבן אויפ'ן פּאַפּיר, אַ הייליגע עקסטאַז און שטורעמישע התרגשות האָט געפּולווערט אין די זאַל, ווען די עסקנים זענען אַרומגעגאַנגען צווישן דעם ציבור אויפצואַרבייטן די פאַנטאַסטישע נדבות פאַר'ן קרן הבנין, ווען דער ציבור האָט זיך אונטערגענומען אויף די שטרות העכערע גרעסערע סכומים.

דאַן איז געקומען די פייער-קלימאַקס פונעם רייכן פראַכט-נאַכט, אַ התרגשות'דיגע סצענע, ווען קרוב צו 100 אברכים מתפּללי ביהמ"ד האָבן זיך געשטעלט אין לאַנגע רייעס איבערצוגעבן די שטר קבלה פון $18,000 און העכער פאַר'ן קרן הבנין צו חתמ'נען בגושפנקא דמלכא דורכ'ן רבי'ן שליט"א און דורכ'ן רב שליט"א, ווי יעדער האָט באַזונדער געהאַט די זכי' צו חתמ'נען די שטרות אינאיינעם מיט'ן רבי'ן און מיט'ן רב און מקבל זיין ברכת הקודש.

אשרי עין ראתהו! ווי שיין איז געווען צו זען ווי אַזויפיל טייערע יונגעלייט, איינער נאָכ'ן צווייטן, רופן זיך אָן אַזוי וואַרעם מיט אַזעלכע גרויסע סכומים באופן יוצא מן הכלל, ווי דערביי איז אויפגעטריבן געוואָרן פאַנטאַסטישע נומערן פון אַריבער אַ מיליאָן דאָלאַר.

אומגלויבליכע סוקסעס שענקט פרישע דאָזע ענערגיע פאר די ראשי הבונים פונעם מולטי-מיליאָן דאָלאַר'דיגע פּראָיעקט!

די מסיבה איז געשלאָסן געוואָרן אין אַ העכסט געהויבענע שטימונג, ווען דער גאַנצער ציבור איז אונטערן רושם פון די מאַכטפולע סוקסעס, עפּעס וואָס האָט נאָר געקענט צושטאַנד קומען אַדאַנק די וואַרימע ברודער'ליכע משפּחה גייסט אין וועלכע אַלע מתפּללי ביהמ"ד לעבן בשבת אחים גם יחד, ווען דער ציבור האָט זיך ביים הערליכן גראַנדיעזע מסיבה אָנגעשעפּט מיט הויפענעס פון חיזוק און אינספּיראַציע אויף ווייטער.

אין די זעלבע צייט האָט די אומגעהויערע סוקסעס פונעם גרויסן נאַכט געגעבן פאַר די עסקנים אַ פולע דאָזע פון קראַפטפולע כוחות צו קענען ווייטער אָנגיין מיט די הייליגע אַרבייט אַלס שלוחי ציבור פון אַלע מתפּללי ביהמ"ד, באַקומענדיג אַזאַ שטאַרקע און פעסטע פינאַנציעלע רוקן-ביין, ווען ביים מסיבה האָט זיך אַרויסגעשריגן פונעם ציבור אַ הייליגע וואַרימע גרייטקייט פאר די הצלחה פונעם פּראָיעקט.

בו בזמן וואָס די שטח הגדול פיבערט מיט קאָנסטרוקציע אויף אַלע פראָנטן, זענען די עסקנים פאַרנומען צו פאַרענדיגן אין די יעצטיגע טעג, אויסצואַרבייטן מיט יעדן בפרטיות אַ צוגענגליכע פּעימענט פּלאַן פאר די נדבות.

בונים אנחנו לך! נגילה ונשמחה בך!