א שרעקעדיגע ווידעא וואס קומט ארויס פון די פארס פראווינץ אין איראן, צייגט דעם שוידערליכן מאמענט ווי אן אנגעפילטע דאמפ-טראק האט פארלוירן אירע ברעיקס און איז אראפגעפלויגן א הויכע בארג ביי די 'נארגעסי' דאמבע קאנסטראקשען סייט נעבן קאזערון, איבערדרייענדיג זיך עטליכע מאל אין בלויז געציילטע סעקונדעס.

די 11-סעקונדע קליפ, וואס איז אפגעכאפט געווארן דעם 3'טן אקטאבער, ווייזט ווי די ווייסע 'איוועקא' טראק הייבט אן צוריקצופארן און כאפט אן א שנעלקייט, אינמיטן די ארבעט צווישן אנדערע שווערע מאשינערי אויפן סייט. די טראק האט באקומען צופיל מאמענטום און איז גראד אראפגעפלויגן דעם שטיינערנעם אָפּגרונט, קראכנדיג אראפ אין א ריזיגע וואלקן פון שטויב. די ווידעא איז שנעל געווארן וויירעל אויפן אינטערנעט אלס א לעבעדיגע ווארענונג ווי שנעל זאכן קענען גיין קראך אויף אזא סייט.

די איראנער 'מעהר נייעס' אגענטור איז געווען פון די ערשטע צו באריכטן דעם אינצידענט, וואס איז פארגעקומען נעבן די דערפער דזשארע און באלאדע. לויט די ערשטע באריכטן אין די איראנער מידיא, איז די אורזאך פונעם עקסידענט געווען א פלוצלינגדיגע דורכפאל מיט די ברעיקס. די לאקאלע אויטאריטעטן פארשן נאך די פונקטליכע דעטאלן וואס האט געפירט צום קראך, און די צושטאנד פונעם דרייווער איז דערווייל נאכנישט באשטעטיגט געווארן.

די נארגעסי דאמבע איז איינע פון עטליכע גרויסע אינפראסטרוקטור פראדזשעקטן וואס ווערן יעצט געבויט אין קאזערון, מיט'ן ציל צו קאנטראלירן פארפלייצונגען, צושטעלן וואסער פאר לאנדווירטשאפט און טרינקען פאר די ראיאן, ווי אויך צו פראדוצירן עלעקטריציטעט פאר די ארומיגע אינדוסטריעלע געגנטער.

עקסידענטן מיט שווערע מאשינערי זענען ליידער אן אפטער ערשיינונג ביי גרויסע קאנסטראקשען סייטס וואס געפינען זיך אויף הויכע און בערגיגע פלעצער, וואו אנגעפילטע טראקס זענען אינגאנצן אנגעוויזן אויף גוטע ברעיקס זיך צו קענען דרייען אויף די שמאלע וועגן.