נייע דעטאלן וואס זענען ארויסגעקומען פון עטליכע אפישעלס און קוועלער וועלכע זענען באקאנט מיט די קאמפן אין תימן, אנטדעקן א קריטישע דורכפאל וואס האט געברענגט צו א ביטערע מפלה פאר די אפיציעלע תימן'ער רעגירונג און אירע אליאירטע קרעפטן קעגן די חותי רעבעלן אין דרום תימן.

עס שטעלט זיך ארויס אז די סאודיע מיליטערישע פלאנירער האבן געמאכט א גרויסע טעות ווען זיי האבן נישט מיטגעשיקט קיין ספעציעלע אפיצירן און קאנטראלערס מיט די קרעפטן אויפן פראנט. די דאזיגע ספעציאליסטן זענען קריטיש וויכטיג אנצופירן און קאארדינירן פונקטליכע עיר-סטרייקס. אן די ספעציאליסטן אויפן פעלד, האבן די רעגירונגס קרעפטן פארלוירן די לופט-שטיצע וואס פלעגט ביז יעצט צוריקהאלטן די חותים. דאס האט זיך ארויסגעשטעלט צו זיין א פאטאלע טעות, ווייל ווען די חותים האבן אנגעהויבן זייער קאנטער-אפענסיווע, האבן זיי געקענט מארשירן פאראויס אן קיין שום מורא פון לופט-אטאקעס.

די קאנסעקווענצן פון דעם דורכפאל זענען אנגעקומען זייער שנעל און דראמאטיש. די חותי קרעפטן האבן באוויזן איינצונעמען גרויסע שטחים, און האבן עווענטועל אקופירט די וויכטיגע פארט-שטאט 'מאכא' אינאיינעם מיט די ארומיגע אינזלען וואס געפינען זיך ביים סטראטעגישן 'באב על-מאנדעב' דורכגאס. קאנטראל איבער די דאזיגע פאזיציעס גיט פאר די טעראר גרופע די מעגליכקייט צו קאנטראלירן און שטערן איינע פון די וועלט'ס מערסט-וויכטיגע ים-רוטעס פאר אינטערנאציאנאלע האנדל.

דער עפיזאד ברענגט ארויף שווערע פראגעס איבער די קאארדינאציע צווישן די סאודיע קרעפטן און זייערע תימן'ער שותפים. עס שטעלט אויך אין א פראגע צייכן די גרייטקייט פון די רעגירונגס-קרעפטן צו פירן א לענגערע קריג אן קיין כסדר'דיגע לופט-שטיצע, און צי ענליכע נאכגעלאזטקייטן קענען חלילה פירן צו נאך אזעלכע דורכפעלער אין די קומענדיגע פאזעס פון די מלחמה.