בס"ד

א מאטארסייקעל וואס פארט אויפ'ן וואסער: כינעזער מאטארסייקעל פירער ברעכט גינעס רעקארד

זשאנג שו, דער גרינדער פון די כינעזער מאטארסייקעל פירמע 'זי-עקס-מאטא' (ZXMOTO), האט אריינגעכאפט א נייעם 'גינעס ווארלד רעקארד' נאכ'ן פארן מיט א מאטארסייקעל אויף אפענע וואסערן פאר א שטרעקע פון 25.3 מייל (40.74 קילאמעטער).

אין א ווידעא וואס איז פארשפרייט געווארן, זעהט מען ווי ער פארט אריבער א טייך אין די הונאן פראווינץ אין כינע אויף א ספעציעל-איבערגעמאכטע MX450 מאטארסייקעל. ער האט געמאכט עטליכע רייזעס אהין-און-צוריק אין א צייט-אפשניט פון ארום 32 מינוט. דאס קומט אויס צו א דורכשניטליכע ספיד פון בערך 76 קילאמעטער א שעה, וואס איז גענוג שנעל אז דער מאטארסייקעל זאל זיך גליטשן אויפ'ן אויבערפלאך פונעם וואסער אנשטאט צו זינקען. דער רעקארד איז שוין אפיציעל באשטעטיגט געווארן, און עס ווערט באטראכט אלס איינע פון די מערסט-אומגעווענליכע מאטארסייקעל שטיקעס אין די לעצטערע יארן.

וויאזוי ארבעט עס? דער מאטארסייקעל איז אויסגעשטאט מיט ספעציעלע סקיס וואס האלטן עס אויפ'ן וואסער און העלפן מיטן קאנטראלירן די דירעקציע, בעת דאס אונטערשטע רעדל שטופט עס פאראויס. די ענדזשינירינג טיעם האט אויך צוגעלייגט ספעציעלע וואטערפרוף (וואסער-באשיצטע) טיילן און א גרעסערן גאז טאנק, כדי עס זאל קענען אנהאלטן די גאנצע רייזע אויפ'ן טייך אן זיך אפשטעלן.

פאר זשאנג פערזענליך איז דער רעקארד א גרויסע דערגרייכונג, נאכדעם וואס ער האט שוין פראבירט אן ענליכע שטיקל אין יאר 2009, אבער דעמאלטס איז עס דורכגעפאלן נאך קוים 20 מעטער. די פירמע זאגט אז דער יעצטיגער סוקסעס איז דער רעזולטאט פון 17 יאר פון שווערע ארבעט און ענדזשינירינג פארבעסערונגען דורך זיין טיעם.

דאס קומט בלויז עטליכע מאנאטן נאכדעם וואס זיין פירמע האט געוואונען איר ערשטע 'ווארלד סופערספארט' פארמעסט אין מערץ 2026, א געווינס וואס האט פארוואנדלט זשאנג אין איינע פון די מערסט-באקאנטע נעמען אין די כינעזער מאטארסייקעל אינדוסטריע.