שטורעם נאכדעם וואס עקס-פרעזידענט אבאמא נעמט זיך אן פאר קאנגרעספרוי אילאן אומאר אינמיטן א פעדעראלע אימיגראציע אויספארשונג

געוועזענער פרעזידענט באראק אבאמא ציט א שווערע קריטיק נאכן זיך עפנטליך אננעמען פאר די קאנטראווערסיאלע קאנגרעספרוי אילאן אומאר, וועלכע געפינט זיך יעצט אונטער אן ערנסטע פעדעראלע אויספארשונג איבער אימיגראציע פראד. אבאמא האט באשולדיגט די טראמפ אדמיניסטראציע אין פאליטיזירן די יוסטיץ דעפארטמענט און איר צילן בלויז ווייל זי קריטיקירט דעם פרעזידענט.

די אויספארשונג קעגן אומאר האט לעצטנס גענומען אן ערנסטן קער ווען פעדעראלע אגענטן האבן דורכגעפירט אן אבלאווע מיט א געריכטליכע סוירטש ווארענט אויף איר היים אין וואשינגטאן די.סי. די אגענטן האבן קאנפיסקירט איר סעלפאן, פערזענליכע רעקארדס און אנדערע מאטעריאלן אלס טייל פון די אנגייענדע קרימינאלע אויספארשונג. די אויטאריטעטן האבן אויך ארויסגעגעבן סובפינעס פאר עטליכע פון אירע פאמיליע מיטגלידער, פאדערנדיג זיי זאלן קומען אויפטרעטן פאר א גרענד דזשורי.

די אויספארשונג קאנצענטרירט זיך צו אומאר אדער איר פארשטארבענער פאטער, נור אומאר מוחאמעד, האבן איבערגעגעבן פאלשע אינפארמאציע אויף צענדליגער יארן אלטע אימיגראציע פאפירן, וואס האט איר ערמעגליכט צו באקומען בירגערשאפט אלס א מינדעריעריגע.

אין א לאנגע פאוסט אויף סאשעל מידיא, האט אבאמא אראפגעריסן די אויספארשונג אלס אן "אפשויליכע" שריט, און געזאגט אז די פולע וואג פונעם פעדעראלן גאווערנמענט פאלט ארויף אויף א געזעץ-פאלגנדע ערוויילטע אפישעל. ער האט געטענה'ט אז אומאר איז אנגעקומען קיין אמעריקע ביי די 12 יאר און איז אטאמאטיש געווארן א סיטיזען ביי די 17 יאר ווען איר טאטע איז געווארן א בירגער. ער האט אוועקגעמאכט די אויספארשונג אלס אן אומבאגרינדעטע טעאריע אז זי איז באמת אלט געווען 18 יאר אין יענע צייט. אבאמא האט געווארנט אז אזעלכע שריט שטעלן א געפארפולע פרעצעדענט וואס קען ווערן גענוצט דורך צוקונפטיגע פרעזידענטן פון ביידע פארטייען.

אבער קריטיקירער האבן תיכף צוריקגעשאסן, אנווייזנדיג אז אבאמא שטעלט אראפ איר יארגאנג ווי א קלארע פאקט, בעת פובליק רעקארדס האבן פאר יארן לאנג אנגעוויזן איר געבורטס-דאטום אלס אקטאבער דעם 4'טן 1981. דאס מיינט אז זי וואלט שוין געווען 18 אדער 19 יאר אלט ווען איר טאטע איז געווארן א בירגער אין יאר 2000.

עס שטעלט זיך ארויס אז אין מאי 2019, בלויז עטליכע מאנאטן נאכדעם וואס אומאר איז אריינגעקומען אין קאנגרעס, האבן אירע סטעף מיטגלידער פארלאנגט פון די מינעסאטע לעגיסלאטור לייברערי, די קאנגרעס רעקארדס, און וויקיפעדיע, אז מען זאל טוישן איר געבורטס-יאר צו 1982.

די ווייסע הויז האט זיך אנגענומען פאר די יוסטיץ דעפארטמענט, זאגנדיג אז זיי פאקוסירן בלויז אויף צוריקצוברענגען געזעץ און ארדענונג. אומאר אליין האט געלייקנט סיי וואספארא אומריכטיגע האנדלונג און האט אראפגעמאלן די אויספארשונג ווי א פרואוו צו צילן פאליטישע פיינט. די גאנצע פרשה האט פריש אויפגעוועקט די לאנג-יעריגע דעבאטעס ארום איר אימיגראציע היסטאריע און די פונקטליכקייט פון אירע אפיציעלע רעקארדס.