אוקראינע ברענגט אום הויכראנגיקן רוסישן גענעראל אין א געצילטע דראון אטאקע אין דאנעצק

דער רוסישער מעידזשאר-גענעראל אנטאן גרוניס, וועלכער האט געדינט אלס קאמאנדיר פון די 4'טע מאטאר-רייפל בריגאדע, איז אומגעברענגט געווארן אין א געצילטע אוקראינישע דראון אטאקע אינעם רוסיש-אקופירטן דאנעצק ראיאן, לויט ווי עס ווערט באשטעטיגט דורך ווידעא מאטעריאל און סטעיטמענטס וואס זענען ארויסגעגעבן געווארן דורך די אוקראינישע מיליטער.

דער אוקראינישער קאמאנדיר ראבערט בראוואדי האט איבערגעגעבן אז די סוקסעספולע אטאקע איז פארגעקומען אין די נאכט שעות פון סעפטעמבער דעם 12'טן. די אטאקע האט דירעקט געצילט דעם גענעראל ביי זיין נאכט-באהעלטעניש, און איז דורכגעפירט געווארן דורך די עליטע 427'טע דראון בריגאדע, באקאנט אלס 'ראראג'.

גענעראל גרוניס איז נישט געווען סתם א נאמען אין די רוסישע מיליטער; ער האט אנגעפירט מיט די רוסישע קרעפטן אויפן פראנט ביי באכמוט און קאסטאנטיניווקא. ער איז גאר געווען דער וואס האט פערזענליך איבערגעגעבן א באריכט פארן רוסישן פרעזידענט וולאדימיר פוטין דעם פארגאנגענעם יולי, איבער די רוסישע פארכאפונג פון קאסטאנטיניווקא. לויט בראוואדי, איז גרוניס שוין דער זיבעטער רוסישער קאמאנדיר אויף א הויכע שטאפל פון א בריגאדע אדער ארמיי וואס ווערט אומגעברענגט דורך זיינע דראון איינהייטן.

זיין טויט קומט אלס א שווערע סימבאלישע קלאפ פאר מאסקווע, ספעציעל נאכדעם וואס גרוניס האט בלויז עטליכע וואכן צוריק באקומען דעם פרעסטיזשפולן "הערא פון די רוסישע פעדערעישאן" מעדאל, וואס איז אים פערזענליך איבערגעגעבן געווארן דורך דעם רוסישן פארטיידיגונגס מיניסטער אנדרעי בעלאוסאוו ענדע אוגוסט.

פון די רוסישע זייט הערט זיך דערווייל קעגנזייטיגע באריכטן איבער זיין טויט. כאטש א מיליטערישע קאנאל און א קאמאנדיר פון די רוסישע 'אכמאט' ספעציעלע קרעפטן האבן ביידע באשטעטיגט אז ער איז טויט, האט די רוסישע פארטיידיגונגס מיניסטעריום נאכנישט ארויסגעגעבן קיין אפיציעלע באשטעטיגונג.

דאס קומט אין א צייט וואס עס זענען דא באריכטן אז א רוסישער לוטענאנט-גענעראל וואס קאמאנדירט די 51'טע ארמיי איז אויך געצילט געווארן עטליכע טעג פריער, וואס לייגט זיך צו צו א קייט פון שווערע פארלוסטן צווישן די הויכראנגיקע רוסישע פעלד-קאמאנדירן. כאטש אוקראינישע באאמטע האבן נאכנישט זעלבסטשטענדיג באשטעטיגט יעדע קליינע דעטאל ארום גרוניס'נס טויט, צייגט אבער די דראון ווידעא און בראוואדי'ס באריכט אויף א גאר פונקטליך-געפלאנטע אטאקע אויף אן ארויפגייענדע שטערן אין די רוסישע מיליטערישע פירערשאפט.