בארא פארק:

ברוך דיין האמת: הרה"ח ר' יעקב יצחק כהן ז"ל, א באליבטער סלאנימער חסיד וועלכער איז געווען באקאנט מיט זיין שטענדיגן שמייכל, זיין ווארעם הארץ צו שפייזן אידן, און זיינע קביעות'דיגע שיעורי תורה, איז ל"ע נפטר געווארן אין די 70'ער יארן.

נאך די לוויה וואס איז פארגעקומען דאנערשטאג פארנט פונעם סלאנימער בית מדרש, ווערט דער ארון ארוף געפירט קיין ארץ ישראל לקבורה.

ברוך דיין האמת: נפטר געווארן ר' הערשי אייכנשטיין ע"ה (באקאנט אלס B-44), א לאנגיעריגער בארא פארק שומרים מיטגליד און דיספעטשער וועלכער האט אפגעגעבן זיין לעבן פאר חסד און הילף פארן ציבור.

די לוויה וועט פארקומען זונטאג 2:00 נאכמיטאג אין די 'שומרי הדת' אויף 14'טע אוועניו און 39'סטע גאס.

די וועטער זונטאג וועט זיין מערסטנס פארוואלקנט מיט א מעגליכקייט פאר רעגנס און טאנדער שטורעמס, מער אינדערפרי און אנהויב נאכמיטאג.

די טעמפעראטורן וועלן דערגרייכן די הויכע 70'ס ביז די נידעריגע 80'ס, באגלייט מיט לייכטע ווינטן פון 10 ביז 15 מייל א שעה.

בארא פארק שומרים בעט די הילף פונעם ציבור צו זוכן דעם 65 יעריגן וויליאם (בילי) גרובער, פארשוואונדן געווארן זייט פרייטאג 9:00 אינדערפרי נעבן 15'טע אוועניו און 63'סטע גאס.

ער איז 5'5 הויך מיט גרויע האר און נוצט א ‘וואקער’ ווער עס האט אים געזען אדער ווייסט עפעס, זאל זיך פארבינדן מיט שומרים אויף 718-871-6666.

א שווערער קאר עקסידענט האט פאסירט אויף 9'טע אוועניו און 56'סטע גאס, וואו א קאר האט זיך אינגאנצן איבערגעקערט.

רעטונגס הילף איז שוין אויפן ארט און באהאנדלט עטלעכע געשעדיגטע.

ווילאמסבורג:

א קאר האט אריינגעקראכט אין א לייט פאול ביים ווינקל פון דיוויזשען און מארסי עוועניו.

די איינוואוינער אין גרינפוינט זענען אויפגערעגט איבער די כסדר'דיגע צושפארונגען אויף די G סאבוועי ליין.

דער עולם איז נמאס געווארן פון די שטענדיגע פארפלאנטערונגען און לייגט אצינד שטארקע דרוק אויף די MTA צו פאררעכטן די מצב.

מאנסי:

1-טויזנטער וויזשניץ מאנסי חסידים און די ישיבה בחורים גרייטן זיך מיט גרויס התרגשות צו א היסטארישע נסיעה קיין ארץ ישראל צוזאמען מיט כ''ק אדמו''ר מוויזניץ מאנסי שליט".

די גרויסע נסיעה, וועלכע הייבט זיך אן דעם קומענדיגן מיטוואך פרשת כי תבוא און וועט דויערן א גאנצע וואך ביז מיטוואך נצבים וילך, ווערט שוין פלאנירט פאר לאנגע חדשים.

דאס איז די ערשטע מאל וואס דער רבי פארט קיין ארץ ישראל באגלייט מיט אזא ריזיגן ציבור חסידים.

דורכאויס דעם געהויבענעם "מסע הקודש" וועט דער רבי פוקד זיין קברי צדיקים און אפשטאטן באזוכן ביי פילע אדמו"רים און רבנים.

דער קלימאקס פונעם באזוך וועט זיין דער געהויבענער שבת קודש אין אתרא קדישא מירון, סמוך ונראה צום ציון פונעם הייליגן תנא רבי שמעון בר יוחאי, אינאיינעם מיט די טויזנטער אידן.

גלייך נאך שבת וועט פארקומען א מעמד הדלקה אין מירון, אנגעפירט דורך דעם באקאנטן משפיע הרה"צ ר' אלימלך בידערמאן שליט"א.

די גרויסע נסיעה קומט אין רעזולטאט פון א הבטחה וואס דער רבי האט געגעבן פאריגן יאר: די הונדערטער ישיבה בחורים וואס פליען יעצט מיט, האבן באקומען די זכיה דערצו נאכ'ן זיך פלייסיג פארהערן אויף די מסכתות אינעם סדר הלימוד פון "תורתי".

2-די "וויליאם פ. פעיסט" וואלונטירן אמבולאנס קארפס לאדנט איין אלע לאקאלע משפחות צו א פרייליכן און אינגאנצן אומזיסטן "קאמיוניטי טאג", וואס וועט פארקומען זונטאג, אוגוסט 30, אנגעהויבן פון 12:30 נאכמיטאג ביי 3 רעד סקול הויז ראוד אין טשעסטנאט רידזש.

דער פראגראם ווערט ספעציעל אפגעראכטן אלס א געשמאקע פאמיליע אויספלוג איידער די זומער טעג ענדיגן זיך און די קינדער קערן זיך צוריק אין סקול, וואו מען וועט זיך קענען אמוזירן מיט באונסי הייזער, פנים מאלעריי, פאפקארן, שניי קאונס, קאטאן קענדי, און באקומען ספעציעלע מתנות צום אנהויב פונעם זמן.

