חזק חזק ונתחזק!!!

היינט זונטאג מטו"מ איז כ"ק אדמו"ר מסאטמאר שליט"א אנגעקומען קיין  קרית יואל, וואו דער רבי האט געדאוונט שחרית אין בנין ישיבה קטנה "בנין מענדל שווימער", העכער ביהמ"ד בית כהנא  אויף חברון רד. דערנאך איז דער רבי ארויפגעגאנגען צום אהל הקדוש אין בית החיים, שטייענדיג למחרתו פון די יארצייט פון אמא של מלכות, הרבנית הצדיקת מרת פעסיל לאה עליה השלום, א"ח מרן  הגה"ק בעל ברך משה זי"ע, וואו די רבי שליט"א האט געזאגט תהלים און געמאכט א סיום משניות לעילוי נשמתה.

דאן איז די רבי שליט"א אריבער אין שטוב פון בנו הגה"צ אבד"ק ור"מ שליט"א, וואו עס האט זיך ווידעראמאל איבערגעשפילט דאס הערליך בילד ווי א גרעסערע קבוצה נדיבים בעם, אנ"ש תושבי קרית יואל, גייען אריין בקודש פנימה און שרייבן אונטער שטרות מיט זייער נדבה לטובת הקהלה והרחבת גבולי', בחתימת יד קדשו פונעם רבין שליט"א, וואס האט יעדן באזונדער מאציל געווען מברכותיו הקדושות. די נדיבים בעם האבן זיך דערמיט אנגעשלאסן אין די געהויבענע מסע הקודש קיין אייראפע בראשות דעם רבין שליט"א, קומענדיגן חודש חשון תשפ"ו הבעל"ט.

דערנאך איז די רבי שליט"א ארומגעגאנגען באזוכן ביי עטליכע שטחים אין קרית יואל רבתי, וואו עס קומט פאר העפטיגע בוי ארבעט דורך די בארימטע "ליוולענד" פירמע, אונטער די פירערשאפט פון די שותפים לדבר מצוה, הנגידים החשובים, רודפי צדקה וחסד, הר"ר לוי יצחק שווארץ הי"ו און הר"ר יוסף יוזפא לאנדא הי"ו, חברי הנהלת הקהלה דקהל יטב לב סאטמאר קרית יואל. די רבי שליט"א האט אויסגעדרוקט רצון קדשו צו באזוכן ביי עטליכע פלעצער, ארויסצוהייבן און מחזק צו זיי די געטרייע שותפים וועלכע זענען געווען די סאמע ערשטע נחשונים לדבר מצוה, צו אראפברענגען די הויכע פרייזן אין קרית יואל, צו בלויז 300 דאלער פער סקווער פיס, און אין די נייערע געגנטער צו בלויז 250 דאלער פער סקווער פיס.

די רבי שליט"א איז צום ערשט אנגעקומען אויף א באזוך ביי די "פאלם טרי דעוועלאפמענט" אויף חברון רד., בשכינות פון ביהמ"ד בית כהנא דקהלתינו הק', און באטראכט די העפטיגע בוי ארבעט אויף עטליכע בנינים וואס די סטרוקטורן ציען זיך ארויף אין די יעצטיגע טעג. די אנוועזנדע חברי הנהלת הקהלה האבן צוגעוויזן פארן רבין שליט"א וואו עס וועט געבויעט ווערן די נייע "מקוה טהרה" למען טהרתן וקדושתן של ישראל, צום באנוץ פון די טויזנטער משפחות אין די גאנצע געגנט.

