ראבאטן נעמען איבער די קאר פאבריקן: פרישער אפמאך צווישן 'יו-בי-טעק' און 'פאלקסוואגן' צו נוצן ראבאטן פאר לאגיסטיקס

די ראבאטיק פירמע 'יו-בי-טעק' (UBTECH) און די קאר פראדוצירער 'פאלקסוואגן' (FAW-Volkswagen) האבן אונטערגעשריבן א סטראטעגישן אפמאך צו אנטוויקלען און טעסטן ראבאטן אין א מענטשליכע געשטאלט (humanoid robots) פאר לאגיסטיקס אין זייערע קאר פאבריקן. די ראבאטן וועלן ווערן גענוצט פאר סארטירן, שלעפן און אנדערע וויכטיגע פליכטן אויפן פאבריק פלאר.

דער אפמאך, וואס איז געמאלדן געווארן אנהייב אקטאבער 2026, איז א דירעקטע פארזעצונג פון זייער פריערדיגע קאאפעראציע וואס האט זיך אנגעהויבן אין 2024, ווען די 'וואקער עס' (Walker S) ראבאטן האבן אנגעהויבן טרענירונגען אויף די פראדוקציע ליניעס אין די פאלקסוואגן פאבריק אין טשינגדאו. שפעטער האבן די 'וואקער עס לייט' ראבאטן איבערגענומען די ארבעט פון קוואליטעט-אינספעקציע אינעם זעלבן פאבריק, וואס האט אויפגעוויזן אז די ראבאטן קענען סוקסעספול פוקנציאנירן אין עכטע פראדוקציע אומשטענדן.

דער נייער פאקוס אויף לאגיסטיקס צייגט א קלארע פארברייטערונג פון די פראדזשעקט, אריבערגייענדיג פון בלויזע אינספעקציע צו די פאקטישע פירן און רוקן פון מאטעריאלן און קאר טיילן. ווי עס ווערט איבערגעגעבן, וועלן די רעדערדיגע 'קרוזער' (Cruzr) ראבאטן, אריינגערעכנט די אינדוסטריאלע Y1 מאדעל, ארבעטן אינאיינעם מיט די צוויי-פיסיגע 'וואקער' מאדעלן אונטער איין קאארדינאציע סיסטעם, שאפנדיג א געמישטע פלאטע פון פארשידענע סארט ראבאטן וואס וועלן קאאפערירן אינאיינעם.

דערווייל גרייט זיך די פירמע צו א מאסיווע פראדוקציע. די 'יו-בי-טעק' פאבריק אין ליוזשאו האט שוין אנגעהויבן פראדוקציע דעם 12'טן סעפטעמבער, מיט א מעגליכקייט צו פראדוצירן מער ווי 10,000 ראבאטן א יאר - וואס קומט אויס צו ארום איין ראבאט יעדע צען מינוט. די דאזיגע פראדוקציע קראפט קומט אין א צייט וואס די חילוק צווישן קליינע פראבעס און א ברייטע באנוץ אין פאבריקן ווערט אלס קלענער.

די קאר פראדוצירער זוכן כסדר פרישע וועגן צו נוצן פלעקסיבלע אטאמאציע וואס קען זיך צופאסן צו טוישונגען אין קאר דיזיינס און פראדוקציע געברויכן. דער נייער שותפות שטעלט אהער די ראבאטן אלס א פראקטישע לייזונג פאר די שווערע און איבערגעחזר'טע פיזישע ארבעט וואס פאדערט זיך נאך אלס אין די קאר פאבריקן. אויב די טעסטס וועלן זיין א סוקסעס, קען דאס פירן צו א שנעלערע איבערגאנג פון בלויזע פראבעס צו א טעגליכע אינדוסטריאלע באנוץ איבער די כינעזע פראדוקציע ליניעס.