שפאנונג אין מיטל מזרח: א שיף פלאקערט אין די הארמוז אדורכגאס נאכן ווערן געטראפן פון א פראדזשעקטייל

די איראנער 'פארס' נייעס אגענטור באריכטעט אז א גרויסע שיף ברענט דערווייל אין די דרום זייט פון די הארמוז אדורכגאס, נאכדעם וואס עס איז געווארן געטראפן פון א פראדזשעקטייל. א ווידעא וואס איז ארויסגעשטעלט געווארן אינאיינעם מיטן באריכט צייגט א ריזיגע שיף ארומגענומען מיט שווארצע רויך און פלאמען, וואס זעט אויס ווי א רעזולטאט פון אן אויפרייס אדער א דירעקטע קראך.

די אגענטור האט נישט אידענטיפיצירט וועמענס שיף דאס איז, ווער עס האט געשאסן דעם פראדזשעקטייל, אדער אויב עס זענען דא פארוואונדעטע, און די בילדער זענען דערווייל נישט זעלבסטשטענדיג באשטעטיגט געווארן. די הארמוז אדורכגאס איז איינע פון די וויכטיגסטע רוטעס פאר אויל און גאז שיפערייען אין דער וועלט, און אפילו איין אזא אינצידענט פון א ברענענדיגע שיף קען מאכן א שטארקע טרייסל אין די גלאבאלע ענערגיע מארקעטס.

דער אינצידענט קומט נאך א רייע ענליכע אטאקעס אין די לעצטע פאר וואכן. די בריטישע מאריטים אגענטור האט באריכטעט עטליכע אטאקעס אויף טאנקיר שיפן אינעם ראיאן, אריינגערעכנט א פייער אין א שיף'ס מאטאר-צימער אנהייב וואך, און א ריזיגע סופער-טאנקיר וואס איז אונטערגעצינדן געווארן פאריגן דאנערשטאג, וואס לויט די איראנער האט יענע שיף געפארן אויף אן אומגעזעצליכע רוטע.

די פרישע אטאקעס קומען אין א צייט וואס די שפאנונגען צווישן איראן און די פאראייניגטע שטאטן האלטן אין איין שטייגן. וואשינגטאן פירט אן א שטרענגע ים-בלאקאדע אויף איראנער פארטן און שטעלט אפ שיפן וואס פרובירן דאס צו ברעכן. פון די אנדערע זייט סטראשעט די איראנער רעוואלוציאנערע גווארדיע אז זיי וועלן האלטן דעם אדורכגאס פארמאכט כל זמן די אמעריקאנער אקטיוויטעטן אינעם ראיאן גייען אן.

מיט די יעצטיגע אנגעצויגענע צושטאנד, בשעת ביידע זייטן טיילן זיך קלעפ אויפן וואסער, האלטן שיפעריי קאמפאניס און רעגירונגען א נאנטע אויג צו זען אויב די קומענדיגע אטאקע וועט פירן צו א ברייטערע קאנפליקט.