פרישע קאטאסטראפע אין נעפאל: צענדליגע הייזער און בריקן פארשוועמט אין א מאסיווע פלעש-פלאד

נעפאל - א פרישע פלוצלינגדיגע פארפלייצונג (פלעש-פלאד) האט זונטאג פארטאגס, אקטאבער 11, אדורכגעריסן דעם 'בודי גאנדאקי' טייך טאל אינעם גארקא דיסטריקט אין נעפאל. די פארפלייצונג האט מיטגעברענגט א שווארצע כוואליע פון בלאטע און ברוכווארג וואס האט אראפגעקראכט די שפיציגע הימאלייע בערג מיט א געוואלדיגע קראפט.

לויט די שאצונגען פון לאקאלע באאמטע, זענען צווישן 35 און 40 הייזער אינגאנצן אוועקגעשוועמט געווארן. ווי אויך זענען אמווייניגסטנס זעקס בריקן - אריינגערעכנט בריקן פאר קארס און פוסגייער - און א קאנסטראקשן קעמפ ביים לאקאלן היידרא-פאוער פראדזשעקט גענצליך חרוב געווארן.

דערווייל זענען נאכנישט באריכטעט געווארן קיין טויטפעלער, אבער באריכטן געבן אן אז צווישן פיר און צען מענטשן פעלן. רעטונגס קרעפטן, אריינגערעכנט די לאקאלע פאליציי און העליקאפטערס, זענען אראפגעקומען אויפן סצענע און האבן שוין באוויזן ארויסצוראטעווען צענדליגע מענטשן צו זיכערהייט. די אויטאריטעטן פארדעכטיגן אז א מאסיווע ערד-זומפ (לענדסלייד) האט מעגליך פארהאקט דעם טייך, וואס האט דערנאך אויסגעפלאצט, אבער די פונקטליכע אורזאך ווערט נאך אויסגעפארשט.

די יעצטיגע טראגעדיע רייסט אויף פרישע וואונדן, קומענדיג קוים צוויי מאנאטן נאך די שרעקליכע קאטאסטראפע פונעם 26'סטן אוגוסט, ווען אן אוואלאנטש פון אייז און שטיינער נעבן דעם טיבעט גרעניץ האט געפירט צו א מאסיווע פארפלייצונג. יענע קאטאסטראפע האט איבערגעלאזט א שוידערליכע צאל פון איבער טויזנט טויטע, מיט טויזנטער אנדערע וואס פעלן נאך ביז היינט, און האט איבערגעלאזט גאנצע שטעט חרוב ונחרב, אריינגערעכנט טיילן פונעם גארקא דיסטריקט.

ווידעאס פונעם יעצטיגן אינצידענט צייגן ווי די שווארצע וואסערן רייסן אדורך דעם שמאלן טאל מיט א געוואלדיגע אימפעט, וואס צייגט ווי שנעל אזעלכע נאטורליכע בלאקאדעס אין די בערג קענען זיך פארוואנדלען אין א טויטליכע פארפלייצונג אן קיין שום פריערדיגע ווארענונג. פאר די ארטיגע איינוואוינער וואס ציילן נאך זייערע טויטע און פרובירן זיך צו ערהוילן פון די אוגוסט טראגעדיע, ברענגט די פרישע קלאפ ארויף שווערע פראגעס איבער וויפיל די רעגירונג איז באמת צוגעגרייט צו באשיצן די בערגיגע ראיאנען פון קומענדיגע קאטאסטראפעס.