איראנער מידיא פארעפנטליכט ווידעאו פון א 'זינקענדיגע' אויל טאנקער אינעם פערסישן איינגאס; דעטאלן דערווייל אומקלאר

איראנער מידיא קוועלער האבן ארויסגעשטעלט אן אומקלארע ווידעאו רעקארדירונג וואס צייגט וואס זעט אויס צו זיין א ריזיגע אויל טאנקער וואס זינקט נאכן ווערן געטראפן אינעם פערסישן איינגאס. אינעם ווידעאו קען מען זען ווי די שיף זיצט טיף אין וואסער און איז שטארק אנגעלאנט אויף איין זייט, וואס גיט דעם אנשטעל ווי עס האט געליטן שווערע שאדנס אדער האלט אינמיטן אונטערגיין.

וואס די ווידעאו צייגט אבער נישט איז, וועלכע שיף דאס איז אדער ווען די אנגעבליכע אטאקע איז פארגעקומען. דערווייל איז נאכנישט זעלבסטשטענדיג באשטעטיגט געווארן די אידענטיטעט פון די שיף, די דאטום, אדער וואס האט פאראורזאכט די שאדנס. וויבאלד דאס איז א נייעס וואס אנטוויקלט זיך יעצט, קענען זיך די דעטאלן טוישן ווי נאר מער אינפארמאציע קומט אריין.

די בילדער שטימען מיט א רייע באריכטן פון ענדע אקטאבער איבער טאנקערס וואס האבן זיך אונטערגעצינדן אדער אויפגעריסן אין און ארום דעם 'הארמוז איינגאס'. די איראנער רעוואלוציאנערע גווארדיע (IRGC) פלאטע זאגט אז שיפן האבן אריינגעקראכט אין מינעס אדער זענען געטראפן געווארן פון פראדזשעקטיילס בשעת'ן נוצן "אומגעזעצליכע רוטס".

פון די אנדערע זייט, האבן באריכטן פון די בריטישע 'מעריטיים טרעיד אפערעישאנס' צענטער געמאלדן איבער פראדזשעקטייל אטאקעס אויף טאנקערס אין די געגנט, וואו די מאנשאפט איז סוקסעספול עוואקואירט געווארן אין א זיכערע ארט. די דעטאלן זענען אבער אין קאנטראסט מיט די איראנער ווערסיע פון די געשעענישן.

דער הארמוז איינגאס איז א גאר קריטישע וואסער-וועג וואס פירט אריבער ארום א פינפטל פון די וועלט'ס רויע אויל עקספארטן. דעריבער, יעדע באריכטעטע אטאקע הייבט די אנגעצויגנקייט פאר די שיפינג אינדוסטריע און די ענערגיע מארקעטס.

די הויפט פראגעס בלייבן דערווייל אומגעענטפערט: וועלכע שיף איז דאס? ווען איז עס געטראפן געווארן? וואס האט עס געטראפן? און צי זינקט עס טאקע?