דורכאויס דעם נאכמיטאג וועט דער ציבור אויך האבן א שיינע געלעגנהייט זיך צו טרעפן פנים אל פנים מיט אפיצירן פון די לאקאלע רעטונגס קרעפטן, אריינגערעכנט מיטגלידער פון די ראמאפא פאליציי, ראקלאנד קאונטי שעריף אפיס און די ספרינג וואלי פאליציי.

קרית יואל:

דער וועטער אין קרית יואל מארגן, דער טאג וועט זיך אנהייבן פארוואלקנט, אבער שפעטער אינעם טאג קענען זיך אנטוויקלען שטורעם רעגנס באגלייט מיט מעגליכע שטארקע ווינטן.

די רעטונגס אגענטורן אין קרית יואל פארברייטערן זייער נעטווארק, און באקומעןפרישע עמערדזשענסי טראקס אין פרישע לאקאציעס איבערן שטעטל כדי צו קענען אנקומען פיל שנעלער צו יעדע נויטפאל.

אונטער דעם נייעם פלאן וועט אן הצלה אמבולאנס זיין סטאנציאנירט אינעם 'מצילי אש' גאראדזש אויף מירון דרייוו, און א פייער-טראק וועט שטיין גרייט ביים הצלה גאראדזש אויף פארעסט ראוד.

נאך די לעצטיגע פארברייטערונג פון די פלענער, האט זיך אפיציעל אנגעהויבן די בוי ארבעט פונעם נייעם בית מדרש 'חיים יעקב דקהל ייטב לב' אויף Acres Enclave.

דער פראיעקט איז ספעציעל פארגרעסערט געווארן כדי צו קענען ארייננעמען דעם כסדר'דיגע וואקס פון משפחות אין די געגנט און קענען נאכקומען די געברויכן פון די קהילה.

אין ליכט פון די וואקסנדע געברויכן, האט דער ווילידזש פון 'סאוט בלומינג גראוו' איינגעהאנדלט צוויי נייע אויטאס פאר אפיציעלע שטאטישע באנוץ.

לויט די ווילידזש באאמטע איז דאס בלויז דער אנהויב פון א ברייטערן פלאן צו פארגרעסערן די שטאטישע אפטיילונגען, כדי צו קענען סערווירן אלע איינוואוינער ווי עס פאסט.

לעיקוואוד:

א אינצידענט האט פאסירט  ווען א גרופע היספאנישע יוגנטליכע האט נאכגעפאלגט א קאר מיט אידישע בחורים.

זיי האבן ארויס גענומען א מעסער און גע'גנב'בעט די קאר,עס האט זיך געענדיגט מיט עטלעכע ארעסטן דורך די פאליציי.

די באס קאסטן אין לעיקוואוד ווערט געהעכערט און די מוסדות בעטן די עלטערן נישט צו באצאלן דעם נייעם פרייז.

די הנהלות רופן זיך נישט צו איינשרייבן אין די באסינג פראגראם, אלס פראטעסט קעגן דעם הויכן אפצאל פון $945 פאר א קינד.

א פאליציי אויספארשונג אין לעיקוואוד איבער א געגנבעטע קרעדיט קארד האט געפירט אפיצירן צו א ‘וואווא’ געשעפט אין בראונס מילס.

די פארשונג האט זיך אומערווארטעט געענדיגט מיט צוויי באזונדערע, אומפארבונדענע ארעסטן אויפן ארט.

אשען קאונטי האט געעפנט אן עפנטליכע אנליין 'אקשן' אויף איבער 100 אומגענוצטע קארס, טראקס און עקוויפמענט.

דער עולם קען שוין אנהויבן אריינגעבן 'בידס' פאר די פארהאנדענע חפצים ביז דעם קומענדיגן דינסטאג, אוגוסט 25.

קעטסקילס:

נעסאו קאונטי עקזעקיוטיוו ברוס בלעקמאן, וועלכער לויפט יעצט אלס קאנדידאט פאר גאווערנאר פון ניו יארק, האט אפגעשטאט א באזוך ביי 'גורמעי גלאט' אין די קעטסקילס כדי צו שמועסן דירעקט מיט ניו יארקער בירגער.

דורכאויס זיין באזוך האט ער ארומגערעדט איבער די שוועריגקייטן פון פירן א ביזנעס אין דעם סטעיט, אנווייזנדיג אויף די כסדר'דיגע שטייגנדע קאסטן און דעם שווערן פרעשור וואס פלאגט קליינע ביזנעסער און פשוט'ע ארבעטס משפחות.

דער קאנדידאט האט זיך גלייכצייטיג אויסגעשמועסט מיט די לאקאלע וויילער און זיך צוגעהערט צו זייערע מיינונגען איבער וואס עס פעלט זיך אויס צו טון, כדי צו מאכן ניו יארק מער ביליג צו וואוינען און פיל מער פריינטליך פאר ביזנעסער.

א רירענדן מעמד איז פארגעקומען אין א מיידל קעמפ ווען א קעמפערקע וואס איז גאר שטארק איז געווען אנטשלאסן, און טראץ אלע אומשטענדן האט זי מקיים די הייליגע מצווה פון הפרשת חלה מיט א שטארקע איבערגעגעבנקייט.

לעיקפראנט:

א פרישע אפדעיט ווידעא איז געווארן אויף די ‘א בליק’ נייעס קאנאל איבער די פארשריט פון די נייע ישוב.