ניסים אין קאליפארניע: קליינע פליגער קראכט אריין אינמיטן א פארנומענע גאס אין סאן כאזעי; פאסאזשירן איבערגעלעבט מיט לייכטע וואונדן

עס האט געזאלט זיין א געווענליכע שבת נאכמיטאג אויף די גאסן פון סאן כאזעי, קאליפארניע, אבער עס האט זיך געענדיגט מיט א שרעקעדיגע סצענע ווען א קליינע פליגער איז אראפגעפאלן פונעם הימל און אריינגעקראכט דירעקט אינמיטן א פארנומענע אינטערסעקשאן.

דער אינצידענט האט פאסירט דעם אקטאבער 17, 2026, ארום 3:00 אזייגער נאכמיטאג. דער פליגער, א 1968 'סעסנע' מאדעל, האט זיך געהאט געהויבן פונעם נאענטן 'ריעד-הילוויו' עירפארט, אבער בלויז עטליכע מינוט שפעטער האט דער פילאט געמאלדן אויפן ראדיא אז ער שפירט קאמפליקאציעס מיטן מאטאר. ער האט פרובירט צוריקצומאכן דעם וועג צום ראנוועי, אבער אנשטאט דעם האט ער געמאכט אן עמערדזשענסי לאנדונג און אריינגעקראכט מיטן נאז פאראויס ביים אינטערסעקשאן פון קעפיטאל עקספרעסוועי און עקסקאליבער דרייוו.

אויפן פליגער זענען געווען דריי פאסאזשירן - צוויי ערוואקסענע און איין קינד. אלע דריי זענען אפגעפירט געווארן אין שפיטאל, און פייער דעפארטמענט באאמטע האבן איבערגעגעבן אז זייערע וואונדן זענען ברוך השם נישט קיין לעבנס-געפאר. די גרעסטע וואונדער איז אבער געווען אז טראץ וואס דער פליגער איז אראפגעקראכט אויף א גאר פארנומענע גאס, האט עס נישט געטראפן קיין איין קאר אדער פוסגייער אויף דער ערד, א זאך וואס האט איבערגעלאזט די ארומיגע איינוואוינער אין שאק זעענדיג די ברוכווארג.

דער קראך האט אנגעמאכט א גרויסע כאאס אין די געגנט. עס איז געווען א קליינע ברענשטאף (געז) רינונג וואס די עמערדזשענסי אגענטורן האבן שנעל קאנטראלירט און אויפגעקלינט. די פאליציי און פייערלעשער האבן אפגעשפארט די גאנצע סצענע צו קענען אוועקנעמען די ברוכווארג, וואס האט געפירט צו שווערע טראפיק אין די ארומיגע גאסן.

דער פליגער ווערט אפערירט דורך 'פלייאינג טווענטי', א נאן-פראפיט קלוב פאר סטודענטן און אלאמני פונעם סאן כאזעי סטעיט אוניווערסיטעט. א לאקאלער איינוואוינער וואס וואוינט שוין אין די געגנט פאר ארום 60 יאר האט פארציילט אז ער האט שוין געזען פראבלעמען מיט פליגערס ארום דעם עירפארט אין די פארגאנגענהייט, אבער קיינמאל אזוי נאנט צו זיין הויז.

דערווייל איז נאכנישט דא קיין אפיציעלע אורזאך פארוואס דער קראך האט פאסירט, און אינוועסטיגעיטארס ארבעטן יעצט צו פארשטיין פונקטליך וואס עס האט זיך אפגעשפילט אין די ערשטע מינוטן און וויאזוי די מאטאר פראבלעמען האבן געפירט צו דעם דורכפאל. דער אינצידענט האט אויך פריש אויפגעוועקט די פראגעס און זארגן איבער די ריזיקעס פון האבן קליינע עירפארטס אינמיטן באוואוינטע געגנטער, ארומגענומען מיט הייזער, געשעפטן און פארנומענע גאסן.