בס"ד

דראמאטיש: א ריזיגע קאנטעינער שיף זינקט אינעם הארמוז דורכגאס אינמיטן די אמעריקע-איראן קריג

איראן'ס רעוואלוציאנערע גווארדיע האט ארויסגעגעבן א דראמאטישע ווידעא וואס צייגט ווי א ריזיגע קאנטעינער שיף איז ארומגענומען מיט פלאמען און שווארצע רויך הויבט זיך פונעם דעק. די שיף זעט אויס צו זיין שווער געשעדיגט און בייגט זיך אויף איין זייט, מיט צענדליגע קאנטעינערס און ברוכווארג וואס שווימען ארום אין די וואסער, בעפאר עס זינקט אינגאנצן אונטער די כוואליעס דרום פונעם הארמוז דורכגאס.

די שיף איז אידענטיפיצירט געווארן אלס די "GFS Pride", א סינגאפור-געפלאגטע קאנטעינער שיף. לויט די איראנער נעיווי, האט די שיף געטראגן מער ווי 2,500 קאנטעינערס און האט אריינגעקראכט אין א נעיווי מינע בעת'ן פארן אויף אן "אומאויטאריזירטע און געפארליכע" רוטע, וואס זיי רופן אן אומלעגאל, וואס דאס האט געפירט צו א שווערע פייער און צום ענדגילטיגן זינקען. אבער די 'רויטערס' נייעס אגענטור, ציטירנדיג מאריטים זיכערהייט קוועלער, גיט איבער אן אנדערע ווערסיע, זאגנדיג אז די שיף איז געווארן געטראפן פון א פראדזשעקטייל (מיסיל).

די פאקיסטאנער אויטאריטעטן האבן שוין ארויסגעגעבן א ווארענונג פאר אנדערע שיפן אין די געגנט אכטונג צו געבן פון די פילע קאנטעינערס וואס שווימען ארום אין די וואסער. די פארוואלטער פון די שיף, וועלכע זענען באזירט אין די פאראייניגטע אראבישע עמיראטן (UAE), האבן דערווייל נישט רעאגירט צו די אינצידענט.

דאס איז שוין די צווייטע שיף וואס זינקט זינט די אמעריקע-איראן מלחמה האט אויסגעבראכן דעם 28'סטן פעברואר, לויט דאטא פון די אינטערנאציאנאלע מאריטים ארגאניזאציע (IMO). 'סי-בי-עס נייעס' באריכטעט אז דאס איז די ערשטע מאל וואס איראן נעמט פאראנטווארטליכקייט אז א שיף איז געזונקען נאכן קראכן אין א מינע. דער אינצידענט קומט קוים א טאג נאכדעם וואס די בריטישע מאריטים אגענטור (UKMTO) האט ארויסגעגעבן פיר באזונדערע ווארענונגען איבער אטאקעס אויף א טאנקער און דריי קאנטעינער שיפן, וואס ברענגט די סך הכל פון ווארענונגען דעם חודש צו 24.

די איראנער באהויפטונג אז די שיף האט געקראכט אין א מינע, קומט אין דירעקטע קאנטראסט מיט א סטעיטמענט פון פרעזידענט טראמפ ענדע אוגוסט, ווען ער האט געמאלדן אז אמעריקאנער קרעפטן האבן אויסגערייניגט דעם דורכגאס פון אלע מינעס.

אין די זעלבע צייט האבן צוויי הויכראנגיקע איראנער באאמטע געזאגט פאר 'רויטערס' אז טעהראן נוצט נייע טאקטיקן קעגן שיפן אינעם דורכגאס, מיטן ציל צו האלטן די אויל פרייזן הויך און צו האבן אן איינפלוס אויף די אמעריקאנער 'מיטטורם' וואלן.

מיט די אומפארענטפערטע פראגע צי עס איז געווען א מינע אדער א מיסיל, און מיט גאר ווייניג דעטאלן איבער דעם צושטאנד פון די מאנשאפט אדער די פראכט, ברענגט די פרישע אינצידענט ארויף ערנסטע צווייפלען איבער די זיכערהייט פון איינע פון די וועלט'ס וויכטיגסטע האנדלס-רוטעס.