בס"ד

אוקריינע פארוואנדלט 'אבראמס' טאנקען אין אומדערקענבארע פעסטונגען זיך צו באשיצן פון רוסישע דראונס

א קאמף ווידעאו וואס צירקולירט אויף סאשעל מידיע צייגט ווי אן אוקריינישער M1A1 'אבראמס' טאנק - וואס איז געווארן געליפערט דורך אויסטראליע - איז געווארן אינגאנצן איבערגעמאכט און פארוואנדלט אין א שווער-באוואפנטע, באשיצטע פעסטונג. אינעם ווידעאו זעט מען ווי דער טאנק שיסט 120-מילימעטער רונדעס אריין אין א רוסיש-קאנטראלירטע וואלד צו שטיצן די אוקריינישע אינפאנטריע.

לויט דעם אקאונט וואס האט ארויפגעלייגט דעם קליפ, באלאנגט דער טאנק צו די 475'טע אוקריינישע רעגימענט, כאטש דאס איז נאכנישט זעלבסטשטענדיג באשטעטיגט געווארן. אינעם קליפ קען מען זען ווי דער קאמופלירטער מאשין זיצט באהאלטן אין א פעלד און שיסט עטליכע מאל, לאזנדיג אונטער זיך א געדיכטע רויך און שטויב נאך יעדע שאס. דער נייער אויסזען פונעם טאנק איז ווייט פון דעם ארגינעלן טאנק וואס אויסטראליע האט איבערגעגעבן, און טייל אויפן אינטערנעט גלייכן דאס צו צו א מאשין פון א 'מעד מעקס' פילם.

די עקסטרעמע איבערמאכונג איז א טייל פון א נייע טרענד וואס בויעט זיך שוין פאר עטליכע מאנאטן. אוקריינישע טעכניקער האבן אנגעהויבן ארויפצולייגן אויף די טאנקען פרישע שיכטן פון עקסטרע ארמער, שטאלענע שטייגן אויפן דאך, און ספעציעלע נעצן זיך צו באשיצן פון דראונס. דאס קומט נאכדעם וואס אויסטראליע האט באשטעטיגט אז זיי האבן שוין איבערגעגעבן אלע 49 טאנקען, רוב פון זיי אין יולי 2025.

די סיבה דערפאר איז זייער פשוט: אויף א שלאכטפעלד וואס איז איבערגעפילט מיט FPV דראונס און ארטילעריע, איז אן איינזאמער טאנק א גאר גרינגע ציל. לויט איין אנאליז, זענען שוין דא 11 באשטעטיגטע אבראמס טאנקען וואס זענען פארניכטעט געווארן און נאך 12 וואס זענען געשעדיגט געווארן דורך רוסישע דראונס.

דערפאר האבן די אוקריינער באשלאסן צו פארוואנדלען דעם טאנק אין א שווער-באשיצטע, סטאנציאנארע קאנאן וואס שטיצט די סאלדאטן פון א באהאלטענע פאזיציע, כדי צו קענען ווייטער נוצן איר פייער-קראפט אן ווערן א ציל. מיליטערישע עקספערטן פאלגן יעצט נאך צו זען צי דאס איז בלויז אן איינמאליגע עקספערימענט אדער דער אנהייב פון א נייע סטראטעגיע אויפן שלאכטפעלד.