שטורמישע הפגנות אין בית שמש און ירושלים נאכן ארעסטירן א חתן אינמיטן די שבע ברכות; כאטש 6 פארוואונדעט

אמווייניגסטנס זעקס מענטשן זענען באריכטעט געווארן פארוואונדעט זונטאג ביינאכט דורכאויס א מאסיווע הפגנה אין בית שמש, וואס האט אויסגעבראכן אלס פראטעסט קעגן דעם ארעסט פונעם אינגן חתן און ישיבה בחור, יערי ליבערמאן.

די שטורמישע פראטעסטן האבן זיך אנגעהויבן נאכדעם וואס די מיליטערישע פאליציי האט ארעסטירט דעם חתן בעת ער איז געפארן אינאיינעם מיט זיין כלה צו זייער שבע ברכות פייערונג.

די פאליציי האט זיך באנוצט מיט שאק-גראנאטן ווען די צוזאמענשטויסן האבן זיך פארשטארקט. צווישן די פארוואונדעטע זענען געווען עטליכע יוגנטליכע און א 21-יעריגער יונגערמאן וועלכער האט געליטן פון אן ערנסטע וואונד אין די פוס. עמערדזשענסי רעטונגס אגענטורן האבן אפגעפירט עטליכע פונעם פראטעסט צו לאקאלע שפיטעלער פאר ווייטערדיגע באהאנדלונג.

די פאליציי האט באשולדיגט די פראטעסטירער אין ווארפן שטיינער און בלאקירן די גאסן, אינדערצייט וואס זיי האבן אפגעלייקנט די באשולדיגונגען אז פאליציי אפיצירן האבן פאראורזאכט די וואונדן דורך שטיפן מענטשן אויף צעמענטענע באריקאדן.

נאך די ברייטע און שטורמישע הפגנות וואס זענען פארגעקומען סיי אין בית שמש און סיי אין ירושלים, איז דער חתן ליבערמאן ענדליך באפרייט געווארן פונעם מיליטערישן טורמע מאנטאג אינדערפרי. זיין באפרייאונג איז געקומען נאך אן אינטענסיווע אריינמישונג פון הויכראנגיקע באאמטע, עסקנים און לעגאלע פארטרעטער וועלכע האבן געארבעט אומערמידליך אים ארויסצוזען פון דארט.