טראגעדיע אין די פיליפינען: כאטש 5 טויטע און איבער 80 פעלן נאך וואס א מאסיווע פייער האט אויסגעבראכן אויף א פאסאזשירן שיף

א שרעקליכע טראגעדיע האט זיך אפגעשפילט מיטוואך אוונט אין די פיליפינען, ווען א מאסיווע פייער האט אויסגעבראכן אויף א פאסאזשירן שיף, איבערלאזנדיג כאטש פינף טויטע און מער ווי 80 מענטשן וואס פעלן נאך.

די לאקאלע קאוסט גארד גיט איבער אז די שיף, באקאנט אלס די "MV June Aster", האט געהאט אויף זיך 117 פאסאזשירן און 17 מאנשאפט מיטגלידער, וואס שטעלט דעם סך הכל ביי 134 מענטשן. דאס פייער האט אויסגעבראכן ארום 6:45 אין אנהייב פונעם אוונט, בעת די שיף איז געווען אויפן וועג פון די הויפטשטאט מאנילא צום פאפולערן טוריסטן-ציל קאראן נעבן פאלאוואן.

לויט ווי איבערלעבער דערציילן, זעט אויס אז דאס פייער האט זיך אנגעהויבן אין די קארגא אפטיילונג נאך א מעכטיגע אויפרייס. די שיף האט טראנספארטירט קארס און אנדערע סחורה צוזאמען מיט די פאסאזשירן. די שווערע רויך און די געפערליכע היץ מאכן עס אוממעגליך פאר די רעטונגס ארבייטער ארויפצוגיין אויפן שיף, וואס האלט נאך אינמיטן ברענען און שווימט נאך אויפן וואסער אבער מען קען נישט צוקומען דערצו. אויף ווידעא קליפס וואס די אויטאריטעטן האבן ארויסגעגעבן קען מען זען ווי די גאנצע שיף איז ארומגענומען מיט פלאמען און מענטשן ווערן ארויסגעצויגן פונעם וואסער אריין אין די רעטונגס שיפלעך.

ביז יעצט זענען 43 מענטשן געראטעוועט געווארן, אריינגערעכנט עטליכע וואס האבן זיך אריינגעווארפן אינעם וואסער אין די פאניק אן קיין לייף-דזשעקעטס. עטליכע פון די געראטעוועטע זענען אפגעפירט געווארן אין שפיטעלער אין קאראן און אינעם דערנעבנדיגן אינזל קוליאן פאר מעדיצינישע באהאנדלונג.

די זוך און רעטונגס אקציעס גייען אן מיט א פולן שוואונג, אבער די ווילדע כוואליעס אויפן ים מאכן עס זייער שווער און פאמעליך. קאוסט גארד שיפן, מיליטערישע שיפלעך, לאקאלע פישער כאפערס און פריוואטע שיפלעך האבן זיך אלע אנגעשלאסן אין די רעטונגס ארבעט דורכאויס די נאכט. ווי אויך איז א מיליטערישע פליגער גרייט אויף סטענדביי ארויסצוהעלפן.

די שיף האט פארלאזט מאנילא דעם פריערדיגן אוונט און איז שוין געווען נאנט צום ענדע פון איר רייזע ווען דאס פייער האט אויסגעבראכן, קוים איין מייל אוועק פונעם ברעג. קאוסט גארד באאמטע זאגן אז די שיף איז אדורך אלע זיכערהייט אינספעקציעס בעפאר די רייזע. די שיפינג קאמפאני האט אויסגעדריקט טיפע טרויער און צוגעזאגט צו קאאפערירן פולשטענדיג מיט די אויספארשונג איבער וואס האט געפירט צום פייער.

ים עקסידענטן זענען ליידער אן אפטער ערשיינונג אין די פיליפינען, וואו די שיפן זענען א הויפט טראנספארטאציע מיטל צווישן די פילע אינזלען. דער יעצטיגער אינצידענט איז אבער באזונדער שווער צוליב די גרויסע צאל מענטשן וואס פעלן נאך און די שוועריגקייטן צו צוקומען צום ברענענדיגן שיף. פאמיליעס פון די פאסאזשירן און מאנשאפט ווארטן מיט אנגסט אויף גוטע נייעס בעת די רעטונגס טיעמס זוכן ווייטער אין די וואסערן ארום קאראן. באאמטע ווארענען אז די צאל פון טויטע קען זיך נאך טוישן ווי די זוך אקציעס גייען אן און די קומענדיגע שעה'ן וועלן זיין קריטיש צו זען וויפיל נאך איבערלעבער מען קען טרעפן.