ברוקלין – א פאטאלע פאליציי שיסעריי האט זיך אפגעשפילט מוצאי שבת, נאוועמבער דעם 14'טן, 2026, אויפ'ן בעלט פארקוויי הייוועי אין ברוקלין, נאך א ווילדע יאגד וואס האט זיך געענדיגט מיט א טויטליכן ענדע.

דער אינצידענט האט זיך אנגעהויבן נאכדעם וואס 911 האט ערהאלטן עטליכע רופן איבער א פרוי וואס שרייט פאר הילף אינעווייניג אין א ווייסע קארגא ווען, נעבן קאני איילענד. איין רופער האט איבערגעגעבן אז מ'הערט ווי איינער קלאפט און שרייט אינעווייניג, און א צווייטער האט געהערט א פרוי שרייען "לאז מיך גיין".

לויט די פאליציי, האט די פרוי באוויזן ארויסצושפרינגען פונעם ווען נאך בעפאר די אפיצירן זענען אנגעקומען, און זי איז שפעטער געפונען געווארן אומגעשעדיגט. אינוועסטיגעיטארס גלייבן אז דער אינצידענט איז געווען א רעזולטאט פון א פאמיליע געפעכט. ווען די פאליציי אפיצירן האבן זיך דערנענטערט צום ווען, האט דער דרייווער ארויפגעפארן אויפ'ן סיידוואק און אנטלאפן מיט א ווילדע ספיד, ביז ער איז געבליבן שטעקן אין שווערע טרעפיק אויף די איסטבאונד זייט פונעם בעלט פארקוויי.

די פאליציי זאגט אז די אפיצירן האבן געהייסן דעם דרייווער ארויסצוקומען, און ווען ער האט זיך אנטזאגט, האט אן אפיציר אויסגעבראכן די פראנט פעסענדזשער פענסטער. דער דרייווער האט דאן אנגעהויבן פארן פאראויס און צוריק, אריינקראכנדיג אין פאליציי קארס און אין ציווילע קארס וואס זענען געווען פיל מיט מענטשן. לויט די NYPD באאמטע, האבן פעפער ספרעי און א טעיזער נישט געהאט קיין שום עפעקט אויף אים, און ער האט ווייטער אנגעהאלטן צו קראכן אין די ארומיגע קארס ביז די אפיצירן האבן געעפנט פייער און אים געשאסן.

דער פארדעכטיגטער איז אפגעפירט געווארן צום 'NYU לאנגאון' שפיטאל אין ברוקלין וואו דאקטוירים האבן באשטעטיגט זיין טויט. קיין איין פאליציי אפיציר איז נישט געשעדיגט געווארן אינעם אינצידענט. די פאליציי האט שפעטער ארויסגעגעבן אז דער דרייווער איז שוין געווען געזוכט דורך די פאליציי פאר אן אומלעגאלע פארהאלטונג אין אקטאבער און פאר א 'דאמעסטיק אסאלט' אין נאוועמבער.

א טייל פונעם בעלט פארקוויי איז געווען אפגעשפארט פאר א לענגערע צייט דורכאויס די אויספארשונג. די NYPD 'פארס אינוועסטיגעישאן דיוויזשען' פארשט אויס די שיסעריי, וואס איז רעקארדירט געווארן אויף די 'באדי קעמרעס' פון די אפיצירן.