בס"ד

פראנצויזישע פאליציי ארעסטירט א מאן נאכן סטראשען צו שיסן אן אויסטראלישע אידישע פארפאלק אין א סופערמארקעט

פראנצויזישע אטאריטעטן האבן ארעסטירט אן אירלענדישן מאן וועלכער איז פארדעכטיגט אין מאכן אנטיסעמיטישע קאמענטארן און סטראשען צו שיסן אן אויסטראלישע אידישע פארפאלק דורכאויס א קאנפראנטאציע אין א סופערמארקעט נעבן די שטאט אוויניאן אנהייב דעם חודש.

דער פארדעכטיגטער, א מאן אין די זעכציגער יארן, איז ארעסטירט געווארן דעם מיטוואך אין אוויניאן נאך אן אויספארשונג איבער דעם אינצידענט וואס האט פאסירט דעם 11'טן אוגוסט. די געשיכטע האט געצויגן אינטערנאציאנאלע אויפמערקזאמקייט נאכדעם וואס א ווידעא פונעם אינצידענט איז ברייט צושפרייט געווארן אויף די סאציאלע נעצן. ער ווערט יעצט געהאלטן אין ארעסט אין די מארסעי געגנט.

דאס אידישע פארפאלק פון אויסטראליע איז געווען אויף א באזוך אין פראנקרייך ווען זיי האבן זיך אנגעשטויסן אינעם מאן אין א גרויסן סופערמארקעט אין די שטאט לע פאנטעט. לויט ווי דאס פארפאלק פארציילט, האט זיך עס אנגעהויבן אלס א פריינטליכע שמועס נאכדעם וואס דער מאן האט באמערקט ווי דער איד טראגט א פראנצויזישע פוטבאל העמדל. דער שמועס האט זיך אבער שפעטער אריבערגעצויגן צו אירלאנד און מדינת ישראל, און ביי דעם פונקט האט דער מאן אנגעהויבן ווארפן אנטיסעמיטישע לאזונגען, דערמאנענדיג היטלער ימ"ש און דעם האלאקאוסט.

כאטש די ערשטע קאמענטארן זענען נישט רעקארדירט געווארן, האט די פרוי אנגעהויבן כאפן א ווידעא פונעם קאנפראנטאציע, און אויפ'ן קליפ קען מען קלאר הערן ווי דער מאן סטראשעט איר אז ער וועט אריינשיסן א קויל אין איר קאפ אויב זי גייט נישט אוועק פון אים.

פראנצויזישע באאמטע האבן עפנטליך פארדאמט דעם אינצידענט נאכדעם וואס די ווידעא איז ארויסגעקומען. דער אינערן מיניסטער לאורענט נונעז האט מיטוואך געמאלדן אז די אויספארשער האבן ארעסטירט דעם פארדעכטיגטן. "אנטיסעמיטיזם מוז באקעמפט ווערן מיט א שטארקייט און אן קיין נאכגיביגקייט," האט נונעז געזאגט, גלייכצייטיג אויסלויבנדיג די פאליציי וואס האבן געפירט די אויספארשונג.

די אויספארשונג ווערט אנגעפירט דורך די פאליציי אין מארסעי. לויט לאקאלע באריכטן בלייבט דער פארדעכטיגטער אין ארעסט, און אויב ער וועט געפונען ווערן שולדיג אונטער די פראנצויזישע געזעצן קעגן העסליכע רעדעס (העיט-ספיטש), קען ער אויסשטיין א טורמע אורטייל און א שווערע געלט שטראף. דער ארעסט איז א וויכטיגע שריט פאראויס, ווען דאס וואס האט זיך אנגעהויבן אלס א וויירעל ווידעא פון אידישע טוריסטן האט יעצט געפירט צו אפיציעלע שריט דורך די פראנצויזישע אטאריטעטן.