בס"ד

אינדיע: 20-יעריגער ארעסטירט נאכן כאפן בילדער און שפיאנירן אויפן חב"ד הויז אין מומביי

אינדישע אויטאריטעטן האבן ארעסטירט א 20-יעריגן יוגנטליכן וועלכער ווערט באשולדיגט אין זאמלען שפיאנאזש אינפארמאציע אויפן לאקאלן חב"ד הויז אין מומביי און אנדערע אידישע צילן, אין אויפטראג פון אויסלענדישע פירער.

דער פארדעכטיגטער, אידענטיפיצירט אלס יאש סינג פון 'נאווי מומביי', האט לויט די באשולדיגונגען פאטאגראפירט סענסיטיווע לאקאציעס, אריינגערעכנט דעם חב"ד הויז - וואס איז אויך באקאנט אלס 'נארימאן הויז' - ווי אויך אנדערע געשעפטן וואס זענען אין אידישע אייגנטום.

לויט ווי די אויספארשער געבן איבער, האבן די אויסלענדישע פירער זיך פארבינדן מיט סינג דורך סאשעל מידיא, און ער האט אנגעבליך באקומען באצאלט שיין געלט כדי צו זאמלען און אריבערשיקן די שפיאנאזש אינפארמאציע פאר די מענטשן אין אויסלאנד.

ער איז לכתחילה פארהאלטן געווארן דורך די 'מאהאראשטרא אנטי-טעראריזם סקוואד' און איז שפעטער אפיציעל ארעסטירט געווארן דורך די קעראלא פאליציי, אלס טייל פון א ברייטערע אנגייענדע אויספארשונג.

ווי באקאנט איז דאס חב"ד הויז אין מומביי שוין געווען א הויפט ציל ביי די בלוטיגע טעראר אטאקעס אין יאר 2008 למספרם, וואס דאס טוט נאר פארגרעסערן די זארג און פחד איבער די יעצטיגע שפיאנאזש אקטיוויטעטן. די ארטיגע אויטאריטעטן זאגן אז זיי פירן ווייטער אן אן אינטענסיווע אויספארשונג איבער דעם פארדעכטיגטן'ס אקטיוויטעטן און זיינע מעגליכע פארבינדונגען מיט אויסלענדישע גרופעס.