דערנאך איז די רבי שליט"א צוגעפארן באזוכן ביי די נייע ריזיגע "איילענד טיים סופערמארקעט" וואס מארשירט פאראויס אין די יעצטיגע וואכן, און וועט געעפנט ווערן אין די קומענדיגע חדשים, אונטער די שטרענגע השגחה פון "סאטמאר כשרות" דקהל יטב לב. די רבי  שליט"א האט אויסגעדרוקט קורת רוח צו זען די ריזיגע געביידע וואס שטייט על מכונו, און וועט סערווירן די טויזנטער משפחות אין קרית יואל בכלל און אנשי שלומינו בפרט מיטן העכסטן סטאנדארט פון כשרות. די שותפים לדבר מצוה האבן געצייגט פארן רבי'ן די באזונדערע פליגל וואו עס וועט ווערן איינגערישט די בארימטע "סאטמאר פלייש" געשעפט, מיט א פריוואטע אריינגאנג און איינריכטונגען אלס באזונדערע אפטיילונג אינעם ריזן סופערמארקעט.

דאן האט די רבי שליט"א געקוקט די פלענער פון די ריזיגע שטחים נעבן די סופערמארקעט, וואו עס וועט געבויעט ווערן די נייע "איילענד עסטעיטס דעוועלאפמענט" מיט העכער 1,500 דירות, פאר שפאט ביליגע פרייזן פון "בלויז 250 דאלער פער סקווער פיס". די רבי שליט"א האט זיך אינטערעסירט אין די אנטוויקלונגען און איבער די אויסשטעל פון די גאסן, און מאציל געווען ברכת קדשו אז אלעס זאל גרינגערהייט באשטעטיגט ווערן און מ'זאל קענען אנהייבן די בוי ארבעט ווי אמשנעלסטן.

אויפן שטח פון די "איילענד עסטעיטס דעוועלאפמענט" האבן די אנוועזנדע חברי הנהלת הקהלה געוויזן פארן רבין שליט"א דער שטח וואס איז באשטימט געווארן צו דינען אלס שטח הביהמ"ד דקהלתינו הק', מיט א פראכטפולער ריזיגער סאטמארער בית המדרש פאר די אומגעגנט. די רבי שליט"א האט ארויסגעהויבן די אויסטערלישע זכי' פון די בונים ומקימים אויפצובויען א בנין ביהמ"ד לתורה ולתפלה פאר אנשי שלומינו, און אנגעוואונטשן ברכות לרוב.

פון בלומינג גראוו איז די רבי  שליט"א געפארן באזוכן דעם הערליכן ישוב אין "טשעסטער", וואו א גרויסע צאל דירות זענען שוין פולקאם גרייט, און די ערשטע צענדליגער משפחות גרייטן זיך שוין זיך אריינצוציען אין די דירות אין די טעג פון חודש אלול הבעל"ט. די רבי שליט"א וועלכער האט מיטגעהאלטן די שוועריגקייטן אין לויף פון די לעצטערע יארן, האט אויסגעדרוקט רצון קדשו, צו זען פון דערנאנט די פרייליכע אנטוויקלונגען מיטן שליכטן אלע פראבלעמען און מאכן די לעצטע צוגרייטן זיך אריינצוציען אין די דירות בעז"ה.

די רבי שליט"א האט ארומשפאצירט אויף די גאסן צווישן די הערליכע הייזער, און דערנאך זיך אומגעקוקט אויפן פראכטפולן בנין ביהמ"ד גדול ומפואר דקהלתינו הק', וואס איז געבויעט געווארן דורך די בארימטע דעוועלאפער, וועלכער זענען באקאנט מיט זייער רעפוטאציע צו בויען הערליכע שולן מיט הרחבת הדעת ווי עס פאסט פאר א בית מקדש מעט.

די רבי שליט"א איז אריין אין איינע פון די פארטיגע דירות אינעם דעוועלאפמענט צו א מסיבת לחיים, און נאכאמאל אנגעוואונטשן די חשובע שותפים לדבר מצוה, זיי זאלן מצליח זיין אין אלע פראיעקטן, א דאנק זייער אויסטערלישע שריט אראפצוברענגען די הימל-שרייענדע פרייזן אין קרית מלך רב קרית יואל, און זכות פון רביה"ק דער מייסד הקהלה והקרי', וועט זיי זיכער ביישטיין לעד ולנצח נצחים. *לך בכוחכם זה!!!